Salmos 17 - Chuj San Sebastian Bible

SALMO 17 Tzc'anx swach'c'ojlal Dios

Slesl David jun tic

¹ Mamin Jehová 'ab' wal tas tzwal 'ayach, 'ochn̈ wal q'ueln 'ayin, yic tzwaln in b'a 'ayach. Maclj wal ab' in lesal, yujto man̈ in c'ayncoc wa'n 'es.

² Ach tztac' alni to may in mul, yujto caw ojtac to caw tojl in nab'en.

³ Ach tic Mamin, caw ojtac tas 'ayc' 'a in nab'en. 'A junjn 'ac'wal tzwul in a b'eyc'ojlani, tzin a'n prowal, palta may in mul tz'ilchj o'oj. May 'aj 'ix wal jun tzo'n̈ paxti to man̈ smojc walni.

⁴ Xwij 'el in b'a 'a sb'eyb'al eb' tzcomn meltzj 'och 'a yit 'anma'il. Tzin yiclj wal 'icha yaj aln cani.

⁵ Caw te'nn̈ej xwutj in yiclni a paxti', may xon 'aj in 'el 'a a tz'ey.

⁶ Ach in Diosal tzin tew wal 'ayach, yujto wojtac to tzab' tas tzwala. Mamin, 'a' cot a chicn 'a tas tzwala.

⁷ Ch'ox wal a chamc'ojlal to caw satjub'tac yilx 'ayin, yujto ach tza col eb' 'anma tzsayn 'ec' a colwal yuj eb' 'ajc'ojl yajch 'a 'a.

⁸ 'Icha wal tzyutj junc mach sya'iln sc'ul yol sat, 'ixta tzin otej. C'ub'j in 'el yet' a poder, 'icha tzyutj no caxtiln̈ smoyn yune'.

⁹ Coln 'el 'a eb' tu snab'en tzin 'ixtni, yet' 'a eb' 'ajc'ojl tzin sayn 'eq'ui yic tzin smiln cham eb'.

¹⁰ Yujto matz 'o'ch sc'ojl eb' 'a yit 'anma'il, niwc winc tzyutj paxtinc sb'a eb'.

¹¹ Caw oyn xo 'och eb' 'ayin, tan̈b'il in telw 'ejm yuj eb'.

¹² Lajn eb' 'icha no león lachn 'ejmi yic tz'elt jucnjoc syam schib'ej.

¹³ Mamin Jehová cotan̈, mac sjaw eb' 'ajc'ojl yajch 'ayin, 'ac' telwc 'ejm eb'. Coln 'el yet' a poder 'a yol sc'ab' eb' maysch'olnil snab'en.

¹⁴ Coln 'el 'a yol sc'ab' eb' 'anma cojn tas 'ay 'a yolyib'n̈q'uinl tic 'aych yipc sc'ojol. 'A' cot yailal 'a yib'n̈ eb', atn jun yailal to yic xon eb' yaji, yamchj c'och cab' yunnal eb' yet' yixchicn eb'.

¹⁵ Palta an xo tic, yujto tojl in nab'en, 'oj ach wil yet' in sat; man̈x 'a tas 'oj in na', yic 'oj in pitzw pax chan̈ 'a ojltac.