Salmos 21 - Chuj San Sebastian Bible

SALMO 21 B'it yic tz'ajx ganar owal

Sb'it David jun tic tzc'an junc mach tzjucb'tzan b'it

¹ Mamin Jehová, a jun rey tic caw tzaljc'ojlal yaji, yujto ach 'ix ac' yip, 'ix 'a'n yac' ganar owal.

² 'Ix ac' 'el'choc tas tznib'ej, ma'ix a tenc' tas 'ix sc'ana.

³ Til wal yaxilal 'ix ac' 'a 'a, 'ix a'n q'ue jun corona to nab'a oro 'a sjolom.

⁴ 'Ix sc'an najtxb'oc sq'uinl 'ayach, 'ix a'n jun q'uinl 'ay 'a jun 'ejmn̈ej 'a 'a.

⁵ Caw wal niwn yel'ch winac, yujto 'ix ya' ganar yuj a colwal; caw wal b'inab'il yuj yopiso 'ix ac'a.

⁶ Caw 'ix ac' 'a yaxilal 'a yib'n̈ 'a smasnil tiempo; yuj cha, til wal stzaljc'ojlal 'a ojltac.

⁷ Mamin Jehová caw niwn el'chi. A 'a chamc'ojlal a 'aych yipc sc'ojl jun rey tic, yuj cha, may xon b'a'n̈ 'oj 'emoc.

⁸ Mamin rey, 'oj a yam cot smasnil eb' 'ajc'ojl yajch 'ayach. A yet' a wach' c'ab' 'oj a'ch syailal eb' matz ach nib'ni.

⁹ A yic 'oj a ch'oxn a b'a 'a scal eb', ax a satn can 'el eb', ata tza'ch eb' 'a junc jorna 'aych sc'aq'uil. Yuj yowl sc'ojl Jehová 'oj a satl eb' 'icha tz'aj stz'a junc tas yuj c'ac'.

¹⁰ 'Oj a satcn 'el yunnal eb' 'a sat lum lum tic, ax a satn can pax 'el yin̈tl eb' 'a scal eb' 'anma'.

¹¹ Wach'xam tznib'j eb' tzach yixtej, tzsayn wal eb' tas tzach 'aj 'ejmi, palta matz tac' xon yuj eb'.

¹² A yic tza tojlb'tzan 'och a jul-lab' 'a eb', tza xib'tn can 'at eb'.

¹³ Mamin Jehová tztac' oj smasnil, 'oj ach qui b'itnoc on̈, yujto caw niwn a poder, tzcaln pax wach' paxti 'ayach.