Salmos 148 - Chuj San Sebastian Bible

SALMO 148 A tas b'ob'il yuj Jehová*r* yal cab' wach' paxti 'a 'a

¹ ¡Alx cab' wach' paxti 'a Jehová! ¡Alx cab' wach' paxti 'a Jehová 'a schan̈il satcha'an̈!

² A eb' yángel Dios, atn smasnil eb' soldado yic satcha'an̈, yal cab' eb' wach' paxti 'a 'a.

³ A c'u, 'uj yet' smasnil c'anal, yal cab' eb' swach' paxti 'a Jehová.

⁴ A satcha'an̈ yet' a a 'ay 'a yib'n̈ satcha'an̈, yal cab' eb' wach' paxti 'a 'a.

⁵ Yal cab' eb' swach' paxti 'a Jehová, yujto a 'ix alni yic xb'o eb'.

⁶ A 'ix b'on smasnil jun tzo'n̈ tic, sec 'ayc' 'a smasnil tiempo. 'Ix yaln can paxi, to may tz'aj sjelmj eb'.

⁷ A smasnil tas 'ay 'a sat lum tic, yal cab' swach' paxti 'a Jehová, no niwc noc' 'ay 'a yojl a mar yet' 'a xab'l yich a',

⁸ raya, sacb'at, sacb'acum, 'asun, yet' 'ic'n̈ab', yiclumn̈ej cab' eb' 'a tas tzyala,

⁹ lum niwc witz, lum tzalan, eb' te c'ute' yet' eb' te te tzsatni,

¹⁰ no cajb'en noc', no calte'al noc', no ch'ic yet' no tzjuc sb'a 'a sat lu'um,

¹¹ eb' sreyl yolyib'n̈q'uinl tic, smasnil eb' chon̈ab', smasnil eb' niwc yajal, eb' juez tz'a'n mandar yolyib'n̈q'uinl tic,

¹² eb' winac, eb' 'ix 'ix, eb' 'unin yet' eb' 'ichmtac 'anma'.

¹³ Smasnil eb' tic, yal cab' eb' swach' paxti 'a Jehová, yujto cojn ton niwn yel'chi, a stzictznial, 'ayc'n̈ej 'a sat lum tic yet' 'a satcha'an̈.

¹⁴ A 'ix 'a'n qui jelnal an̈ schon̈b' on̈c tic, sec tzon̈ b'inaxec an̈ yiclum on̈c tic, yujto an̈ yin̈tl on̈c Israel tic, an̈ on̈ yijec 'ochch 'a stz'ey. ¡Alx cab' wach' paxti 'a Jehová!