Salmos 114 - Chuj San Sebastian Bible

SALMO 114 Snanb'il cot yelt eb' israel 'a Egipto

¹ A yic x'elt eb' israel 'a Egipto, atn eb' yin̈tl Jacob cajn 'ec' 'a scal eb' chuc chon̈b'al cha,

² a 'a chon̈b' Judá, ata tzyal sb'a eb' 'anma 'a Jehová, atn tz'a'n yajlil 'a yol smacb'en Israel.

³ A yic xch'oxn sb'a Jehová 'a eb' israel, ax a mar 'ix 'at a 'elc yu'uj; 'ix 'och wan a Jordán sb'eyi.

⁴ Ax eb' lum niwc witz yet' eb' lum tzalan, 'icha to 'ix laj q'ue b'atnjoc eb' lum 'icha mam calnelu, mto 'icha no nene calnelu.

⁵ ¿Tas yuj 'ix 'at a mar chi 'eloc? ¿Tas yuj 'ix 'och wan a Jordán sb'eyi?

⁶ ¿Tas yuj 'icha to 'ix b'atjchan̈ eb' lum witz yet' eb' lum tzalan, 'icha sb'atjchan̈ no mam calnelu, mto 'icha no nene calnelu, 'ixta x'aj eb' lu'um?

⁷ 'Ib'x cab' chan̈ lum lum 'a yojltac Dios Yajl yaj 'a smasnil, atn qui Diosalec an̈ yin̈tl on̈c Jacob tic.

⁸ A 'a sat q'uen q'ue'en, ata xlaj pac' 'elt eb' a a', xlaj 'och eb' a pama'il.