Salmos 113 - Chuj San Sebastian Bible

SALMO 113 A Dios tzcolwj 'a eb' meb'a'

¹ ¡Alx wach' paxti 'a Jehová! An̈ schecb' on̈c Cajlil, calc wach' paxti 'a 'a.

² Calc wach' paxti 'a Jehová, ticnec yet' 'a smasnil tiempo.

³ B'itnax cab' 'a stojlal 'aj tzq'uel c'u masnto 'a stojlal 'aj tz'em c'u.

⁴ A yajl yaj 'a yib'n̈ smasnil nacion̈; ax stzictznial 'ec'b'al 'a satcha'an̈.

⁵ Toc 'ay junc mach lajn yet' Jehová qui Diosalec, yujto wocn 'ejm yac' yajlil 'a satchan̈ cha.

⁶ Tz'emt q'ueln 'a satcha'an̈ yic tzyiln 'emt lum lum tic.

⁷ A tz'i'n chan̈ eb' meb'a 'a sat lu'um, ax eb' caw may jac tas 'ay 'a 'a, a tzcoln 'el eb' 'a yaln̈ meb'a'il,

⁸ sec jun tz'aj 'ejm wocn eb' yet' eb' niwc winac, atn eb' niwc winc 'a scal yit chon̈ab'.

⁹ Ax eb' 'ix 'ix may xon yune', 'oj tzaljoc eb' 'ix yic 'oj 'och eb' 'ix nunb'ilal. ¡Alx cab' wach' paxti 'a Jehová!