Salmos 20 - Chuj San Sebastian Bible

SALMO 20 Lesl yuj yajx ganar owal

Sb'it David jun tic tzc'an junc mach tzjucb'tzan b'it

¹ Mamin rey, yab' cab' Jehová a lesal yic 'aych 'och 'a somc'ojlal; a cab' qui Diosal an̈ yin̈tl on̈ Jacob tic tzach colni.

² A 'a scajnub' 'a Sión, ata cab' tzya' cot scolwal 'ayach,

³ sna cab' cot smasnil ofrenda, scha cab' sc'ojl a xajmb'al tzac' tz'a'oc.

⁴ Ya' cab' 'el'choc smasnil tas tza nib'ej, scha cab' pax sc'ojl a b'on smasnil tas tza nalb'ej a b'oni.

⁵ 'Oj qui tzalji yic 'oj 'ejmc eb' 'ajc'ojl o'oj, ax qui'n chan̈ qui bandera 'a sb'i qui Diosal. Ya' cab' Jehová smasnil tas tza c'an 'a 'a, xchi eb' chon̈ab'.

⁶ A ticnec xwojquej 'eli, to a Jehová tzcolwj wet' an reyn sic'b'iln 'el yuj tic. A 'a satcha'an̈ ata 'oj ta'wc cot 'ayin, yuj spoder ax wa'n ganar jun tzo'n̈ niwc owal.

^7-8 'Ay jun tzo'n̈ eb', a scaruaje eb' yet' schej eb' yic owal a tzya'ch eb' yipc sc'ojol. A eb' cha, tz'el yip yoc eb', tztelw can 'ejm eb'. Palta an̈ec xo pax tic, a Jehová qui Diosalec, a tzca'c 'och yipc qui c'ojol, yuj cha, te'tec' cajec, lin̈n on̈c cha'an̈, xchi win rey cha.

⁹ Xyaln pax eb' chon̈b' chi 'ixtic: Mamin Jehová, colwjan̈ yet' jun qui reyl tic on̈, ta'wj on̈ 'a yic tzcaln qui b'a 'ayach, xchi eb'.