Salmos 120 - Chuj San Sebastian Bible

SALMO 120 Lesl yuj tas 'ay smay

B'it yic sc'ochx eb' israel 'a Jerusalén

¹ A yic 'ayn 'och 'a in somc'ojlal, ax 'aych Mamin Jehová ata xwal in b'a, yuj cha, in a ta'wni.

² Mamin Jehová coln 'el 'a yol sc'ab' eb' 'a'm 'es 'a in patquil, eb' to tznan chan̈ junc paxti 'a nab'an̈ej.

³ Ex 'a'm 'es, 'in tzeyixtj paxti eb' quit 'anma'il, ¿tas tze na'a? ¿Tom ma'oj yac' Dios junc niwn yailal 'a eyib'an̈?

⁴ A tas 'oj jawc 'a eyib'an̈, atn yailal 'icha junc jul-lab' tzc'anx 'a owal, caw jay, tzn̈ilchj sc'a'l 'a ye cha.

⁵ An xo tic, caw 'oltaquin, ton̈j 'e'lb'a wec' jaye'oc c'u 'a lum Mésec, in can 'a scal eb' cajn 'ec' 'a lum Cedar.

⁶ Caw niwn tiempo in 'ec' cajn 'a scal eb' 'anma matz nib'n junc'ojlal.

⁷ A yic tzwaln 'a eb' yuj junc'ojlal cha, ax eb', a owl tznib'j eb'.