Salmos 24 - Chuj San Sebastian Bible

SALMO 24 Jun Rey niwn yel'chi

Sb'it David jun tic

¹ A Jehová a 'ay yic yolyib'n̈q'uinl tic yet' smasnil tas 'ay 'a sat, yet' smasnil eb' cajn 'a 'a.

² Yujto a xb'on 'ejm sb'achnub'al yaln̈ lum lum tic 'a yojl eb' a mar, yet' 'a eb' a niwc a'.

³ ¿Mach eb' tztac' sq'ue'ch 'a jun tzaln to yicn̈ej Jehová yaji? ¿Mach pax eb' tztac' yaj cajn 'a jun lugar to yic 'emmquilal yaji?

⁴ Atn eb' may tas tu tzb'o'o, eb' wach' pax tas tzna'a; eb' matz yac' 'emmquilal 'a jun tzo'n̈ comn dios; eb' matz yac' sti 'a junc tas man̈ yeloc.

⁵ A eb' cha, 'oj scha eb' syaxilal Jehová Dios, ax schan pax eb' scolnb'il 'a 'a.

⁶ Yowlal 'ixta 'oj sb'o eb' nab'il Dios yu'uj, atn eb' tznib'j tzc'och 'a yojltac qui Diosalec an̈ yin̈tl on̈c Jacob tic.

⁷ Jacw cab' jun tzo'n̈ puerta 'ayc' 'a jun 'ejmn̈ej. Jacw cab' 'a schapaq'uil, sec 'oj 'och jun Rey caw niwn yel'ch yet' stzictznial.

⁸ ¿Mach jun Rey caw niwn yel'ch cha? Atn Jehová caw 'ay spoder, caw jeln ya'n owal.

⁹ Jacw cab' jun tzo'n̈ puerta 'ayc' 'a jun 'ejmn̈ej. Jacw cab' schapaq'uil, sec 'oj 'och jun Rey caw niwn yel'ch yet' stzictznial.

¹⁰ ¿Mach jun Rey caw niwn yel'ch cha? Atn Jehová tzta'n̈j yuj smasnil, atn jun Rey tic caw niwn yel'chi.