Salmos 141 - Chuj San Sebastian Bible

SALMO 141 Mamin, a 'aych q'ueln in 'ochi

Sb'it David jun tic

¹ Mamin Jehová cotn muc'uc, 'ab' wal in jaj yic tzwaln in b'a 'ayach.

² Wach' cab' tz'aj sq'ue'ch in lesl 'aych Mamin, 'icha tz'aj sq'ue'ch stab'l incienso tz'a 'a ojltac. Ax in c'ab' mojb'il q'ue 'ayach, lajn cab' yilx 'a yol a sat 'icha junc ofrenda tz'ajx 'aych 'a yemc'ual.

³ Mamin, 'a'ch wal stan̈mal in ti', sec matz wal tas man̈ tojloc.

⁴ 'Ac' wi'l in nab'en 'a tas maysch'olnil, man̈ in a chaj 'at 'a scal b'eyb'al to maysch'olnil, yet' 'a tas man̈ wach'c tzc'ux eb' tzb'on maysch'olnil 'a sq'uin̈.

⁵ Palta q'uinloc a junc 'anma wach' snab'en tzin ma'n yet' tz'u'um, mto tzin stumej, a jun cha, caw wach' 'ayin. Yujto lajn 'icha junc perjuma tzlab'b'i tz'ajq'ue 'a in jolom. Palta tzin leslwin̈ej sec tz'och wan eb' maysch'olnil sb'on tas tu'.

⁶ Ax eb' yajl yaj 'a eb' tzb'on maysch'olnil cha, 'oj ecxoc can 'at eb' 'a sat pac'an, ax yiln cot sb'a eb' ta', to a tas 'ix wala caw yel.

⁷ A sb'acl eb', sactzicnac 'oj 'ajcn 'a stz'ey sti sjul-l eb' chamnc 'anma', b'ulctac xoj tz'ajcn 'icha lum lu'um.

⁸ Mamin Jehová, an̈j 'aych q'ueln in 'ochi, ach tzach wa'ch yipc in c'ojol, comnoc matz in ac' 'a yol sc'ab' chamel.

⁹ Coln 'el 'a jun tzo'n̈ ch'an̈ yal 'ay 'ejm 'a wojltac yuj eb' tzb'on maysch'olnil.

¹⁰ A eb' tzb'on maysch'olnil cha, can cab' eb' 'a jun tzo'n̈ sch'an̈ yal cha, an xo tic, wach'n̈j cab' weq'ui.