Salmos 146 - Chuj San Sebastian Bible

SALMO 146 Alj wach' paxti yuj sb'ob'en Dios

¹ ¡Alx cab' wach' paxti 'a Jehová! Caw wal 'oj wal in wach' paxti 'a 'a.

² 'Oj wal in wach' paxti 'a Jehová ya' sb'a pitzn in. 'Oj in b'itnoc in Diosal ya' sb'a 'aynto 'ec' 'a sat lum lum tic.

³ Man̈ eya'ch eb' niwc yajl yipc e c'ojol, yujto 'anman̈ej eb', matz tac' scolwj eb' 'ayex,

⁴ yujto a yic tzcham eb', tz'ochx can eb' poccal. A 'a jun c'u cha, ata tzlajw can pax smasnil tas tznib'j eb' sb'o'.

⁵ Wach' yic eb' tzchan scolwal sDiosal Jacob, atn eb' tzya'ch sc'ojl 'a Jehová qui Diosalec.

⁶ A b'ojnac satcha'an̈, lum lu'um, a mar yet' smasnil tas 'ay 'a junjn c'aj. Caw wal tzyac' 'el'choc tas tzyala.

⁷ A tzb'on yaj eb' tz'ixtxi, a tz'a'n pax tas tzc'ux eb' caw 'ay swejel. Tzcoln 'elt eb' 'icha preso yaji.

⁸ A Jehová a tz'a'n jacwc sat eb' matz tac' xon yilni. A tzsi'n chan̈ eb' 'icha to telwnac 'ejmi. 'Ay schamc'ojlal 'a eb' 'anma tojl snab'en.

⁹ A tztan̈wni eb' 'anma chuc schon̈ab', a tz'a'n servil eb' meb'a 'unn chamnc smam yet' eb' 'ix 'ix chamnc yichmil, palta a tz'a'n pax somchjoc 'el eb' maysch'olnil sb'eyb'al.

¹⁰ Ex 'aj Sión, a Jehová 'oj yac' Yajlil 'a smasnil tiempo. A qui Diosalec, Rey 'a jun 'ejmn̈ej. ¡Alx cab' wach' paxti 'a Jehová!