Salmos 27 - Chuj San Sebastian Bible

SALMO 27 A Jehová tz'a'n sacq'uinal

Sb'it David jun tic

¹ A Jehová tz'a'n sacq'uinl 'ayin, in Colmal paxi. A 'a tzin col in b'a, yuj cha, man̈x 'a in xiwc'ojlal. Man̈x 'a mach 'aj tzin xiwi.

² A eb' tzb'on maysch'olnil yet' eb' 'ajc'ojl yajch 'ayin, syam sb'a eb' 'a in patic, yic tzin satn 'el eb' snani, palta mun a eb' 'oj lajwc 'eli.

³ Wach'xam 'ay nan̈loc eb' soldado tz'och oyn 'ayin, mto tzcot eb' yac' owl wet'oc, palta matz in xiw xon jab'oc.

⁴ Cojn jun tas xin c'an 'a Jehová, atn jun chi tzin nib'j tzin bo'o': tzin nib'j 'aynn̈ej 'ec' 'a yatut 'a smasnil tiempo ya' sb'a pitzn in. Tzwa'n 'emmquilal 'a yatut, sec 'oj in tzalj wiln 'ochi.

⁵ Yujto a yic 'oj jawc yailal 'a wib'an̈, a 'oj in c'ub'n 'el 'a yatut. 'Icha to 'oj in yac' q'ue 'a sjolm junc niwquil tenam, yic tzin colchji.

⁶ 'Ixta 'oj waj in colchj can 'el 'a yol sc'ab' eb' 'ajc'ojl oyn 'och 'ayin, ax wa'n in xajmb'al 'a yatut Jehová. 'Oj in b'itn yet' in tzaljc'ojlal, ax waln wach' paxti 'a 'a.

⁷ Mamin Jehová 'ab' wal tas tzwala, tic wal tzin 'awj 'ayach. 'O'ch cab' wal a c'ojl 'ayin, tzin a ta'wni paxi.

⁸ Ach 'ix al 'ayn 'ixtic: Nitz 'ochl a b'a 'a in tz'ey, xa chi. Yuj cha, xin nani to tzin nitz 'ochch in b'a 'a a tz'ey.

⁹ Ach in Diosal, man̈ a c'ub'c 'el a b'a 'ayin. Man̈ in a patquilc can 'el yet' yowl a c'ojol, yujto cojxn̈ej ach in Colmal aji. Man̈ in actc can in ch'ocoj, colwjan̈ 'ayin.

¹⁰ Wach'xam tzin yactj can in mam in nun in ch'ocoj, palta ach 'oj in a tan̈woc.

¹¹ Mamin Jehová, ch'ox wal 'ayin tas tzwutj in tojlb'tzan in b'eyb'al. 'Ij in 'at wal 'a jun b'eyb'al caw tojol, smulyujoc eb' 'ajc'ojl yajch 'ayin.

¹² Man̈ in ac' 'a yol sc'ab' eb' 'ajc'ojl tzq'ue wan 'a in patic, tzya'n 'och eb' 'es 'a wib'an̈, tznib'j eb' tzin smil chamoc.

¹³ Tzwa'ch yipc in c'ojol to 'oj wil a wach'c'ojlal yic pitzn in to.

¹⁴ Ex wit 'anma'il, 'a'c pax 'och Jehová yipc e c'ojol. Te'n tzeyutj e b'a, man̈ e chab'c'ojloc e b'a. Cojxn̈ej wal Jehová tzeya'ch yipc e c'ojol.