Salmos 12 - Chuj San Sebastian Bible

SALMO 12 Tzc'anx scolwal Dios yet' lesal

Sb'it David jun tic tzc'an junc mach tzjucb'tzan b'it yet' arpa

¹ Mamin Jehová coln̈ 'el on̈, yujto man̈x 'a mach te'n tzyutj sb'a 'ayach, man̈x 'a pax mach yiclum 'a qui cal an̈ 'anman̈ tic.

² Cojxn̈ej 'es tzlaj yal-lac eb' 'a junjn 'anma', tzlaj yixtn paxti sb'a eb' 'a chab'satil.

³ Mamin Jehová satcn 'el jun tzo'n̈ 'anma cha, atn eb' chab'sat yaji, yet' pax eb' niwc winc tzlaj yutc sb'a.

⁴ Atn eb' tzaln 'ixtic: Cojn toto tztac' qui paxtini, a qui ti 'oj qui colni. ¿Toc 'ay xon wal junc mach 'oj ste'wtzoc sb'a yoch cajliloc? xchi cob' eb'.

⁵ Mamin Jehová, ach tzal 'ixtic: Caw tz'ixtx eb' may jac tas tztac' yu'uj, a eb' meb'a', caw tz'el yaw eb' yab'n syail. Yuj cha, yowlal 'oj in colwj 'a eb' to tznib'n in colwal, xa chi.

⁶ A tas alb'il oj Mamin Jehová, tztac' ca'n 'och yipc qui c'ojl on̈, yujto lajn 'icha q'uen plata si'mb'il yaj stz'a'i, man̈x 'a jac slumal tzcan 'a 'a, uc 'ejm tz'ajx tz'a 'a yol jorna.

⁷ Mamin Jehová, ach tzon̈ a tan̈wj on̈, tzon̈ a coln pax 'a jun tzo'n̈ 'anma tic 'a smasnil tiempo.

⁸ A eb' tzlaj b'on maysch'olnil cha, tzanxn̈ej 'aj tzlaj sb'an̈ sb'a eb' yujto tzlaj tzalj eb' 'anma yet' tas maysch'olnil.