Salmos 115 - Chuj San Sebastian Bible

SALMO 115 A Dios yet' yechl comn dios

¹ Mamin Jehová, a cab' 'aych tzalx wach' paxti', man̈oc cab' 'ayn̈ an̈ 'anman̈ tic. Caw smoj yalx wach' paxti 'aych yuj a chamc'ojlal yet' yuj a tojlal.

² Man̈ a cha yal eb' chuc chon̈b'al 'ixtic: ¿'Aj wal 'ay e Diosal cha? man̈ schic cab' eb'.

³ Ach qui Diosal on̈, ata 'aych 'ec' 'a satcha'an̈, a smasnil tas a nib'jnac a b'o', b'ob'il eb' o'oj.

⁴ Ax pax sdiosal eb' chuc chon̈b'al tic, b'ob'il yet' q'uen plata mto oro, 'anma b'ojnac.

⁵ 'Ay sti', palta matz tac' spaxtini; 'ay yol sat, palta matz tac' yilni;

⁶ 'ay schiquin, palta matz tac' yab'ni; 'ay sn̈i', palta matz tac' su'lni;

⁷ 'ay sc'ab', palta matz tac' syamn junc tas; 'ay yoc, palta matz tac' sb'eyi; may wal junc paxti'al tztac' yalni.

⁸ A eb' tzb'on jun tzo'n̈ cha, yet' eb' tzya'ch sc'ojl 'a 'a, lajn cab' eb' 'icha sdiosal cha.

⁹ Ex wit israelal, ca'c 'och Jehová yipc qui c'ojol, yujto a 'aych quet'ec, a tzon̈ colnec.

¹⁰ Ex ya'mal 'och sti eb' 'anma 'a Dios, 'a'c 'och Jehová yipc e c'ojol, yujto a 'aych quet'ec, a tzon̈ colnec.

¹¹ Jantc ex to yiclum ex 'a 'a, 'a'c 'och yipc e c'ojol, yujto a 'aych quet'ec, a tzon̈ colnec.

¹² On̈ snac cot Jehová, yuj cha, 'oj yac' swach'c'ojlal 'ayn̈ec. 'Oj yac' syaxilal 'a quib'n̈ an̈ israel on̈c tic. Ax ya'n pax syaxilal 'a yib'n̈ eb' yin̈tl Aarón.

¹³ 'Oj yac' swach'c'ojlal 'a quib'n̈ec an̈ yiclum tzcutjec qui b'a 'a 'a, 'a mach niwn yel'chi, yet' pax 'a mach may wal yel'chi.

¹⁴ Ya'cab' niwtjoc cunnalec yet' eb' quin̈tlec b'aq'uin̈.

¹⁵ A Jehová b'ojnac satcha'an̈ yet' lum lum tic, ya' cab' swach'c'ojlal 'a quib'n̈ec.

¹⁶ A satcha'an̈ yic Jehová yaji, ax lum lum tic, 'ac'b'il lum 'ayn̈ec yu'uj.

¹⁷ A eb' chamnc xo, eb' 'ayx 'ec' 'a jun lugar 'aj sictac yaji, ¡toc wal 'ayt eb' 'oj stac' yaln swach' paxti 'a Jehová!

¹⁸ Palta an̈ pitzn on̈c tic, 'oj calc wach' paxti 'a Jehová ticnec yet' 'a smasnil tiempo. ¡Alx cab' wach' paxti 'a Jehová!