Salmos 122 - Chuj San Sebastian Bible

SALMO 122 Lesl yuj junc'ojlal 'a Jerusalén

A jun tic sb'it David yic sc'ochx eb' israel 'a Jerusalén

¹ Til wal sja'l xwab'i yic xyaln eb' 'ayn 'ixtic: Coyc 'a yatut Jehová, xchi eb'.

² Ax ticnec, 'ayn̈ xo 'ec' 'a yol chon̈b' Jerusalén tic.

³ A Jerusalén wach' yaj sb'o'i, junn̈j chon̈b'al yaji sec a 'a tic 'oj syam sb'a smasnil 'anma'.

⁴ A 'a jun chon̈b' tic 'oj jawc eb' schon̈b' Jehová, ax wul yalnc eb' swach' paxti 'a 'a, 'icha yutjnac yaln can 'a eb' quit israelalec 'a pecti'.

⁵ A 'a jun chon̈b' tic 'ay yatutal b'eyc'ojlal, atn 'a tic 'oj b'eyc'ojlwoc eb' yin̈tl rey David 'a stojlal.

⁶ Alc 'ixtic: 'Ay cab' junc'ojlal 'a chon̈b' Jerusalén, ax eb' cajn 'a jun chon̈b' tic, may cab' tas tzna eb'.

⁷ 'Ay cab' junc'ojlal 'a yol chon̈ab', may cab' tas tzna eb' soldado 'ayc' 'a scuartel.

⁸ Yuj eb' wit chon̈ab' yet' eb' in wach'c'ojol, yuj cha, ax waln 'ixtic: 'Ay cab' junc'ojlal 'a jun chon̈b' tic, xin chi.

⁹ Yuj in chamc'ojlal 'a yatut Jehová qui Diosalec, yuj cha, 'oj wac' 'ip in sayn 'ec' tas tz'aj yochx Jerusalén 'a wach'il.