Salmos 135 - Chuj San Sebastian Bible

SALMO 135 Niwn yel'ch tas b'ob'il yuj Dios

¹ ¡Alx cab' wach' paxti 'a Jehová! Ex schecb' Jehová, alc wach' paxti 'a 'a.

² Jantc ex 'ayx 'ec' 'a yatut Jehová, yet' ex 'ayx 'ec' 'a yamq'uil yatut qui Diosalec,

³ alc e wach' paxti 'a 'a, b'itnejec sb'i yujto wach' snab'en 'ayn̈ec.

⁴ A si'jnacn̈ 'el an̈ yin̈tl on̈c Jacob tic, sec tzon̈ 'ochc yico'oc.

⁵ Wojc wal si'mb'il to a Jehová Cajlilec, yel xo wal 'ec'b'al 'a yib'n̈ jun tzo'n̈ comn dios.

⁶ Smasnil tas tznib'j sb'o 'a satcha'an̈, 'a sat lum tic, 'a yol a mar yet' 'a xab'l yich a', tzb'on̈j yu'uj.

⁷ Tzyij cot 'asn 'a 'aj tzlajw c'och lum lum tic, tzyij cot letz'lo'om yic tzya'n n̈ab', tzjacn 'elt 'ic' 'a 'aj 'ay yet'ul.

⁸ A xmiln cham eb' sb'ab'l 'unnal junjn n̈al eb' 'aj Egipto, yet' pax sb'ab'l 'une scajb'en noc' eb'.

⁹ A wal 'a yol chon̈b' Egipto, ata 'ix sch'ox 'ilxoc spoder to satjub'tac yilxi, yic xya'n 'och syailal win sreyl Egipto chi yet' smasnil eb' 'aych yajlil yet'oc.

¹⁰ Til wal jun tzo'n̈ nacion̈ satl yu'uj, 'ix smiln cham jun tzo'n̈ eb' rey caw jelan:

¹¹ Atn win Sehón sreyl eb' amorreo, win Og sreyl pax eb' 'aj Basán, yet' pax smasnil eb' rey 'a yol yic lum Canaán.

¹² Ax lum slum eb' rey cha, 'ix ya'cn jun tzo'n̈ lum chi quicooquec an̈ yin̈tl on̈c Israel tic.

¹³ Mamin Jehová, a 'a b'inab'ilal may b'a'n̈ 'oj satli, 'oj a nax cot 'a smasnil tiempo.

¹⁴ 'Oj a b'oyaj eb' a chon̈b' tic, ax yo'ch pax a c'ojl 'a eb' a checab'.

¹⁵ A sdiosal eb' chuc chon̈b'al, 'anma b'ojnac yet' sc'ab', b'ob'il yet' plata yet' q'uen oro.

¹⁶ 'Ay cob' sti', palta matz tac' spaxtini; 'ay cob' yol sat, palta matz tac' yilni;

¹⁷ 'ay cob' schiquin, palta matz yab'i, matz yij xon jac yic'.

¹⁸ 'Icha wal jun tzo'n̈ yechl comn dios cha, 'ixta eb' tzb'on eb' yechl cha, yet' pax eb' tzya'ch sc'ojl 'a 'a.

¹⁹ Ex wit israelal, calc wach' paxti 'a Jehová; ex yin̈tl Aarón, alc wach' paxti 'a 'a.

²⁰ Ex yin̈tl Leví, alc wach' paxti 'a Jehová; jantc ex to tzlaj eyal e b'a 'a, alc wach' paxti 'a 'a.

²¹ ¡A 'a lum tzaln Sión a cab' ta tzalx wach' paxti 'a Jehová, atn jun cajn 'ec' 'a Jerusalén! ¡Alx cab' wach' paxti 'a Jehová!