Salmos 19 - Chuj San Sebastian Bible

SALMO 19 Niwn yel'ch Dios yuj tas sb'ojnac

Sb'it David jun tic tzc'an junc mach tzjucb'tzan b'it

¹ A satcha'an̈ yet' smasnil tas 'ay 'a 'a, a tzch'oxn 'eli to niwn yel'ch Dios; a tzch'oxn pax 'eli tas yilx smunljel sb'ojnac.

² Junjn c'u, junjn 'ac'wal tzch'oxn 'el satchan̈ sjelnal Dios.

³ Wach'xam may junc paxti tz'ab'xi, may junc 'aw tz'ab'x yochi,

⁴ palta c'uxn tzpucb't yab'xil 'a smasnil chon̈ab', masnto tzc'och 'a 'aj tzlajw c'och yolyib'n̈q'uinl tic. A 'a satcha'an̈, ata b'ob'il can 'och c'u yu'uj.

⁵ A jun c'u cha, lajn 'icha junc quelm tot nupnac tz'elt 'a yol scuarto, lajn pax 'icha junc winc caw 'ay yip, caw tzalj s'at yac' carela.

⁶ A jun c'u cha, tzq'uel 'a yib'cha'an̈, tzlajw cha, tz'ejm can pax 'a junx yib'cha'an̈. May wal junc tas tztac' scoln sb'a 'a sc'aq'uil.

A sley Dios

⁷ A sley Jehová may wal jac spaltail, yujto caw tz'a'tb'i qui nab'enec yu'uj. A schecnb'il caw yel, tzyac' sjelnal eb' may xon jac tas tztac' yu'uj.

⁸ A tas tzyala caw wach'n̈j smasnil, yujto tzyij cot tzaljc'ojlal 'a qui pixnec. A sley caw tojln̈ej yaji, tzjaw qui nab'enec yu'uj.

⁹ A 'emmquilal 'a Jehová, caw wach' tz'el'chi, 'ayc'n̈ej 'a smasnil tiempo. A sley Jehová caw tojln̈ej smasnil, yeln̈j pax tas tzyala.

¹⁰ Yel xo wal caw nib'jub'tac 'a yib'n̈ q'uen oro caw wach'. Yel xo wal caw chi' 'a yib'n̈ no yal chab' tzat 'elt 'a sc'ate'.

¹¹ A tzon̈ tennec 'och wan 'a maysch'olnil; toto yiclum tzcutjec qui b'a 'a 'a, 'oj yac' pax spac 'ayn̈ec.

¹² May wal junc on̈ tztac' quilnec cot qui b'a yuj qui paltail. Ach in Diosal, coln 'el 'a jun tzo'n̈ xo in paltail matz nachj cot wu'uj.

¹³ Man̈ in a cha wa'ch in b'a 'a scal maysch'olnil, man̈ in a cha 'ajxoc mandar yu'uj, sec matz 'och in mul 'ayach. Toto 'ixta', may in paltail 'a a sat.

¹⁴ Mamin Jehová chab'il cab' in paxti', yet' in nab'en o'oj. In Colmal aji, o'oj colchjnacn xo ticnec.