Salmos 29 - Chuj San Sebastian Bible

SALMO 29 A yipl yol sjaj Jehová

Sb'it David jun tic

¹ Ex ángel 'a satcha'an̈, ¡Alc wach' paxti 'a Jehová! ¡Alc wach' paxti 'a sb'i! Yujto tztac' yuj smasnil.

² ¡Alc wach' paxti 'a Jehová! yujto smoj ton wal sb'inaxi. 'A'c 'emmquilal 'a scajnub' to wach' yilxi.

³ Tz'ab'x yol sjaj Jehová 'a yib'n̈ a mar; a jun Dios to b'inab'il, a tz'a'n c'an̈ c'u 'a yib'n̈ a niwc mar.

⁴ Caw wal 'ay yip yol sjaj Jehová, caw tzsat qui c'ojlec cab'ni.

⁵ Tzlo'chj te c'ute' yuj yol sjaj Jehová, c'uxn tzlo'chj te c'ute 'a lum Líbano yu'uj.

⁶ Tzya'n 'ib'xoc eb' lum jolmctac witzl yic lum Líbano yet' eb' lum yic Sirión. 'Icha to tzb'atj chan̈ eb' lum 'icha no quelm wacax.

⁷ A yic tz'awj Jehová, caw tz'elt raya 'a yol sti'.

⁸ A yol sjaj, a tz'a'n 'ib'xoc eb' lum cusltac lu'um; a tz'a'n 'ib'xoc lum cusltac lum 'a yol yic Cades.

⁹ A yol sjaj cha, caw tzicb'tan̈x te mach' yu'uj, man̈x 'a junc xil te te tzcan 'a eb' lum witz yu'uj. Ax 'a yatut, caw tzalx wach' paxti 'a yuj eb' 'anma smasnil.

¹⁰ A Jehová syajlil a niwc mar. Yajl yaj 'a jun 'ejmn̈ej.

¹¹ Tzyac' yip eb' schon̈ab', tzya'n syaxil yet' sjunc'ojlal 'a yib'n̈ eb'.