Salmos 25 - Chuj San Sebastian Bible

SALMO 25 Tzqui c'an quilc scolwal Dios

Sb'it David jun tic

¹ Mamin Jehová, tic wal tzwac' in lesl 'ayach.

² Ach in Diosal tzach wa'ch wal yipc in c'ojol, man̈ a cha wac' in q'uixwloc, sec matz in stzetzj eb' 'ajc'ojl yajch 'ayin.

³ Wojtac, to a smasnil eb' tzach 'a'n 'och yipc sc'ojol, may xon b'a'n̈ 'oj 'el sq'uixwel eb'. 'El cab' sq'uixwel eb' ton̈j tzcomn meltzj 'och 'aych 'a nab'an̈ej.

⁴ Mamin Jehová, ch'ox wal a b'e 'ayin, a wal 'a a b'e cha, ata tzin ej b'eyoc.

⁵ Cuyn wal yet' a paxti caw yel, sec tzin b'ey 'a swach'il, yujto in Diosal ach, in Colmal pax aji. Smasnil tiempo cojn ach tzach wa'ch yipc in c'ojol.

⁶ Mamin Jehová, na cot a chamc'ojlal yet' a wach'c'ojlal 'ayin, atn jun tox xa ch'ox 'ilxoc.

⁷ Ax pax jun tzo'n̈ in mul jun, man̈ a na coti, man̈ a na cot jun tzo'n̈ in tu nab'enal 'ix in b'o 'a yic quelm in 'unin. Tzin a na cot yet' a chamc'ojlal, yet' a wach'c'ojlal.

⁸ Mamin Jehová caw wach' a nab'en, tojln̈ej ach paxi; yuj cha, tza tojlb'tzej sb'eyb'al eb' tzb'on maysch'olnil,

⁹ ax eb' 'emmquilal yeq'ui, tza ch'ox eb' 'a tojl b'eyb'al.

¹⁰ Yuj a chamc'ojlal yet' yuj yeln̈j tas tzala, yuj cha, tze'n b'ey eb' tzyiclni a trato yet' a checnb'il.

¹¹ Mamin Jehová, caw wal man̈x alchjb'enoc in maysch'olnilal, palta 'a'n niwnc'ojlal 'icha yaj aln cani.

¹² A mach 'ay el'ch 'a sat, 'oj a ch'ox 'a jun b'e wach' 'aj 'oj b'eyoc.

¹³ Caw 'oj q'ue'choc yet' tas 'ay 'a 'a, ax yin̈til, a 'oj cajnocn̈ej slu'um.

¹⁴ A eb' a wach'c'ojl a b'a yet'oc, atn eb' 'ay xiwc'ojlal 'ayach, tzac' pax 'el'choc a trato 'a eb'.

¹⁵ Q'ueln in 'ochn̈ej 'ayach, yujto ach tzin a col 'a tas 'ay smay.

¹⁶ 'Ilt in cot Mamin, 'o'ch cab' a c'ojl 'ayin, yujto a in ch'ocoj, caw 'ay in somc'ojlal.

¹⁷ Caw 'ix niwtj in yailal, coln 'el 'a in somc'ojlal tic.

¹⁸ 'Ilt cot in cusc'ojlal yet' in yailal, tza'n niwnc'ojlal 'ayn yuj smasnil in maysch'olnilal.

¹⁹ Caw wal tzniwtj eb' 'ajc'ojl yajch 'ayin, tznib'j eb' tzin smil chamoc.

²⁰ Tan̈wj in, man̈ in a cha chamoc, man̈ a cha wac' in q'uixwloc, yujto a 'aych tzin col in b'a.

²¹ Coln 'el yuj in wach' b'eyb'al yujto may in mul, cojn ach tzach wa'ch yipc in c'ojol.

²² Ach qui Diosal on̈, coln̈ 'el an̈ israel on̈ tic 'a yaln̈ smasnil qui yailal.