Salmos 149 - Chuj San Sebastian Bible

SALMO 149 Tz'ajx snab'enoc eb' israel

¹ ¡Alx cab' wach' paxti 'a Jehová! Qui b'itquec 'ac' b'it 'a Jehová; an̈ec yic xo caji, qui b'itquec sb'i 'a 'aj yamn cajec.

² Ex wit israelal, tzaljan̈c yuj jun mach 'ijnac 'el yich sb'on qui chon̈b'ec tic,*f3* ex 'aj Sión tzaljan̈c yet' qui Reyal.

³ Tzon̈ laj q'uec b'atnjoc calnec qui wach' paxti 'a 'a, qui b'itquec yet' qui arpa yet' pax qui pandero.

⁴ Yujto a Jehová tzyij stzaljc'ojlal 'a quib'n̈ec an̈ schon̈b' on̈c tic, ax ya'n qui tzaljc'ojal an̈ 'emmquilal queq'ui, yujto a tzon̈ colnec.

⁵ An̈ yiclum tzcutjec qui b'a 'a 'a, tzalj coyec, yujto tzca'c ganar. A yic tzon̈ wayc can 'ejmi tzqui b'itnanec 'a tzaljc'ojlal.

⁶ B'itn coyc 'a Dios, ax qui c'ab' a yamjnac qui espada chab' ye,

⁷ sec a yet' 'oj ca'c qui pac 'a eb' chuc chon̈b'al, ax ca'nec can 'och syailal jun tzo'n̈ xo nacion̈.

⁸ Ax qui jalnec can eb' rey niwc yopiso yet' q'uen niwc cadena caw 'al,

⁹ sec 'ixta tz'aj yel'ch tas tz'ib'b'il can 'a yib'n̈ eb'. A jun tic, qui wach'loc qui masnil an̈ yic on̈c xo Dios. ¡Alx cab' wach' paxti 'a Jehová!