Salmos 150 - Chuj San Sebastian Bible

SALMO 150 Smoj sb'itnax b'it 'a Dios

¹ ¡Alx cab' wach' paxti 'a Jehová! B'itn coyc 'a Dios yic 'ayn̈ec 'ec' 'a scajnub'. B'itn coyc 'a 'a, yujto niwn yel'ch 'a satcha'an̈.

² B'itn coyc yuj satjub'tacl yilx tas b'ob'il yu'uj. B'itn coyc 'a 'a, yujto may b'a'n̈ tzlajw sb'inaxi.

³ B'itn coyc yet' trompeta, b'itn coyc yet' arpa, mto yet' salterio.

⁴ Tzon̈ q'uec b'atnjoc qui b'itn yet' pandero. B'itn coyc yet' flauta, mto yet' jun tzo'n̈ yamc'ab' ch'an̈ 'aych 'a 'a.

⁵ B'itn coyc yet' q'uen platillo tzsil-li sjaj. B'itn coyc yet' q'uen platillo c'uyyi s'at sjaj 'a najat.

⁶ Smasnil cab' tas tzyij yic', b'itn cab' 'a Jehová. ¡Alx cab' wach' paxti 'a Jehová!