Salmos 139 - Chuj San Sebastian Bible

SALMO 139 A Dios 'ojtnac smasnil

Sb'it David jun tic tzc'anlb'ej junc mach tzjucb'tzan b'it

¹ Mamin Jehová ojc in wal si'mb'il, in a b'eyc'ojlej paxi.

² Ojc wali tas tz'el in b'oni, ojc paxi tas wanto in nani.

³ Ojtac tas weq'ui, tzin eln pax 'a yic tzin 'ilji, ojc wal yilx pax in b'eyb'al.

⁴ A yic mantzac wal xon junc paxti nab'il wu'uj, ach xo tic Mamin, ojc xo pax smasnil.

⁵ Oyn 'och a poder 'a in tz'ey, tzin a tan̈wni paxi.

⁶ Caw wal satjub'tac yilx a jelnal tic, matz nachj 'el xon wu'uj. Caw wal niwn yel'chi, ton̈j tzsat in c'ojl yu'uj.

⁷ ¿'Ajtil tz'at in c'ub'c 'el in b'a 'a Espíritu? ¿'Ajtil wach' tzin c'ub'j 'el in b'a 'a ojltac?

⁸ Q'uinloc cob' tzin 'at 'a satcha'an̈, a pax ta 'aych 'eq'ui; toto tzin 'em pax 'a xab'l yich lum lum tic, 'aych pax 'ec' ta'.

⁹ Wach'xam cob' tz'och pax in c'axil, yic tzin 'at 'a stojlal 'aj tzq'uel c'u, sec tzin can cajn 'a sc'axpil 'ec' sti a mar,

¹⁰ palta 'in 'aych 'ec' ta'. A 'a wach' c'ab' a tzin quetzn cha'an̈, tzin e'nb'eyoc.

¹¹ Q'uinloc tzwal 'ixtic: Sc'ub'quin cab' 'el q'uic'q'uinal, mto tz'och jun sacq'uinl tic q'uic'q'uinlal 'a in patic, xin chi.

¹² A jun q'uic'q'uinl cha, ma'oj stac' in sc'ub'n 'el 'ayach. A 'ac'wal, caw wal sacq'uinl yilx 'icha 'a c'ual. A q'uic'q'uinal yet' pax sacq'uinal, lajnn̈ej yilx eb' 'ayach.

¹³ Ach xa b'o smasnil tas 'ay 'a in niwnal, in a b'on pax 'a yol sc'ojl in nun.

¹⁴ Caw wal satjub'tac yilx tas b'ob'il o'oj. Yuj cha, tzwaln wach' paxti 'ayach. Caw tzsat in c'ojl wilni, palta 'ix wojquej 'el jun tzo'n̈ tic si'mb'il.

¹⁵ Man̈ c'ultacoc x'aj sb'o in niwnal 'a a sat. A yic mantzac in pitzw 'el 'a yolyib'n̈q'uinl tic, yic c'ultac to waj 'a yol sc'ojl in nun,

¹⁶ ojc xoni tas tz'aj sb'o cot in niwnal. Smasnil jun tzo'n̈ tic tz'ib'b'il eb' oj 'a ch'an̈ a libro. A yic mant 'a xon junc c'ul tzwila, checl xon yaji jantc in q'uinl o'oj.

¹⁷ Ach in Diosal, caw wal ya snachj 'el jun tzo'n̈ a nab'en tic wu'uj, man̈ b'ischjb'enoc eb'.

¹⁸ Toto cob' tzin yamch in b'isn nan̈loc eb', palta yel xo wal 'ec'b'al sb'isl eb' 'a yib'n̈ q'uen arena. Q'uinloc tztechj in b'isn eb', palta an̈ja 'ayn to 'ec' 'a ojltac in chan a wach'c'ojlal.

¹⁹ Ach in Diosal, mil cham eb' tzb'on maysch'olnil, ax eb' milm cham 'anma', najt cab' tzej can 'el eb' 'a in tz'ey,

²⁰ yujto maysch'olnil tas tzyal eb' 'a a patquil, tzlaj comn 'och eb' 'ajc'ojlal 'ayach.

²¹ Mamin Jehová, 'in ojtac to tzin chac in b'a yet' eb' tzach chacn 'eli yet' eb' 'ajc'ojl yajch 'ayach.

²² Caw wal tzin chacl eb'. 'In ojtac to 'ajc'ojl pax yajch eb' 'ayin.

²³ Ach in Diosal, maclj el in nab'en, tza'lni prowal tas yilx in nab'en tic.

²⁴ 'Ilto, toto a 'a b'eyb'al maysch'olnil 'aj wan in 'atcni, tztac' in a tojlb'tzan 'och 'a jun b'e 'ay 'a jun 'ejmn̈ej.