Salmos 125 - Chuj San Sebastian Bible

SALMO 125 A Dios tztan̈wni schon̈ab'

B'it yic sc'ochx eb' israel 'a Jerusalén

¹ A eb' tzya'ch wal sc'ojl 'a Jehová, lajn eb' 'icha lum tzaln Sión matz 'ib'x 'a yet'ul, junn̈j yet'l 'aj 'ayc' 'a smasnil tiempo.

² 'Icha wal yajch oyn eb' lum witz 'a stz'ey Jerusalén, 'ixta wal yajch Jehová 'a stz'ey eb' schon̈ab', ticnec yet' 'a smasnil tiempo.

³ A eb' rey maysch'olnil snab'en, man̈ comnoc 'oj yac' eb' yajlil 'a sat lum lum 'ac'b'il yuj Dios 'a eb' schon̈b' to tojl snab'en; toto ma'ay, a eb' 'anma tojl snab'en, 'oj scuy sb'a eb' a tas man̈ wach'oc.

⁴ Mamin Jehová, 'ac' a wach'c'ojlal 'a yib'n̈ eb' tojl snab'en yet' 'a eb' wach' sb'eyb'al.

⁵ Palta ax eb' tz'atcn 'a scal tu b'eyb'al, 'at cab' can eb' yet' eb' maysch'olnil sb'eyb'al chi 'a scal yailal. ¡'Ay cab' junc'ojlal 'a qui calc an̈ israel on̈c tic!