Salmos 144 - Chuj San Sebastian Bible

SALMO 144 Swach' paxti jun win rey 'a Dios

Sb'it David jun tic

¹ ¡Alx cab' wach' paxti 'a Jehová, yujto a 'aj tzin col in b'a! A tzin cuyni, tzya'n in jelnal sec tztechj wa'n owal.

² In wach'c'ojl yaji, a 'aych wen̈loc, a 'aych wipoc, a colwjum yaj 'ayin; a tzin c'ub'n 'eli, a tzwa'ch yipc in c'ojol. A pax tz'a'n 'och jun tzo'n̈ chon̈b' 'a yaln̈ in checnb'il.

³ Mamin Jehová, ¿tas wal quel'ch an̈ 'anman̈ tic 'ayach, yuj cha, tzon̈ a nani? ¿Tas wal qui wach'il, yuj cha, ya'ilb'iln̈ o'oj?

⁴ An̈ 'anman̈ tic on̈, lajn on̈ wal 'icha qui'n quic' jun 'ejmoc, 'ixta quec' on̈, ax qui q'uinl tic on̈, lajn wal yec' 'icha wewen.

⁵ Mamin, jacw cab' satcha'an̈, tzlajw cha, tzach 'emta. 'Emn̈ wul 'a eb' lum jolmctac witz, ax sq'ue wan stab'l eb' lum o'oj.

⁶ Jul cot a jul-lab', atn raya, sec 'oj somchjoc eb' 'ajc'ojl yajch 'ayach, ax s'at eb' 'eloc.

⁷ 'A' cot a c'ab' 'a satcha'an̈, tzin a coln 'a jun 'icha mar tic, atn eb' chuc chon̈b'al 'ajc'ojl yajch 'ayin,

⁸ eb' tzaln tas man̈ yeloc, eb' tzyac' sti' yic tzya'n eb' 'es.

⁹ Ach in Diosal, 'oj in b'itnoc jun 'ac' b'it 'ayach; 'oj in b'itn yet' in salterio.

^10-11 Ach wal tzac' sjelnal eb' rey, yic tzya'n ganar eb' owal. Ach in a col an a checb' David in tic 'a q'uen espada tzmilwji. Coln 'a yol sc'ab' eb' chuc chon̈b'al, atn eb' tzlaj aln junc tas man̈ yeloc, eb' tzya'cn sti 'a junc tas yic tzya'n 'es.

¹² A eb' cunnal on̈, q'uib' cab' eb' 'icha junc te 'awb'ente'. Ax eb' 'ix quisl on̈, lajn cab' eb' 'ix 'icha spiralil atut, atn jun tzo'n̈ wach' yilxi.

¹³ A qui c'un̈a on̈, b'ut'j cab' yet' sb'a'al, 'ay cab' tas wach' sc'uxx molb'il 'a yojol. Ax qui cajb'en noc' on̈, niwtj cab' sb'isl e no', smil-l xo cab' tz'aj e no 'a 'aj 'ay.

¹⁴ Ax e no qui wacx on̈, 'unewoc cab' e no smasnil. May cab' no ton̈j tz'ec' yune'. May cab' pax mach tzcomn 'el yaw 'a yol caye xib'tn sb'a yuj owal.

¹⁵ Caw wach' yic junc chon̈b' 'ixta yaji, caw wach' yic jun chon̈b' to a Jehová 'aych sDiosaloc.