Salmos 22 - Chuj San Sebastian Bible

SALMO 22 'Aw yic yailal*r* yet' b'it yic alj wach' paxti'

Sb'it David jun tic tzc'an junc mach tzjucb'tzan b'it

¹ Ach in Diosal, ach in Diosal, ¿tas yuj tzin actj can in ch'ocoj? ¿Tas yuj matz in a colo yic tz'el waw yuj in yailal?

² Sc'ual yac'wlil wawj 'ayach, palta matz in a ta'wej, may 'iljelal wawji.

³ Ach tic Mamin caw wal wach'chn̈ej, tzach b'inax 'a scal swach' paxti eb' wit israelal yic tzach sb'itnan eb'.

⁴ A eb' qui mam quichm on̈, ya'jnacch 'och eb' yipc sc'ojol, yuj cha, a coln can 'el eb'.

⁵ 'Ix yal sb'a eb' 'ayach, yuj cha, 'ix a coln can 'el eb'. Ach ya'ch wal eb' yipc sc'ojol, yuj cha, ma'ix 'el sq'uixwel eb'.

⁶ An xo tic, man̈x in 'anmac tzwab'i. Lajn in 'icha junc no a'ay. Caw tzetztac wilx 'a yol sat eb' 'anma', patcab'iln pax 'el yuj eb' wit 'anma'il.

⁷ A eb' tzin 'ilni ton̈j tzin sb'uch eb', tzin yetz'tan eb', tzyucn eb' sjolom, tzyaln eb' 'ixtic:

⁸ A jun tic a cob' Jehová a tzya'ch yipc sc'ojol; yuj cha, colx cab' 'el ticnec yu'uj. Toto caw yel nib'b'il yuj Dios, colx cab' yu'uj, xchi eb'.

⁹ Yel toni ach in ac' 'aljoc 'el 'a in nun, a yic in chuw 'a in nun cha, in ac' q'uib'oc.

¹⁰ Yictax mantzac in 'alji, 'ayn xon 'och 'a yol a c'ab'; yic 'ayn to 'ec' 'a yol sc'ojl in nun, in Diosal ach xoni.

¹¹ Man̈ e'l a b'a 'a in tz'ey, yujto 'ayn 'och 'a in yailal; may pax mach tzcolwj wet'oc.

¹² Tox 'ix 'och oynjoc eb' 'ajc'ojl 'ayin, 'icha wal no wacx caw ow 'a yol yic lum Basán, 'ixta 'eb'.

¹³ Tz'el yaw eb' 'icha no león caw ow, c'awn sti eb' tzcot eb' 'ayin.

¹⁴ 'Icha wal tz'aj a a stob'i, 'ixta tzin 'aji. Caw 'ix 'el wip. 'Ix yactn sb'a in b'aquil, ax in pixan 'ix 'ulb'x can 'at 'a yol in c'ojl 'icha no chab'ic'.

¹⁵ 'Icha wal junc lum tacn̈ texu, 'ixta wal x'aj stacj 'el yol in jaj, tox 'ix can tzayn wac' 'a yol in jom. In a'cn 'ejm 'a scal spoccal yet'l eb' chamnac.

¹⁶ 'Ay nan̈l eb' 'anma maysch'olnil, 'ix 'och oyn eb' 'ayn 'icha no tz'i', 'ix yoln eb' in c'ab' yet' pax woc.

¹⁷ Tztac' in b'isn smasnil in b'aquil. Ax eb' 'ajc'ojl cha, caw tzalj eb' in yiln 'ochi.

¹⁸ 'Ix spojc' eb' in pichl 'a 'a, xya'n 'och eb' b'ul 'a yib'an̈.

¹⁹ Mamin Jehová man̈ ach 'at 'a najat, caw yipc'ojlal aj wu'uj, cotn̈ mu'c wul in a colo'.

²⁰ Man̈ in a cha tzu'xoc cham yuj eb' maysch'olnil cha. Man̈ in ac' milxoc cham yuj eb' 'icha tz'i cha.

²¹ Coln 'el 'a yol sc'ab' jun tzo'n̈ eb' 'anma tznib'j tzin milni, eb' lajn 'icha no león c'awn sti', mto 'icha no simron wacx caw 'ay smay yet' sch'a'ac.

²² 'Oj walcn 'el ab'xil 'a scal eb' wit chon̈ab'; a yic 'ay syamnil eb', 'oj ach in b'itnoc 'a scal eb', ax waln 'ixtic:

²³ ¡Calc wach' paxti 'a Jehová! Toto 'ay yel'ch 'a qui satec, qui masnil an̈ yin̈tl on̈c can Jacob tic, qui'c chan̈ sb'i, ca'c 'emmquilal 'a 'a.

²⁴ Yujto a Jehová ma'ix spatquilj can 'el eb' 'ay syailal yet' eb' 'ay somc'ojlal. Man̈ ton̈joc 'ix yilcn 'och eb', ma'ix sc'ub'j pax 'el sb'a 'a eb'. A yic sc'ann eb' scolwal, yajn̈ej 'ix yab'ni, 'oj in chic 'a eb'.

²⁵ Ach in Diosal, a wal 'ajtil caw niwn yaj syamn sb'a eb' a chon̈ab', ata 'oj ach in b'itnoc. A 'a yojltac eb' tzach yiclni, ata 'oj wac' 'el'choc tas ta'wb'il wuj 'ayach.

²⁶ A eb' meb'a', 'oj wa eb' si'mb'il, caw wal 'oj b'ut'joc eb'. Ax eb' tznib'n a colwal, 'oj yal eb' wach' paxti 'ayach. Pitznn̈ej cab' eb' 'a jun 'ejmn̈ej.

²⁷ Mamin Jehová, smasnil jun tzo'n̈ niwc nacion̈, yet' yin̈tl junjn macn̈ 'anma 'a 'aj tzlajw c'och lum lum tic, 'oj a nax cot yuj eb'. 'Oj jawc eb' 'a ojltac, ax yem cumn eb' 'ayach,

²⁸ yujto Rey ach. Ach tzac' yajlil 'a yib'n̈ smasnil nacion̈ 'a yolyib'n̈q'uinl tic.

²⁹ Smasnil eb' rico 'ayc' 'a sat lum lum tic, 'oj wa eb', ax ya'n eb' 'emmquilal 'ayach. Smasnil 'anma', 'oj 'em pax cumn eb' 'a ojltac, yujto may junc on̈ mun quic qui b'a yet' qui tzatzl on̈, palta to chamlb'a caj qui masnil on̈.

³⁰ Ach Cajlil on̈, a eb' quin̈tl b'a'n̈ on̈, 'oj yac' 'ejm sb'a eb' 'ayach, 'oj alxoc 'el ab'xil yuj eb' 'a eb' 'anma tot 'oj 'aljoc.

³¹ A eb' 'oj 'aljoc 'a yic b'a'n̈ cha, 'oj alxoc yab' eb' a tojlal, yet' tas a b'ojnac.