Salmos 116 - Chuj San Sebastian Bible

SALMO 116 Lesl yic alj yuj diosal

¹ Tzin chamc'ojlej Jehová, yujto xyab' tas xwal 'a in lesal.

² 'Ix yab' tas xin c'an 'a 'a, yuj cha, ya' sb'a pitzn in, 'oj wal in b'a 'a 'a.

³ A yailal yic chamel, in sjal 'ejm c'otan. 'Ix jaw xiwc'ojlal yic chaml chi 'a wib'an̈. A yailal yet' cusc'ojlal xin chaj in b'a yet'oc.

⁴ Yuj cha, 'ix waln in b'a 'a Jehová 'ixtic: Mamin Jehová, coln 'el 'a scal in yailal, xin chi.

⁵ Caw wal wach' qui Diosalec, tojl snab'en, caw wal 'ay schamc'ojlal 'ayn̈ec.

⁶ A Jehová a tztan̈wni eb' 'emmquilal yeq'ui. A yic caw man̈x 'a wip, ax in coln 'eli.

⁷ A ticnec b'i'an, tzalj in c'ojl tzwab'i, yujto wach' snab'en Jehová 'ayin,

⁸ yujto in scol 'elt 'a yol sc'ab' chamel. In scoln 'elt 'a yol sc'ab' 'oq'uel, ma'in schaj telwc 'ejmi.

⁹ Yiclum 'oj wutc in b'a 'a 'a, ya' sb'a pitzn in 'a yolyib'n̈q'uinl tic.

¹⁰ 'Ix wa'ch Jehová yipc in c'ojol, 'ix wal 'a 'ixtic: Caw 'ayn 'och 'a somc'ojlal, xin chi.

¹¹ Yuj cha, 'a sji'lti'al xwalni to smasnil 'anma', 'a'm 'es eb'.

¹² ¿Tas wal 'oj wac' spacc 'a Jehová, yuj smasnil tas wach' tzb'o 'ayin?

¹³ 'Oj wi' cot yal uva wofrendaoc 'a 'a, yujto a 'in coln 'eli.

¹⁴ A 'in ti wa'jnac 'a Jehová, 'oj wac' 'el'choc 'a sat smasnil eb' wit chon̈ab'.

¹⁵ A yic tzcham junc mach to yic xo Dios yaji, caw wal 'ay yel'ch 'a 'a, yujto man̈ comnoc tzchaj cham eb' yic cha.

¹⁶ A Jehová, yel ton b'i'an, schecb' waji, yune 'in 'ix schecb' Dios cha. A 'in coln 'elt 'a yol sc'ab' tas jaljnac in.

¹⁷ 'Oj wac' in xajmb'al 'a Jehová yic alj yuj diosal, yic tzwaln in b'a 'a 'a.

¹⁸ A 'in ti wa'jnac 'a Jehová, 'oj wac' 'el'choc 'a sat smasnil eb' wit chon̈ab'

¹⁹ atn 'a yamq'uil yatut, 'a yol chon̈b' Jerusalén. ¡Alx cab' wach' paxti 'a Jehová!