Salmos 136 - Chuj San Sebastian Bible

SALMO 136 A schamc'ojlal Dios 'a eb' israel

¹ ¡Alx cab' wach' paxti 'a Jehová, yujto caw wach' snab'en! A schamc'ojlal Dios 'ayn̈j 'a smasnil tiempo.

² Alx cab' wach' paxti 'a Dios, atn jun Dios niwn yel'ch 'a yib'n̈ eb' tzalx 'och diosal. A schamc'ojlal Dios 'ayn̈j 'a smasnil tiempo.

³ Alx cab' wach' paxti 'a Jehová, atn jun Yajl niwn yel'ch 'a yib'n̈ eb' yajal. A schamc'ojlal Dios 'ayn̈j 'a smasnil tiempo.

⁴ Cojn ton tzb'on tas satjub'tac yilxi. A schamc'ojlal Dios 'ayn̈j 'a smasnil tiempo.

⁵ A b'ojnac satchan̈ yet' sjelnal. A schamc'ojlal Dios 'ayn̈j 'a smasnil tiempo.

⁶ A xlich'n 'at lum lum 'a yib'n̈ a a'. A schamc'ojlal Dios 'ayn̈j 'a smasnil tiempo.

⁷ A b'ojnac c'u yet' 'uj. A schamc'ojlal Dios 'ayn̈j 'a smasnil tiempo.

⁸ A c'u tzyac' sacq'uinl 'a c'ual. A schamc'ojlal Dios 'ayn̈j 'a smasnil tiempo.

⁹ Ax 'uj yet' c'anal, tzyac' eb' sacq'uinl 'a 'ac'wal. A schamc'ojlal Dios 'ayn̈j 'a smasnil tiempo.

¹⁰ A xmiln cham eb' sb'ab'l 'unnal eb' 'anma 'a Egipto. A schamc'ojlal Dios 'ayn̈j 'a smasnil tiempo.

¹¹ A x'i'n 'elt eb' qui mam quichmec 'a Egipto. A schamc'ojlal Dios 'ayn̈j 'a smasnil tiempo.

¹² Yet' wal spoder xyi'n 'elt eb'. A schamc'ojlal Dios 'ayn̈j 'a smasnil tiempo.

¹³ A x'a'n spoj sb'a snan̈l a Chac Mar. A schamc'ojlal Dios 'ayn̈j 'a smasnil tiempo.

¹⁴ A x'i'n 'ec' eb' qui mam quichmec chi 'a spacl snan̈l a a'. A schamc'ojlal Dios 'ayn̈j 'a smasnil tiempo.

¹⁵ A 'ix 'a'n can 'at win faraón yet' eb' soldado 'a yich a Chac Mar. A schamc'ojlal Dios 'ayn̈j 'a smasnil tiempo.

¹⁶ 'A x'i'n b'ey eb' schon̈b' 'a lum cusltac lu'um. A schamc'ojlal Dios 'ayn̈j 'a smasnil tiempo.

¹⁷ A 'ix 'a'n cham eb' niwc rey. A schamc'ojlal Dios 'ayn̈j 'a smasnil tiempo.

¹⁸ A x'i'n 'ec' sq'uinl eb' rey caw 'ay sjelnal. A schamc'ojlal Dios 'ayn̈j 'a smasnil tiempo.

¹⁹ A xmiln cham win Sehón, atn win sreyl eb' amorreo. A schamc'ojlal Dios 'ayn̈j 'a smasnil tiempo.

²⁰ Smiln pax win Og, atn win sreyl eb' 'aj Basán. A schamc'ojlal Dios 'ayn̈j 'a smasnil tiempo.

²¹ A xpojn 'ec' lum slum eb' rey cha. A schamc'ojlal Dios 'ayn̈j 'a smasnil tiempo.

²² A x'a'n lum lum chi quicooquec an̈ yin̈tl on̈c Israel tic, atn win schecab'. A schamc'ojlal Dios 'ayn̈j 'a smasnil tiempo.

²³ A 'on̈ nanec coti, yic 'ayn̈ec 'ec' 'a qui yailal. A schamc'ojlal Dios 'ayn̈j 'a smasnil tiempo.

²⁴ A 'on̈ colnec 'a yol sc'ab' eb' 'ajc'ojl yajch 'ayn̈ec. A schamc'ojlal Dios 'ayn̈j 'a smasnil tiempo.

²⁵ Atn tz'a'n smasnil tas tzc'ux eb' 'anma', yet' no noc'. A schamc'ojlal Dios 'ayn̈j 'a smasnil tiempo.

²⁶ Alx cab' yuj diosal 'a Dios 'ay yic satcha'an̈. A schamc'ojlal Dios 'ayn̈j 'a smasnil tiempo.