Salmos 119 - Chuj San Sebastian Bible

SALMO 119 Alj wach' paxti yuj sley Dios Jun

¹ Mamin Jehová, a eb' tojl sb'eyb'al 'a a sat, wach' yic eb', yujto tzb'eylb'ej eb' a cuynb'il.

² Wach' yic eb' tzyiclni tas tzala, yujto 'a smasnil sc'ojl eb', tzchan eb' yab'i',

³ atn eb' may jac maysch'olnil tzb'o'o, eb' to tzb'ey wal 'a stojlal.

⁴ Mamin, ach 'ix al 'a eb', to yowlal tz'acn tzb'eylb'ej eb' a checnb'il.

⁵ Comnoc wal te'n tzwutj in b'a, sec wach' tzwutj in yiclni a checnb'il tic.

⁶ Toto 'ixta', matz in q'uixwi yic tzin nan cot smasnil a checnb'il cha.

⁷ Yet' wal stojlal in nab'en, ax waln in wach' paxti 'ayach, yic tox xcuychj 'el a ley to tojl tic wu'uj.

⁸ Tzin nib'j in yiclc a checnb'il tic Mamin, palta man̈ in actc can in ch'ocoj.

Cha'ab'

⁹ ¿Tas wal smoj sb'on win quelem, sec tojl tzyutj win sb'eyb'al? Cojn to tzyiclj a paxti'.

¹⁰ 'A smasnil in c'ojol tzin 'och tza'n o'oj, yuj cha, man̈ in a cha wi'l in nab'en 'a a checnb'il.

¹¹ Tzin mol a paxti 'a in nab'en, sec matz 'och in mul 'ayach.

¹² Caw wach' a nab'en Mamin Jehová, cuyin sec 'oj stac' wojcan 'el a checnb'il tic.

¹³ Smasnil jun tzo'n̈ a ley alb'il can o'oj, 'oj wal-l eb' 'a scal in b'it.

¹⁴ Caw tzin tzalj in yiclni a checnb'il, yujto 'ec'b'al 'a yib'n̈ smasnil ricoal.

¹⁵ A 'a checnb'il tic, 'oj in na cot 'a junjn rato, ax wa'n 'och in nab'en in b'eylb'ani.

¹⁶ Caw tzin tzalj yet' jun tzo'n̈ a checnb'il tic. May wal b'a'n̈ 'oj sat in c'ojl 'a a paxti'.

'Oxe'

¹⁷ 'Ac' in q'uinl an a checb' in tic, sec wach' 'oj wutc in yiclni a paxti'.

¹⁸ Jac wal in sat, sec 'oj wojcoc 'el satjub'tacl tas tzyal a cuynb'il.

¹⁹ Ton̈j 'e'lb'a wec' 'a sat lum lum tic, 'ac' wojcoc 'el a checnb'il.

²⁰ 'A junjn rato tzin nib'n tzwojquej 'el tas tzyal a ley.

²¹ Ach xa tench wan eb' 'e'nc 'a yib'an̈, yet' eb' maysch'olnil snab'en, atn eb' xyij 'el snab'en 'a a checnb'il.

²² An tic 'ix wa'ch in nab'en 'a a checnb'il, yuj cha 'ij 'el snab'en eb' tzin patquiln can 'eli, yet' eb' tzin tzuntzni.

²³ Wach'xam a eb' yajal, tz'em oyn eb' smol aloc tas tzin yutej, palta an a checb' in tic, caw tzin na cot jun tzo'n̈ a checnb'il 'a junjn rato.

²⁴ Caw tzin tzalj in cuyn tas tzal tic, yujto a tz'a'n in nab'en.

Chan̈e'

²⁵ A wal tzwutj wab'ni, to wan xo in chami, palta 'ac' wal in q'uinl 'icha wal yaj aln 'a a paxti'.

²⁶ 'Ix wal 'ayach tas wal yilx in b'eyb'al, yuj cha, in a ta'wni. Ax ticnec, cuyn 'a jun tzo'n̈ a checnb'il tic.

²⁷ 'Ac' nachjc 'el wu'uj, tas wal tzwutj in b'eylb'an jun tzo'n̈ a checnb'il tic, sec 'oj in na cot satjub'tacl a nab'en.

²⁸ Caw tzlajw in pixn tzwab' yuj cusc'ojlal, palta ach xo tzac' ste'nal in nab'en, 'icha yaln a paxti'.

²⁹ 'Ij in 'el 'a jun b'eyb'al yic 'a'j 'es, yuj a wach'c'ojlal tzin a cuyn 'a a cuynb'il.

³⁰ 'Ix in sayn 'ec' jun b'e yic tojlal, ax a ley, a tzin nib'j wojcoc 'eli.

³¹ Mamin Jehová, 'ix wa'ch in nab'en 'a jun tzo'n̈ a checnb'il tic; man̈ a chach q'uixwc'ojlal 'ayin.

³² 'Oj wac' 'ip in b'eylb'an jun tzo'n̈ a checnb'il tic, yujto tzac' wal in tzaljc'ojlal.

O'e'

³³ Mamin Jehová, cuyn 'a jun b'eyb'al tzyal jun tzo'n̈ a checnb'il tic, yujto tzin nib'j in b'eylb'oc masnto 'a slajub'.

³⁴ 'Ac' in nab'en, sec wach' tzwutj in b'eylb'an jun cuynb'il tic; 'oj in yiclc 'a smasnil in c'ojol.

³⁵ 'Ij in 'at 'a jun b'eyb'al tzyal jun tzo'n̈ a checnb'il tic, yujto a 'a spatquil, ata tzjaw in tzaljc'ojlal.

³⁶ 'Ac' wojcoc 'eli, to a cab' a checnb'il tzin yiclej, palta man̈oc cab' ricoal tzin nib'j 'ochi.

³⁷ Man̈ in a cha 'och tza'n yuj jun tzo'n̈ comn dios; 'ac' in tzatzil, sec tzin b'eylb'ej tas tza nib'ej.

³⁸ A cab' 'ayn a checb' in tic, ata tzac' 'el'choc jun tzo'n̈ a paxti alb'il can oj 'a eb' to yiclum 'ayach.

³⁹ Yuj jun tzo'n̈ a ley caw wach', tu yaln eb' 'anma 'a in patic. Coln 'el 'a jun tzo'n̈ spaxti eb' cha, atn jun tzo'n̈ 'aj tzin xiwi.

⁴⁰ Caw tzin nib'j jun tzo'n̈ a checnb'il tic; 'ac' in q'uinal, yujto caw tojl a nab'en.

Waque'

⁴¹ Mamin Jehová, ch'ox wal a chamc'ojlal 'ayin, yet' pax a colwal, 'icha wal yaj aln can 'a a paxti'.

⁴² Toto tzac' 'el'choc jun tzo'n̈ a paxti 'aych yipc in c'ojl cha, to 'ixta', 'oj stac' wa'n spac 'a eb' tzb'uchwj 'ayin.

⁴³ May cab' b'a'n̈ tzcan waln jun tzo'n̈ a paxti to yel, yujto a jun tzo'n̈ a ley cha, a 'aych yipc in c'ojol.

⁴⁴ 'Oj in yiclc a cuynb'il chi 'a smasnil tiempo. Jun 'ejmn̈ej to tzwa'ch in nab'en 'a 'a,

⁴⁵ sec tzaljc'ojlal xoj tzin b'eyq'ui. Man̈x 'a tas tzin na'a, yujto xin yiclj a checnb'il.

⁴⁶ 'Oj wal jun tzo'n̈ tas tzal tic 'a yojltac eb' rey, ma'oj in q'uixw walni.

⁴⁷ Caw tzin chamc'ojlej a checnb'il, a pax 'a 'a, ata tzwij in tzaljc'ojlal.

⁴⁸ Tzin nib'j wal in chamc'ojloc jun tzo'n̈ a checnb'il tic, 'oj in na cot jun tzo'n̈ a ley tic.

Uque'

⁴⁹ Na cot jun tzo'n̈ a paxti a'jnac 'ayn an a checb' in tic, atn 'a eb' 'aj xwa'ch in nab'en.

⁵⁰ A jun tzo'n̈ a paxti tic, a eb' tz'a'n in q'uinal, a eb' tz'a'n sniwnal in c'ojol, yic 'ay in cusc'ojlal.

⁵¹ A eb' b'an̈quintac tzin laj sb'uch eb', til wal tzyutj eb' yaln 'ayin, palta man̈ yujoc cha, tzwij 'el in nab'en 'a a cuynb'il.

⁵² Mamin Jehová, xin na cot jun tzo'n̈ a ley 'a yic pecti', a 'a eb' ata xwij sniwnal in c'ojol.

⁵³ A eb' 'anma maysch'olnil sb'eyb'al, tzyactj can eb' a cuynb'il, yuj cha, caw tzcot wowl yuj eb'.

⁵⁴ A jun tzo'n̈ a checnb'il tic, a eb' xwa'ch in b'itc 'a tzann̈j 'aj 'ayn 'eq'ui.

⁵⁵ Mamin Jehová, 'a junjn 'ac'wal tzach in nan cot 'a 'aj tzin laj 'ec' cha, yujto tzin yiclj a cuynb'il.

⁵⁶ Caw 'ay in tzaljc'ojlal, yujto tzin yiclj smasnil a checnb'il cha.

Wajxque'

⁵⁷ Mamin Jehová, a tas 'ayc' 'ayin, ach toni; yuj cha, xwalni to 'oj in yiclc a paxti'.

⁵⁸ Wal 'a smasnil in c'ojol, 'ix waln in b'a 'ayach; 'ay cab' a chamc'ojlal 'ayin, 'icha yaln a paxti'.

⁵⁹ 'Ix in sayn wil in b'eyb'al, yuj cha, xin yamn 'och in yiclni tas tzala.

⁶⁰ Caw yajn̈j cha, xin yiclni jun tzo'n̈ a checnb'il tic, may niwn tiempo xwij 'eq'ui.

⁶¹ 'Ix 'och wal oyn eb' 'anma maysch'olnil 'ayin, yic tzin ya'n telwc eb' snani, palta man̈ yujoc cha, 'ix sat in c'ojl 'a tas tzyal a cuynb'il.

⁶² A 'a yic chim'ac'wal tzin q'ue wan wac' yuj diosal 'ayach, yujto caw tojl jun tzo'n̈ a ley tic.

⁶³ An tic, witb'eym in b'a yet' eb' tzyal sb'a 'ayach, atn eb' tzyiclni a checnb'il.

⁶⁴ Mamin Jehová, caw wal tzcheclj 'el a chamc'ojlal 'a sat lum lum tic, an xo tic, cuyn 'a jun tzo'n̈ a checnb'il tic.

B'aln̈e'

⁶⁵ Mamin Jehová, caw wach' a nab'en 'ayn an a checb' in tic, 'icha wal yaln a paxti'.

⁶⁶ Cuyn 'a wach' nab'enal yet' 'a jelnal, yujto an tic, tox 'ix wa'ch in c'ojl 'a jun tzo'n̈ a checnb'il tic.

⁶⁷ A yic mantzac 'och in yailal, til wal tas maysch'olnil xlaj in b'o', palta ax ticnec, a 'a paxti tzin yiclej.

⁶⁸ Caw wach' a nab'en Mamin, wach' tas tza b'o'o; cuyn 'a jun tzo'n̈ a checnb'il tic.

⁶⁹ A eb' b'an̈quintac, til wal 'es paxti tzyal eb' 'a wib'an̈; an xo tic, caw tzin yiclj a checnb'il 'a smasnil in nab'en.

⁷⁰ 'Ix juw 'el snab'en eb' yuj jun tzo'n̈ maysch'olnil cha, palta an xo tic, to tzin tzalj yet' jun tzo'n̈ cuynb'il tic.

⁷¹ 'Ay swach'il yic in 'och 'a in yailal, yujto ata xin cuy a checnb'il.

⁷² A jun tzo'n̈ a checnb'il 'ix alcn tic, 'ec'b'al swach'l 'a yib'n̈ jaye'oc mil q'uen oro mto q'uen plata.

Lajn̈e'

⁷³ Mamin Jehová, ach ton wal b'ojnaquin, yuj cha, 'ac' nachjoc 'el wu'uj, tas wal tzwutj in cuyn a checnb'il.

⁷⁴ A eb' tzyal sb'a 'ayach, caw 'oj tzaljoc eb' yic tzin yiln 'och eb', yujto a 'a paxti tzwa'ch yipc in c'ojol.

⁷⁵ Wojc wal si'mb'il, to a jun tzo'n̈ a ley tic caw tojl eb', yujto 'ay wal yel'chi, yuj cha, tzin a'n 'och 'a in yailal.

⁷⁶ Ax ticnec, a cab' a chamc'ojlal tz'och sniwnalc in c'ojol, yujto 'ixta yaln a paxti'.

⁷⁷ Ch'ox a cham'c'ojlal 'ayin, tza'n pax in tzatzil, yujto 'ay in tzaljc'ojlal yuj a cuynb'il tic.

⁷⁸ 'El cab' sq'uixwel eb' b'an̈quintac, yujto tzin sb'uch eb' 'a nab'an̈ej, an xo tic, to a 'a checnb'il tzin nib'j in cuyu'.

⁷⁹ A eb' tzyal sb'a 'ayach, jaw cab' eb' 'a in tz'ey, eb' to 'ojtnacx jun a cuynb'il tic.

⁸⁰ Te'n cab' yaj in nab'en 'a jun tzo'n̈ a checnb'il tic, sec may b'a'n̈ tzwac' in q'uixwloc.

Uxlche'

⁸¹ Til wal in nib'n tas wal tzin otj in a colni; yuj cha, xwa'n 'och a paxti yipc in c'ojol.

⁸² Caw wal tzactzj yol in sat in tan̈wni wila', b'a'n̈ tz'el'ch tas tzyal a paxti tic, yuj cha, xwaln 'ixtic: ¿B'a'n̈ pax tzwul ac' sniwnal in c'ojl jun? xin chi.

⁸³ Yujto an tic, 'icha to man̈x 'a wel'ch yuj 'ichmal, palta man̈ yujoc cha, tzsat in c'ojl 'a a checnb'il.

⁸⁴ ¿Jantcto wal tiempo 'oj wil an a checb' in tic? ¿B'a'n̈to wal 'oj a b'eyc'ojloc eb' tzchichn 'och 'ayin?

⁸⁵ A eb' b'an̈quintac, eb' matz ya'ch sc'ojl 'a jun tzo'n̈ a cuynb'il tic, b'ob'ilx in jul-l yuj eb'.

⁸⁶ Coln 'el 'a yol sc'ab' eb', yujto ton̈j tzchichn 'och eb' 'ayn 'a nab'an̈ej. Ax pax a checnb'il, yeln̈j pax eb' smasnil.

⁸⁷ Jab'xoj ma'in satl yuj eb', palta ma'ix sat in c'ojl 'a a checnb'il.

⁸⁸ 'Ac' in q'uinl Mamin yujto tzin a chamc'ojlej, ax in yiclni a checnb'il alb'il can o'oj.

Lajchwe'

⁸⁹ Mamin Jehová, a 'a paxti tic may 'aj tzjelmji, te'n yaj 'a satcha'an̈.

⁹⁰ A 'a chamc'ojlal 'ayc'n̈ej 'a smasnil tiempo; ach xa b'o lum lum tic, wach' 'ix otj can 'a yet'ul.

⁹¹ Smasnil tas b'ob'il can o'oj, wach' yaj 'a yet'l 'icha yaj aln cani, a jun tzo'n̈ tic, wan a c'anlb'an eb'.

⁹² Q'uinloc a jun tzo'n̈ a cuynb'il tic, matz yac' eb' in tzaljc'ojlal, toto 'ixta', lajwnacn xo 'el yuj in somc'ojlal.

⁹³ May b'a'n̈ 'oj sat in c'ojl 'a jun tzo'n̈ a checnb'il tic; yujn̈ej eb', 'ay in q'uinl o'oj.

⁹⁴ Coln Mamin, yujto ec waji, caw 'ix wa'ch in c'ojl 'a jun tzo'n̈ a checnb'il tic.

⁹⁵ A eb' maysch'olnil snab'en 'a in patquil, tan̈b'il yuj eb' b'a'n̈ tzin satli, palta an xo tic, caw 'aychn̈ej in nab'en 'a jun tzo'n̈ a cuynb'il tic.

⁹⁶ 'Ix wila to a smasnil tas, man̈ tz'acnoc 'a swach'il, ax pax jun tzo'n̈ a checnb'il tic, man̈x yalnb'ilc swach'l eb'.

'Oxlajn̈e'

⁹⁷ Mamin, man̈ jantcoc tzin chaml yet' a cuynb'il tic. 'A junjn c'u tzin cuyni.

⁹⁸ A jun tzo'n̈ a checnb'il tic, a eb' x'a'n sjelnal in nab'en 'a yib'n̈ eb' 'ajc'ojl yajch 'ayin, yujto 'ayc' eb' 'a in nab'en.

⁹⁹ 'Ec'b'al tas xnachj 'el wuj 'a yib'n̈ eb' cuyjnac in, yujto xwa'ch in nab'en in cuyn jun tzo'n̈ tas alb'il can o'oj.

¹⁰⁰ 'Ec'b'al tas xnachj 'el wuj 'a yib'n̈ eb' 'ichmtac winac, yujto tzin yiclj jun tzo'n̈ a checnb'il tic.

¹⁰¹ 'Ix wij 'el in b'a 'a jun tzo'n̈ b'eyb'al maysch'olnil, sec tztac' in yiclni a paxti'.

¹⁰² Ma'ix wij 'el in b'a 'a jun tzo'n̈ a ley tic, yujto ach in a cuy 'a 'a.

¹⁰³ A jun tzo'n̈ a paxti tic, yel xo wal chi 'a yib'n̈ no yal chab'.

¹⁰⁴ A 'a spatq'uil jun tzo'n̈ a checnb'il tic, ata xwij 'elt in nab'en; yuj cha, caw matz in nib'j jun tzo'n̈ b'eyb'al yic 'a'j 'es.

Chan̈lajn̈e'

¹⁰⁵ A 'a paxti', a sacq'uinl yaj 'a wojltac 'icha yoc junc cantil, a tz'a'n sacq'uinl 'a yol in b'e 'aj tzin b'eyi.

¹⁰⁶ 'Ix wac' in ti', to yowlal 'oj in yiclc tas xwala', yuj cha, 'oj in b'eylb'oc jun tzo'n̈ a ley tic, yujto tojl eb'.

¹⁰⁷ Mamin Jehová, caw wal tzcus in c'ojl tzwab'i; 'ac' wal in tzatzil, 'icha wal yaln a paxti'.

¹⁰⁸ Tzin tew wal 'ayach, to tza chaj 'in wach' paxti tz'el 'a in c'ojl walni, tzin a cuyn 'a jun tzo'n̈ a ley tic.

¹⁰⁹ 'Ayn xo 'ec' 'a yol sc'ab' chamel, palta man̈ yujoc cha, sat in c'ojl 'a a cuynb'il.

¹¹⁰ A eb' maysch'olnil snab'en, 'ix cob' yac' 'ejm eb' syal 'a wojltac, palta ma'ix wij 'el in nab'en 'a a checnb'il.

¹¹¹ A jun tzo'n̈ a paxti 'ix al 'ayin, a chi tzwa'ch yipc in c'ojl 'a smasnil tiempo, yujto a 'a eb' 'aj tzwij in tzaljc'ojlal.

¹¹² 'Ix wa'ch in nab'en in yiclni jun tzo'n̈ a checnb'il tic, masnto 'a slajub'.

Olajn̈e'

¹¹³ A eb' 'anma chab'sat yaji, caw tzin chac in b'a yet' eb', palta ax jun tzo'n̈ cuynb'il tic, caw tzin chamc'ojlej eb'.

¹¹⁴ Ach ton 'aych 'och wet'oc, in Colmal aji; a 'a paxti tic, a tzwa'ch yipc in c'ojol.

¹¹⁵ 'El cab' eb' maysch'olnil snab'en tic 'a in tz'ey, yujto tzin nib'j in yicl a checnb'il ach in Diosal.

¹¹⁶ Mamin, 'ac' wip 'icha yaln a paxti', sec wach' matz in q'uixw 'el yet' tas 'aych yipc in c'ojol.

¹¹⁷ Colwjan̈ wet'oc sec tzin colchj cani; caw tzin tzalj yet' jun tzo'n̈ a cuynb'il tic 'a smasnil tiempo.

¹¹⁸ 'Ix a patquilj can 'el eb' xyij 'el snab'en 'a a checnb'il, yujto a stu nab'enal eb', may xon jac yel'chi.

¹¹⁹ 'Icha tz'aj c'alem sjulx 'eli, 'ixta 'ix otj e'n 'el smasnil eb' maysch'olnil snab'en 'a sat lum lum tic, yuj cha, tzin chamc'ojlan jun tzo'n̈ cuynb'il tzal tic.

¹²⁰ Mamin, a 'in niwnal tic, tz'ib'x yuj xiwlal 'a ojltac, yujto caw niwn yel'ch a ley 'a in sat.

Waclajn̈e'

¹²¹ A tas wach' yet' tas tojol, a chi tzin b'eylb'ej, yuj cha, man̈ in ac' 'a yol sc'ab' eb' 'ajc'ojl yajch 'ayin.

¹²² 'Ochn̈ in tan̈malc an a checb' in tic; man̈ in ac' yixtc eb' b'an̈quintac.

¹²³ Caw tzjuw yol in sat in tan̈wni wila', b'a'n̈ tzin a col-li, ¿b'a'n̈ wal tzin a col-l 'icha yaln a paxti'?

¹²⁴ Wach' tzotj a nab'en 'ayn an a checb' in tic, 'icha yaj in a chamc'ojlani. Cuyn 'a jun tzo'n̈ a checnb'il tic.

¹²⁵ An tic a checb' waji, 'ac' sjelnal in nab'en, sec tzwojquej 'el jun tzo'n̈ a cuynb'il tic.

¹²⁶ Mamin Jehová, stiempoal xo wal a'n cuenta eb' may yel'ch a cuynb'il 'a sat.

¹²⁷ An xo tic, yel xo wal tzin chamc'ojlej jun tzo'n̈ a checnb'il tic 'a yib'n̈ q'uen oro caw wach'.

¹²⁸ Tzin b'eylb'ej jun tzo'n̈ a checnb'il tic, ax smasnil b'eyb'al to man̈ yeloc, xin yajcn 'el eb'.

¹²⁹ Caw satjub'tac yilx jun tzo'n̈ a checnb'il tic; yuj cha, tzin moln pax eb' 'a in nab'en.

¹³⁰ A yic tzcham wal yalx jun tzo'n̈ a paxti tic, a tz'a'n sacq'uinal, tzya'n jawc snab'en eb' 'anma 'emmquilal yeq'ui.

¹³¹ Caw wal tzin nib'j jun tzo'n̈ a checnb'il tic 'icha snib'n junc mach yu'n a a yuj tacn̈ti'al.

¹³² 'Ilt in 'och Mamin, 'o'ch cab' a c'ojl 'ayin, 'icha tzac' yet' eb' tzach chamc'ojlani.

¹³³ Quetzn b'ey yet' a paxti', man̈ in a cha 'ajxoc ganar yuj maysch'olnil.

¹³⁴ Coln 'el 'a yol sc'ab' smaysch'olnilal eb' 'anma', yujto tzin nib'j in yiclc jun tzo'n̈ a checnb'il tic.

¹³⁵ Wach' cab' wilx an a checb' in tic 'a a sat, cuyn pax 'a jun tzo'n̈ a ley tic.

¹³⁶ Caw tzb'ey yal in sat woq'ui, yujto matz yiclj eb' 'anma jun tzo'n̈ a cuynb'il tic.

Wajxclajn̈e'

¹³⁷ Mamin Jehová caw wal tojl a nab'en, ax jun tzo'n̈ a ley tic, caw wach' eb'.

¹³⁸ Smasnil tas alb'il can o'oj, caw tojl eb', smoj wal tzwa'ch eb' yipc in c'ojol.

¹³⁹ Caw tztac in c'ojl wiln 'och eb' 'ajc'ojl yajch 'ayin, yujto may yel'ch a paxti 'a eb'.

¹⁴⁰ A jun tzo'n̈ a paxti tic, niwn ton wal yel'ch eb'. Yuj cha, tzin chamc'ojlan eb' an a checb' in tic.

¹⁴¹ 'Emmquilal 'anma 'in, toc 'ay jac wel'chi, palta ma'ix wac' sat in c'ojl 'a a checnb'il.

¹⁴² A 'a tojlal 'ayc' 'a smasnil tiempo, ax jun tzo'n̈ a cuynb'il tic, caw yel eb'.

¹⁴³ 'Ix wil cusc'ojlal yet' yailal, palta ax a checnb'il, a x'a'n in tzaljc'ojlal.

¹⁴⁴ A jun tzo'n̈ a paxti alb'il can oj tic, caw tojl eb'. 'Ac' jawc in nab'en, sec 'ay in tzatzil.

B'aln̈lajn̈e'

¹⁴⁵ Mamin Jehová, yet' smasnil in nab'en 'ix waln in b'a 'ayach, ta'wj in, yujto tzin nib'j in yiclc a checnb'il tic.

¹⁴⁶ A 'aych xwal in b'a, colwjan̈ wet'oc sec 'oj stac' in yiclni tas tzal tic.

¹⁴⁷ A yic mantzac sacb'i tzin q'ue wan in c'an a colwal wet'oc, yujto tzwa'ch a paxti yipc in c'ojol.

¹⁴⁸ An̈jtona', pitzn inn̈ej tz'ec' 'ac'wal, tzlaj in nan cot jun tzo'n̈ a paxti tic.

¹⁴⁹ Mamin Jehová, 'ay cab' a chamc'ojlal ab'n in paxti', 'ac' wal in q'uinl 'icha yaj a tojlal.

¹⁵⁰ A eb' 'anma tzin pechn b'eyc'oc, caw la'n yaj eb' 'a in tz'ey yet' stu nab'enal, palta caw najt yajl eb' 'a jun tzo'n̈ a cuynb'il tic.

¹⁵¹ Mamin caw la'n 'aj 'a in tz'ey, ax smasnil jun tzo'n̈ a checnb'il tic, caw yel tas tzyal eb'.

¹⁵² Niwn xo tiempo wojcan 'el jun tzo'n̈ a paxti tic, to 'ayc'n̈ej eb' oj 'a smasnil tiempo.

Junc'al

¹⁵³ 'Ilt in cot 'a scal in yailal, tzin a colni, yujto ma'ix wac' sat in c'ojl 'a jun tzo'n̈ a cuynb'il tic.

¹⁵⁴ Coln 'a yol sc'ab' in yailal tic, tza'n in q'uinl 'icha yaln a paxti'.

¹⁵⁵ A eb' maysch'olnil sb'eyb'al, najt yajl eb' 'a stz'ey jun colnb'il tic, yujto matz ya'ch eb' sc'ojl 'a a checnb'il.

¹⁵⁶ Mamin Jehová, caw niwn jun tzo'n̈ a wach'c'ojlal tic, 'ac' wal jacx in tzatzil, yujto tojl a nab'en.

¹⁵⁷ Til wal eb' 'ajc'ojl yajch 'ayin, tzin cob' yixtc eb' snani, palta an xo, matz wij 'el in nab'en 'a jun tzo'n̈ a paxti tic.

¹⁵⁸ A eb' 'anma chab'sat yaji, caw tu wiln 'och eb', yujto matz yiclj eb' a paxti'.

¹⁵⁹ 'In tzela to caw tzin chamc'ojlej jun tzo'n̈ a checnb'il tic, 'ac' in q'uinl 'icha wal yaj in a chamc'ojlani.

¹⁶⁰ A smasnil tas alb'il can oj 'a a paxti', caw yeln̈j eb', may b'a'n̈ to 'ay slajb' eb'.

Junschawinac

¹⁶¹ May in mul, palta in spech b'eyc'oc eb' niwc yajal, ax a paxti', caw wal niwn yel'ch 'a in sat.

¹⁶² Caw tzin tzalj yet' a paxti tic, 'icha junc mach tz'ilchj nan̈loc tumn yu'uj.

¹⁶³ Matz in nib'j jun tzo'n̈ 'es, caw wal tzin yajl eb', ax a cuynb'il a chi tzin chamc'ojlej.

¹⁶⁴ 'A junjn rato tzwaln in wach' paxti 'ayach, yujto tojl yaln jun tzo'n̈ a ley tic.

¹⁶⁵ A eb' tzchamc'ojlan jun tzo'n̈ a cuynb'il tic, caw junc'ojlal yaj eb', yuj cha, may tas 'oj 'a'nc telwc eb'.

¹⁶⁶ Mamin Jehová, tan̈b'il a colwal wu'uj, yujto tzin b'eylb'ej jun tzo'n̈ a checnb'il tic.

¹⁶⁷ Caw tzin yiclj tas alb'il can 'oj tic, yujto caw wal tzin chamc'ojlej.

¹⁶⁸ Tzin yiclj a checnb'il yet' smasnil tas tzala, caw ojc pax yilx smasnil in b'eyb'al.

Chab'schawinac

¹⁶⁹ Mamin Jehová, 'ix c'och wal yel waw 'a ojltac, jawc cab' in nab'en 'icha yaln a paxti'.

¹⁷⁰ C'och cab' in lesl 'a ojltac, coln 'icha wal yaj aln can 'a a paxti'.

¹⁷¹ Til wal cab' wach' paxti 'oj stac' waln 'ayach, yujto in a cuy 'a jun tzo'n̈ a checnb'il tic.

¹⁷² 'Oj in b'itn cab' yuj tas alb'il can o'oj, a smasnil a paxti', caw wal tojl eb'.

¹⁷³ Lista cab' yaj a c'ab' in a colni, yujto tzin nib'j jun tzo'n̈ a checnb'il tic.

¹⁷⁴ Mamin Jehová, tzin nib'j wal to tzin a colo, yujto 'ay in tzaljc'ojlal yet' jun tzo'n̈ a cuynb'il tic.

¹⁷⁵ Tzin nib'j to pitzn in, sec tztac' waln in wach' paxti 'ayach, ax a tojlal a tzcolwj wet'oc.

¹⁷⁶ In satc' 'icha tzyac' junc no calnelu tzsatq'ui, ach xo in a sayq'ui. In 'ilchj o'oj, yuj cha, matz wac' sat in c'ojl 'a jun tzo'n̈ a checnb'il tic.