Salmos 32 - Chuj San Sebastian Bible

SALMO 32 Caw wach' yic eb' tz'ajx lajwc smul

Sb'it David jun tic

¹ Caw wach' yic eb' to 'ix 'ajx can lajwc smasnil smul, 'ix sucx pax sat smaysch'olnilal eb'.

² A eb' x'och spaltail, toto man̈xtzac 'och jun chi smulc eb' yuj Jehová, caw wal wach' yic eb', atn eb' man̈xtzac snalb'ej smacn sat yit 'anma'il.

³ A yic mantzac wal q'uet in mul, ton̈j caw tz'el yip in niwnal tic tzwab'i, yujto ton̈j si'sni sjaw in c'ojl 'a junjn c'u.

⁴ Ach in Diosal, sc'ual, yac'wlil scot yowl a c'ojl 'a wib'an̈. 'Icha wal tz'aj stacj te nichte yuj cuaresma, 'ixta 'in 'aji.

⁵ Mamin Jehová, 'ix wojquej 'eli to x'och in mul 'ayach. 'Ix yaln in c'ojl waln q'uet in mul cha, may tas xin c'ub'j can 'eli. Ach xo, 'ix ac' lajwc in mul chi 'a wib'an̈.

⁶ A eb' yiclum, yal cab' sb'a eb' 'ayach, a yic tzjaw niwc yailal 'a eb'. Wach'xam tzjaw 'icha a 'elmal a', palta ma'oj c'och 'a eb'.

⁷ A 'aych tzin col in b'a, ach tzin a tan̈wj 'a yol sc'ab' tas 'ay smay, 'oj 'el waw ach in b'itnan yuj in colnb'il 'ix ac'a.

⁸ Mamin Jehová, ach 'ix al 'ayn 'ixtic: Q'ueln in 'ochn̈ej 'ayach, 'oj ach in cuyu', 'oj wac' a nab'enoc, ax in ch'oxn jun b'e 'aj 'oj a b'eyi.

⁹ Man̈ pitc tzotj a b'a 'icha no chej, yujto yowlal a yet' freno mto yet' sch'an̈l yic sti no', a tzyamn 'och wan no', toto ma'ay, matz 'at no 'aj tz'ijx 'ati, xa chi.

¹⁰ Mamin Jehová, a eb' maysch'olnil sb'eyb'al, til wal syailal eb' 'oj jawoc, palta ax eb' tzach 'a'n 'och yipc sc'ojol, a 'a chamc'ojlal tztan̈wni eb'.

¹¹ Ex wit 'anmal to wach' e nab'en, 'a'c tzaljoc e c'ojl 'a Jehová, e masnil ex to 'ayx 'och 'a stojlal, b'itnan̈c 'a tzaljc'ojlal.