Salmos 31 - Chuj San Sebastian Bible

SALMO 31 Cojn Jehová 'aych yipc in c'ojol

Sb'it David jun tic tzc'an junc mach tzjucb'tzan b'it

¹ Mamin Jehová, cojn ach tzach wa'ch yipc in c'ojol. Man̈ in a cha somchjoc, coln yet' a tojlal.

² Chaj ab' tas tzwala, caw coln muc'uc, wojtac to 'icha in n̈aq'uen aji, in cuartel ach, a 'aych tzin col in b'a.

³ Yujto 'icha in n̈aq'uen aji, in cuartel pax ach, yuj cha, 'ij in b'ey et' 'a stojlal.

⁴ Coln 'el 'a yol sc'ab' jun yal x'ajx 'ejm 'a wojltac, yujto in Colmal ach.

⁵ Mamin Jehová in Diosal ach, tzwa'cn 'ab'enal in pixn 'a yol a c'ab', yujto caw yeln̈j tas tzala.

⁶ Caw tzin chac eb' 'anma tzyac' 'ejm sb'a 'a jun tzo'n̈ yechl to may jac yel'chi. Palta an xo tic, cojn ach tzach wa'ch yipc in c'ojol.

⁷ A 'a chamc'ojlal a tz'i'n cot tzaljc'ojlal 'ayin. 'In tzel in cusc'ojlal, ojc pax in somc'ojlal.

⁸ Ma'in a'cn 'och 'a yol sc'ab' eb' 'ajc'ojl yajch 'ayin; palta ata in a'cn 'och lin̈n 'a 'aj may tas tzin 'i'ni.

⁹ Mamin Jehová, 'o'ch cab' wal a c'ojl 'ayin, yujto 'ayn 'ec' 'a scal yailal. Caw tzc'unb' yol in sat woq'ui, tz'el yip in pixan, yet' pax in niwnal.

¹⁰ A 'in q'uinal 'ipn yemt yuj yailal, ax wab'lil 'ipn yemt yuj somc'ojlal. A cusc'ojlal a 'ipn yi'n 'el wip, caw c'uxmtac yel yip in niwnal tzwab'i.

¹¹ Caw tzetztac wilx 'a sat eb' 'ajc'ojl yajch 'ayin, b'uchnb'il waj yuj eb' cajn 'a in tz'ey, tzin syajl eb' caw 'ojtnac in. A eb' tzin 'iln yec' 'a yoltc b'e, caw tzlaj sc'ub'c 'el eb' sat wu'uj.

¹² Jun 'ejmn̈ej in 'atcn satc'ojlal yuj eb', 'icha to chamnc in xo. Lajn in 'icha wal junc xalu caw choc' yaj spoji.

¹³ Tzwab' sajsni eb' 'anma 'a in patic. 'Ayxn̈ej in xiwc'ojlal 'a smasnil lugar. Jun lajn xoj tzyutj eb' snan 'a in patic, tzmol aln eb' tas tzyutj eb' yi'n 'ec' in q'uinal.

¹⁴ Mamin Jehová, an xo tic cojn ach 'aych 'och yipc in c'ojol. Tox 'ix wal 'ixtic: Ach tic in Diosal ach, xin chi.

¹⁵ A 'a yol a c'ab', ata 'ay in q'uinal; coln 'el 'a eb' 'ajc'ojl yajch 'ayin, yujto tzin spech b'eyc'oc eb'.

¹⁶ 'Ochn̈ wal q'ueln 'ayn an a checb' in tic, coln 'el yet' a chamc'ojlal.

¹⁷ A 'aych wan waln in b'a, man̈ a cha wac' in q'uixwloc. A cab' eb' maysch'olnil tzyac' sq'uixwloc; 'a'cn 'at eb' 'a 'aj caw cusltac yilxi, atn 'a yet'l eb' chamnac.

¹⁸ Sictac cab' tz'aj eb' 'a'm 'es, yujto tzyal eb' b'uchwal paxti', tzpatquiln can 'el smasnil eb' 'anma wach' snab'en.

¹⁹ Caw niwn a wach'c'ojlal tzac' 'a eb' 'ay el'ch 'a 'a. Sat wal eb' 'anma', tza pojn 'ec' a wach'c'ojlal chi 'a scal eb' tzach 'a'n 'och yipc sc'ojol.

²⁰ Colcn 'el eb' wach' 'a ojltac 'a stu nab'en eb' maysch'olnil, yujto a 'a atut, ata tza molcn eb' 'a stu paxti eb' 'ajc'ojl cha.

²¹ ¡Alx cab' wach' paxti 'ayach! Yujto caw satjub'tac yilx tas tza b'o 'ayn yuj a chamc'ojlal, yic oyyn 'och eb' 'ajc'ojl 'a in patic.

²² A yic 'ayn 'och 'a in yailal, 'ix in nani chajtlto in 'ijx 'el 'a ojltac, palta ax yic xin c'ann a colwal, yajn̈ej xab'n tas xwala.

²³ E masnil ex to yic ex xo Jehová wet'oc, qui chamc'ojloquec qui Diosal. A tztan̈wni eb' to wach' tzyutj sb'a. Palta ax 'a eb' tzyij chan̈ sb'a yet' stu nab'enal, caw tz'acn tzyutj ya'n spac 'a eb', atn syailal eb'.

²⁴ Ex to 'aych Jehová yipc e c'ojl wet'oc, tzlaj eya'lac e nab'enoc.