Salmos 147 - Chuj San Sebastian Bible

SALMO 147 A swach'c'ojlal Dios 'a chon̈b' Israel

¹ ¡Alx cab' wach' paxti 'a Jehová! Til wal sja'l sb'itnax b'it 'a qui Diosalec. Smoj wal sb'itnax yet' jun tzo'n̈ b'it caw wach'.

² A xb'on pax chan̈ Jerusalén jun 'ejm xo, xya'n qui yamc qui b'a an̈ israel on̈c tic, atn an̈ sactzicnac cajc can 'at 'a jun tzo'n̈ xo lugar.

³ A tz'a'n sniwnal sc'ojl eb' to 'icha lajwnac spixn tzyab'i, a tz'an̈tn slajwelal eb' cha.

⁴ A 'ojtnac jantc sb'isl c'anal, a tz'a'n 'och pax sb'i jun jun.

⁵ Caw niwn yel'ch Cajlilec, caw wal 'ay spoder, may slajb' sjelnal snab'en.

⁶ A tz'i'n chan̈ eb' 'anma 'emmquilal yeq'ui, a pax tz'i'n can 'ejm eb' maysch'olnil snab'en.

⁷ Qui b'itnoquec Jehová yic tzca'nec yuj diosal 'a 'a, qui b'itnoquec b'it 'a qui Diosalec yet' arpa.

⁸ A tz'a'n 'och 'asn 'a satcha'an̈, yic tzya'n n̈ab' 'a yib'n̈ lum lum tic. A tz'a'n pac' te c'ultc 'a eb' lum tzalctac.

⁹ A tz'a'n tas tzc'ux no noc', tzya'n pax tas tzc'ux e no cotc joj yic tz'el yaw e no'.

¹⁰ A 'a Jehová may yel'ch yip no chej mto yip junc 'anma 'a 'a, yic tzcoln sb'a 'a junc owal,

¹¹ palta 'a eb' yiclum tzyutj sb'a 'a 'a, eb' tzya'ch sc'ojl 'a schamc'ojlal yic tzcoln 'el eb', caw 'ay yel'ch eb' 'a 'a.

¹² Ex 'aj Jerusalén, b'itn coyc 'a Jehová. Ex 'aj Sión calc wach' paxti 'a qui Diosalec.

¹³ Yujto a x'a'n 'och yip yijl spuertail qui chon̈b'ec, xya'n pax syaxilal 'a yib'n̈ eb' cunnalec 'a yol qui chon̈b'ec tic.

¹⁴ A tz'a'n junc'ojlal a qui lugar 'aj 'ayn̈ec, tzya'n qui wa 'ixm trigo caw wach'.

¹⁵ Xya'n alxoc spaxti 'a sat lum lum tic, caw yajn̈ej x'el'ch jun tzo'n̈ spaxti cha.

¹⁶ A tz'a'n cot sacb'acm 'icha wal yilx sac lana, a tzma'n puc q'uen che'ew, 'icha xoj stan̈il c'ac' tz'ajcni.

¹⁷ A tz'a'n cot q'uen chew sacb'atil, ax sical q'ue'en, toc 'ay mach tztechj yu'uj.

¹⁸ A tz'a'n 'ulb'xoc q'uen chew cha, tzya'n cot 'ic' sec tzb'ey a a cha.

¹⁹ An̈ israel on̈c tic, yin̈tl on̈c can Jacob, 'ix yac' qui Diosalec cojcoquec 'el spaxti', sley yet' schecnb'il.

²⁰ Man̈ 'ichcta 'ix yutj jun tzo'n̈ xo nacion̈, yuj cha, man̈ yojcoc eb' jun tzo'n̈ sley cha. ¡Alx cab' wach' paxti 'a Jehová!