Salmos 28 - Chuj San Sebastian Bible

SALMO 28 A Jehová tzyab' tas tzalx 'a 'a

Sb'it David jun tic

¹ Mamin Jehová, cojxn̈ej 'aych 'aj 'oj wal in b'a, yujto 'icha to in n̈aq'uen aji. Man̈ e'l a sat 'ayin. Toto tzej 'el a sat 'ayin, to 'ixta', ax 'ijnoc am in 'atcn 'a scal eb' chamnc cha.

² 'Ab' wal tas tzwala yic tzin c'ann a colwal wet'oc, yic tzin mojn q'ue in c'ab' 'a atut.

³ Man̈ junc tzotj e'n 'ec' in q'uinl yet' eb' maysch'olnil sb'eyb'al. Wach' cob' tzyutj paxtinc sb'a eb', palta ax 'a snab'en eb', cojxn̈ej maysch'olnil nab'il yuj eb'.

⁴ B'eyc'ojlej eb', a tzyal tas tz'el sb'on eb'. A tzyal wal jantc smul eb', 'ixta tzotj a'n spac 'a eb'.

⁵ Smasnil tas tza b'o'o, caw may yel'ch 'a sat eb' maysch'olnil snab'en. Yuj cha, ach cab' tza satl eb', man̈x cab' b'a'n̈ tzpitzw chan̈ eb'.

⁶ ¡Alx cab' wach' paxti 'aych Mamin Jehová! Yujto 'ix ab' tas xwal 'a yic 'ayn 'ec' 'a scal in yailal.

⁷ Mamin Jehová ach 'aych 'och wipoc, 'aych 'och wen̈loc 'icha junc q'ue'en; ach wa'ch yipc in c'ojol, caw ach colwjn̈ej wet'oc. Yuj cha, caw wal tzin tzalji, 'oj in b'itnoc a b'i, ax waln yuj diosal 'ayach.

⁸ Ach 'aych 'och yipc sc'ojl eb' a chon̈ab', tzach colwj pax 'ayin, to sreyl in eb', to sic'b'iln 'el o'oj.

⁹ Mamin Jehová colwjan̈ 'ayn̈ an̈ a chon̈b' on̈ tic, 'ac' a yaxilal 'a quib'n̈ an̈ to ec xo caji. 'Ilt on̈ 'icha tzyac' junc 'ilm calnelu, tan̈wj on̈ 'a smasnil tiempo.