Salmos 118 - Chuj San Sebastian Bible

SALMO 118 A Jehová Colwjum

¹ Calc yuj diosal 'a Jehová yujto wach' snab'en, a schamc'ojlal 'ayn̈ec may slajub'.

² Calc an̈ israel on̈c tic, to a schamc'ojlal Dios may slajub'.

³ Yal cab' eb' yin̈tl Aarón, to a schamc'ojlal Dios may slajub'.

⁴ Yal cab' eb' yiclum 'a Jehová, to a schamc'ojlal Dios may slajub'.

⁵ A yic 'ayn 'och 'a in yailal, 'ix waln in b'a 'a Jehová, 'ix yab' tas xwal 'a 'a, yuj cha, in scolni.

⁶ A 'ayc' wet'oc, yuj cha, matz in xiw yuj tas tzin yutj eb' wit 'anma'il.

⁷ Wojtac to 'ayc' wet'oc, a tzcolwj 'ayin. 'Oj wila', tas tz'aj slajw 'el eb' 'anma tzin chacn 'eli.

⁸ Yel xo wach' tzca'c 'och Jehová yipc qui c'ojol, 'a yib'n̈ to a eb' 'anma 'aj tzca'c 'och qui c'ojol.

⁹ Caw wal wach' tzca'c 'och Jehová yipc qui c'ojol, 'a yib'n̈ to a eb' yajl 'aj tzca'c 'och qui c'ojol.

¹⁰ 'Ix 'och oyn eb' niwc nacion̈ 'ayin, palta yuj yip Jehová 'ix wa'n ganar eb' in satn 'eli.

¹¹ 'Ix 'och wal oyn eb' 'ayn smasnil, palta yuj yip Jehová xwa'n ganar in satn 'el eb'.

¹² 'Ix 'och oyn eb' 'ayn 'icha no sno'l 'acan̈, ax yowl sc'ojl eb' chi 'ayin, 'ix tup 'icha tzyac' te c'ac' 'a scal q'ui'ix; yuj scolwal Jehová 'ix wa'n ganar in satn 'el eb'.

¹³ In cob' yec telwc eb', sec tzin 'em yuj eb' snani, palta ax Jehová in colni.

¹⁴ Yuj cha, tzin b'itn 'a 'a, yujto a wip yaji. A 'in Colmal yaji.

¹⁵ A b'it yic tzaljc'ojlal a chi 'ay 'a yatut eb' tojl snab'en. Yuj sjelnal Jehová 'ix ya'n ganar eb' owal.

¹⁶ Caw wal niwquil spoder, yuj spoder caw satjub'tac 'ix 'aj ya'n ganar owal.

¹⁷ Ma'oj in cham muc'uc, palta pitzn in to, sec 'oj wal-li to satjub'tac tas tzb'o Jehová.

¹⁸ Caw niwquil in yailal 'ix ya'chi, palta ma'in schaj chamoc.

¹⁹ Jacx cab' spuertail yatut Dios 'ayin, yujto tzin nib'j tzin 'och 'a yojol, yic tzwa'n yuj diosal 'a 'a.

²⁰ A 'a jun puerta cha, ata tzon̈ 'ochec yic tzon̈ c'ochc 'a yojltac; ata 'oj cochc an̈ tojl qui nab'enec.

²¹ Mamin Jehová, 'oj wac' yuj diosal 'ayach, yujto 'ix ab' tas xwala, in Colmal pax aji.

²² A q'uen q'uen 'ix spatquilj can 'el eb' b'om n̈a, atn q'uen 'ix wach' 'ajx 'och yopiso.

²³ Ach 'ixta 'ix otj jun tic, caw tzsat qui c'ojl quilni.

²⁴ Atn 'a jun c'u tic 'ix 'el'ch tas nab'il oj Mamin Jehová; yuj cha, wach' quic on̈, tzon̈ tzalj o'oj.

²⁵ Tzin tew 'och 'aych Mamin to tzach colwj quet' ticnec on̈. Colwjan̈ sec wach' tzon̈ 'el'ch can on̈.

²⁶ Alx cab' wach' paxti 'a mach checb'il cot yuj Jehová. A 'a yatut Dios ata 'oj cal wach' paxti 'ayex.

²⁷ A Jehová Dios ton b'i'an, a 'ix a'n sacq'uinl 'ayn̈ec. Qui nac sq'uin̈al, tzqui'nec te sc'ab' te yet' xi'il, tzon̈ oyyec' 'a spatquil yet'l xajmb'al.

²⁸ Ach qui Diosal on̈, tzcal yuj diosal 'ayach, yujto niwn el'chi. Smoj caln qui wach' paxti 'ayach.

²⁹ ¡Alx cab' wach' paxti 'a Jehová, yujto wach' snab'en! A schamc'ojlal 'ayn̈ec may slajub'.