Salmos 126 - Chuj San Sebastian Bible

SALMO 126 Lesl yuj sjelmj snab'en Dios 'a yib'n̈ schon̈ab'

B'it yic sc'ochx eb' israel 'a Jerusalén

¹ A yic sjeln Jehová snab'en 'a yib'n̈ Sión yuj tas 'aych 'a yib'an̈, 'icha ton̈j on̈ waychniec xquila.

² Xlajw cha, 'ix ca'nec wal qui gana qui tzewji, 'ix 'el wal cawc qui b'itnec yuj tzaljc'ojlal; ax eb' chuc chon̈b'al, xlaj yal eb' 'ixtic: A Jehová, caw niwn swach'c'ojlal xyac' 'a eb', xchi eb'.

³ Yel toni, caw niwn swach'c'ojlal Jehová xyac' 'ayn̈ec, yuj cha, 'ayn̈ec 'ec' 'a tzaljc'ojlal.

⁴ Mamin Jehová, 'a'x a wach'c'ojlal 'a quib'n̈ on̈ 'icha xon caj 'a pecti 'on̈. 'Icha tz'aj syaxb' pax sat lum cusltac lum yuj n̈ab' 'a lum Neguev, 'ixta cab' tzon̈ otj on̈.

⁵ A eb' tz'aw yet' scusc'ojlal, ax yic 'oj smolnoc chan̈ eb' sat yawb'en cha, caw 'oj tzaljoc eb'.

⁶ Wach'xam caw tz'oc' eb' yic tzya'n 'ejm eb' yin̈t cha, palta ax yic tzpolw trigo eb', caw wal tzb'itn eb' 'a tzaljc'ojlal yic mec'b'ilx 'ixm trigo chi yuj eb'.