Salmos 34 - Chuj San Sebastian Bible

SALMO 34 A swach' nab'enal Jehová

Sbit David jun tic yic 'ix ya'n 'och sb'a 'icha junc 'anma tzcot 'a sjolom, yic 'ayc' 'a yojltac win rey Abimelec. Yuj cha, 'ix pechx 'elt yuj winac.

¹ 'Oj wi'chan̈ sb'i Jehová 'a smasnil tiempo, 'oj waln̈j in wach' paxti 'a 'a.

² A 'a Jehová ata 'oj wic' in tzaljc'ojlal. 'Ab'c ex wit chon̈ab', ex 'emmquilal eyeq'ui, tzaljan̈ec.

³ Qui mol 'i'c chan̈ sb'i yuj calnec wach' paxti 'a 'a.

⁴ In 'awj 'a Jehová, yajn̈ej in sta'wni, 'ix yi'n can 'el smasnil in xiwc'ojlal.

⁵ A eb' tzya'ch sc'ojl 'a 'a, caw tzalj eb', may pax b'a'n̈ 'oj can eb' 'a q'uixwc'ojlal yu'uj.

⁶ 'Ix wal in b'a 'a 'a, yujto caw 'oltac wilxi; yajn̈ej 'ix yab'ni, in scoln can 'el 'a scal smasnil in somc'ojlal.

⁷ A yángel Jehová a tztan̈wni eb' yiclum 'a Dios, tzoyy 'ec' 'a stz'ey eb', tzcolx 'el eb' yu'uj.

⁸ 'A'ljec prowal, ax eyilni chajtlto wach' snab'en Jehová. Caw wach' yic eb' to a 'a Dios tzya'ch sc'ojol.

⁹ 'Ay cab' yel'ch Jehová 'a qui satc an̈ yic xo caji, yujto may tas tzyac' palta 'ayn̈ an̈ 'ay yel'ch Dios 'a qui sat.

¹⁰ A no león tz'el yip no yuj wejel, palta ax eb' 'anma tzyij 'ejm sb'a 'a Jehová, may xon b'a'n̈ tzyac' palta tas 'ay tz'och yuj eb'.

¹¹ Ex 'unin cotn̈ec 'ayin, 'ab'xnan̈c 'a tas 'oj wala'. 'Oj ex in cuy 'a tas tzeyutj eya'n 'och e nab'en 'a Dios.

¹² Toto tze nib'j tznajtxb'i e q'uinal, mto tze nib'j tzaljc'ojlal tz'aj yec' junjn c'u eyu'uj,

¹³ 'actjec can eyaln jun tzo'n̈ tu paxti'al, may cab' b'a'n̈ tzeyac' 'es.

¹⁴ 'Ijec 'el e b'a 'a scal tu'al, ax tas wach' a tze b'o'o; a cab' junc'ojlal tze sayq'ui, tze b'eylb'ani.

¹⁵ A Jehová a tztan̈wni eb' 'anma wach' sb'eyb'al, tzmaclni pax yab' tas tzyal eb', yic tzyaln sb'a eb' 'a 'a.

¹⁶ Palta 'ay cot yowl sc'ojl 'a yib'n̈ eb' tzb'on maysch'olnil, yic tzsatn 'el snanb'il cot eb' 'a sat lum lum tic.

¹⁷ A eb' 'anma wach' sb'eyb'al, a yic tzyaln sb'a eb' 'a Jehová, yajn̈ej tzyab'n tas tzyal eb'. Caw tzcolx 'el eb' 'a scal smasnil somc'ojlal yu'uj.

¹⁸ La'n yaj 'a stz'ey eb' to man̈x 'anmac yaj spixn tzyab'i, tzcoln 'el eb' tzsomchj 'el snab'en yuj scusc'ojlal cha.

¹⁹ A eb' 'anma wach' sb'eyb'al, wach'xam til wal yailal tzjaw 'a yib'n̈ eb', palta ax Jehová a tzcoln 'el eb' 'a yol sc'ab' smasnil jun tzo'n̈ cha.

²⁰ Caw a tztan̈wni, yuj cha, may junc sb'acl 'oj ma'x pojoc.

²¹ Ax pax eb' maysch'olnil sb'eyb'al, a smaysch'olnilal eb' chi 'oj milnc chamoc. A eb' tzchichn 'och 'a mach wach' sb'eyb'al, 'oj 'ajxoc 'och syailal eb'.

²² A Jehová a tzcoln 'el eb' schecab'. Ma'oj 'ajxoc 'och syailal eb', yujto a 'aych yipc sc'ojl eb'.