Salmos 132 - Chuj San Sebastian Bible

SALMO 132 A spaxti Dios 'ac'b'il 'a David

B'it yic sc'ochx eb' israel 'a Jerusalén

^1-2 Mamin Jehová, ach 'aych 'och quipc an̈ yin̈tl on̈ Jacob tic, na cot David yet' smasnil syailal, na cot wal sti ya'jnac 'ayach yic yaln 'ixtic:

³ Ma'oj woch xon 'a yol watut, ma'oj wec' xon c'otn in way 'a sat in ch'at,

⁴ ma'oj in mutz' xon jac in sat, ma'oj in way xon jab'oc,

⁵ ya' sb'a mantzac in b'o scajnub' Jehová 'aj tz'aj cajan, atn jun mach tz'a'n yipl eb' yin̈tl Jacob, xchi.

⁶ A 'a Efrata, ata xcab' yab'xil te scaxail trato, yuj cha, 'ix 'at quilnoc te 'on̈, ax 'a yol yic Jáar ata x'ilchj te cuj on̈.

⁷ 'Och coyc 'a yol scajnub' Jehová, axta tzon̈ 'emc cumn 'a yojltac.

⁸ Mamin Jehová, cotn̈ mu'c yet' scaxail a trato tzch'oxn 'el a poder, tzach 'at yet' 'a jun lugar 'aj tzb'o et'l 'aj 'oj a cani.

⁹ Ax eb' ya'mal 'och qui ti 'aych on̈, sb'eylb'oc cab' eb' tojlal, an̈ xo a chon̈b' on̈ tic, 'el cab' caw yuj tzaljc'ojlal.

¹⁰ Yuj a chamc'ojlal 'a a checb' David, yuj cha, man̈ cab' e'l a sat 'a win rey sic'b'il 'el o'oj.

¹¹ Wal yel aljnac 'a David 'ixtic: Ma'oj in jel tas waljnac, a junc onnal a 'oj wa'cn 'och 'a a despacho.

¹² Toto yiclum tzyutj sb'a eb' onnal 'a in trato, yet' smasnil tas 'oj wal 'a eb', toto 'ixta', a junc eb' en̈tl 'oj 'ochx can a jelc 'a opiso, ax sb'ey jun 'opiso chi 'a yib'n̈ yunnal eb' b'aq'uin̈.

¹³ An Jehová in, an xin si'l lum tzaln Sión wico'oc, yujto ata tzin nib'j tzin 'aj cajan.

¹⁴ Atn wal 'a jun lugar chi 'aj 'oj in can cajan, 'oj in cann̈j ta 'a smasnil tiempo.

¹⁵ 'Oj wac' in yaxilal 'a yib'n̈ eb' 'anma', caw 'oj yac' sobra tas 'oj sc'ux eb'. A eb' meb'a 'a scal eb', 'oj b'ut'joc eb' si'mb'il.

¹⁶ Ax in coln pax eb' ya'mal 'och sti eb' 'anma 'ayin. A eb' yiclum tzyutj sb'a 'ayin, 'oj b'itn eb' yuj tzaljc'ojlal.

¹⁷ Ata 'oj wac' checljoc pax chan̈ junc en̈til, checl xo mach 'oj ya'x yajlil 'a yin̈tl win sic'b'il 'el wu'uj.

¹⁸ Ax eb' 'ajc'ojl yajch 'a 'a, 'oj 'el sq'uixwel eb', yujto 'oj wac' q'ue'ch 'a yopiso, xa chi can 'a 'a.