Salmos 145 - Chuj San Sebastian Bible

SALMO 145 Alj yuj diosal 'a Dios

Sb'it David jun tic yic tzyaln wach' paxti 'a Dios

¹ Ach in Diosal, 'oj wal-li to niwn ton wal el'chi, Reych paxi, 'oj wal wach' paxti 'ayach.

² 'A junjn c'u 'oj wal wach' paxti 'ayach, 'oj ach in b'itnoc 'a smasnil tiempo.

³ Mamin Jehová, caw wal niwn yel'ch a b'i, yuj cha, smoj wal a b'itnaxi; a 'a b'inab'ilal, man̈ alchjb'enoc.

⁴ A eb' mamb'il, 'oj laj yalcn eb' 'a eb' yunnal b'aq'uin̈, chajtlto 'ay tas b'ob'il o'oj, ax laj yaln eb' yab'xil a b'ob'en cha.

⁵ 'Oj alxoc 'el yab'xil a poder yet' a tzictznial, ax walb'tan̈n a b'ob'en to satjub'tac yilxi.

⁶ 'Oj yal eb' 'anma yuj tas b'ob'il o'oj, yujto caw tztac' o'oj, 'oj wal-li to caw niwn el'chi.

⁷ 'Oj alxoc 'el yab'xil a wach'c'ojlal to caw niwan, caw 'ip 'oj alxoc 'eli to caw tojl a nab'en.

⁸ Mamin Jehová, caw wal wach' a nab'en, tz'o'ch pax a c'ojol. Man̈ comnoc tzcot owal, yujto 'ay a chamc'ojlal.

⁹ Caw wal wach'ch 'a yib'n̈ smasnil, caw 'ay a chamc'ojlal 'a yib'n̈ tas b'ob'il o'oj.

¹⁰ A tas b'ob'il oj cha, 'oj yal eb' swach' paxti 'ayach. A eb' 'anma ec xo yaji, 'oj ach sb'inoc eb' smasnil.

¹¹ 'Oj alxoc 'eli to caw wach' a'n Yajlil, ax yalxi, to caw 'ay a poder.

¹² 'Ixta 'oj yutc eb' 'anma yab'ni to til wal tas satjub'tac b'ob'il o'oj, to caw niwn el'ch yet' opiso.

¹³ A opiso cha, 'ayc'n̈ej 'a jun 'ejmn̈ej, Yajl 'ach 'a smasnil tiempo. Tzac' 'el'choc tas tzala, 'ay a chamc'ojlal 'a smasnil tas b'ob'il o'oj.

¹⁴ Mamin Jehová, ach yamjnac eb' 'ijn tztelw 'ejmi, ach tza quetz chan̈ eb' man̈x 'a yip.

¹⁵ Tan̈b'il yuj smasnil 'anma', janc' tzac' tas tzc'ux eb' 'a 'icha yorail.

¹⁶ 'Ela ach 'a smasnil tas to tzwa'i, ach tzac' tas tzc'ux eb' sec pitzn eb'.

¹⁷ Mamin Jehová, caw wal tojl a b'eyb'al, 'ay a chamc'ojlal 'a smasnil tas b'ob'il o'oj.

¹⁸ A eb' tzyal sb'a 'aych 'a smasnil sc'ojol, caw la'n aj 'a stz'ey eb'.

¹⁹ A eb' yiclum 'ayach, tzac' tas tznib'j eb'. A yic tzc'ann eb' a colwal, yajn̈j cha, tzach colwj 'a eb'.

²⁰ Mamin Jehová, tza col smasnil eb' 'ay schamc'ojlal 'ayach, palta ax eb' maysch'olnil snab'en, ach tza satl eb'.

²¹ Tzach in b'itnej wal Mamin. Smasnil tas b'ob'il o'oj, yal cab' swach' paxti 'ayach, ticnec yet' 'a smasnil tiempo.