Salmos 143 - Chuj San Sebastian Bible

SALMO 143 Mamin, tzach wa'ch yipc in c'ojol

Sb'it David jun tic

¹ Mamin Jehová, chaj ab' in lesl tic, maclj wal ab' tas tzwala. Tza pacn pax 'ayin, yujto tojl a nab'en, tz'el'chn̈ej tas tzala.

² Man̈ in a b'eyc'ojloc an a checb' in tic, yujto may junc 'anma tojl 'a ojltac.

³ A eb' 'ajc'ojl yajch 'ayin, caw wal tzin spech b'eyc'oc eb', in stec' 'ejm eb' 'a sat lu'um. In spechn can 'at eb' 'a scal q'uic'q'uinal, 'icha yaj eb' pecti chamnac.

⁴ Man̈x 'anmac yaj in nab'en tzwab'i, caw wal tzsomchj chan̈ in c'ojol.

⁵ Tzin nan cot tas b'ob'il oj 'a yic pecti', tzlaj in yamn 'och in b'eyc'ojlan jun tzo'n̈ tas a b'ojnac yet' a poder.

⁶ A 'aych tzin moj q'ue in c'ab', caw wal tzach in nib'j 'icha tzyac' lum tacn̈ lum yet' a a'.

⁷ Mamin Jehová ta'wj in muc'uc, yujto wan yel wip tzwab'i. Man̈ e'l a sat 'ayin, colwjan̈ wet'oc, sec man̈ lajnoc tzin 'ajcn 'icha eb' chamnac.

⁸ 'A junjn sq'uin̈b'ial tza'n wojcoc 'el a chamc'ojlal, yujto ach tzach wa'ch yipc in c'ojol. 'Ac' wojcoc 'eli tas wal smoj in b'oni, yujto a 'aych wan waln in b'a.

⁹ Coln 'a yol sc'ab' eb' 'ajc'ojl yajch 'ayin, yujto cojn 'aych wach' in c'ub'n 'el in b'a.

¹⁰ Cuyn 'a tas 'icha tza nib'ej, yujto in Diosal ach. Ax Espíritu wach', a cab' tzin quetzn b'ey 'a jun b'e caw wach'.

¹¹ Mamin Jehová man̈ in a cha chamoc, sec man̈ tuc a b'inaxi. Yujto caw tojl a nab'en, yuj cha, 'ij in 'elt 'a scal in somc'ojlal.

¹² Caw 'ay a chamc'ojlal 'ayin, yuj cha, sictac cab' tz'aj eb' 'ajc'ojl yajch 'ayin. Sat cab' 'el eb' smasnil o'oj, yujto a checb' waji.