Salmos 30 - Chuj San Sebastian Bible

SALMO 30 B'it yic alj yuj diosal 'a Jehová

A jun tic sb'it David yic tz'och yopiso yatut Dios

¹ Mamin Jehová tzach in b'itnej yet' in wach' paxti', yujto ach in a sic'q'ue wan 'a scal in yailal; ma'ix a nib'j in sb'uch eb' 'ajc'ojl yajch 'ayin.

² Ach in Diosal, xin c'an a colwal, 'ix a'n b'oxc in c'ojol.

³ In 'a col-l 'a yol sc'ab' chamel, 'ix a'n pax in q'uinal, ma'in a chaj 'at 'a scal eb' chamnac.

⁴ Ex to yic ex xo Jehová wet'oc, b'itn̈ coyc 'a 'a, calc wach' paxti 'a jun mach to Niwn Yel'chi.

⁵ Yujto jun wal rato tzcot yowal, palta ax swach'c'ojlal, 'ayc'n̈ej 'a smasnil tiempo. Wach'xam tzon̈ 'o'c 'a 'ac'wal, ax 'a yic tzsa'cb' pax 'eli, tzjapx qui tzaljc'ojlalec jun 'ejm xo.

⁶ A yic caw te'n waji, in nan 'ixtic: May xon b'a'n̈ 'oj in telw 'ejm yuj junc tas, xin chi.

⁷ Mamin Jehová, yet' wal swach'l a c'ojol in e'n can 'och 'a 'aj may tas tzin 'i'ni. Palta ax yic xe'n 'el a b'a 'a in tz'ey, in somchj 'el yuj xiwc'ojlal.

⁸ Tzin tew 'aych Mamin Jehová, to a 'aych tzwaln in b'a.

⁹ ¿Tas to a ganar wet'oc, q'uinloc tzin chami, tzlajw cha, tzin mucxi? Ax in poccal ¿tom tztac' to ach sb'itnani? ¿Tom tztac' to yaln wach' paxti 'aych yuj tas wach' tza b'o'o?

¹⁰ 'Ab' wal tas tzwala, 'o'ch cab' wal a c'ojl 'ayin, colwjan̈ wet'oc.

¹¹ Ach in Diosal, a 'in yailal xa meltztej 'och in tzaljc'ojlaloc; 'ix ej can 'el in cusc'ojlal, ax tzaljc'ojlal 'ix a'cn 'och 'ayin.

¹² Ma'oj stac' to sictac 'oj waji. 'Oj ach in b'itnoc, ax waln wach' paxti 'aych 'a smasnil tiempo.