Salmos 111 - Chuj San Sebastian Bible

SALMO 111 A Dios tztan̈wni schon̈ab'

¹ ¡Alx cab' wach' paxti 'a Jehová! Wal 'a smasnil in c'ojol, ax waln wach' paxti 'a 'a. 'Oj wal-l 'a scal syamnil eb' 'anma wach' snab'en.

² A tas b'ob'il yuj Jehová yel xo wal niwan. A eb' tzalj yet' jun tzo'n̈ tic, ya'ch cab' eb' 'a sc'ojl scuyni.

³ Sja'l wal yilx tas b'ob'il yu'uj, tzwetzwni yilxi, ax stojlal 'ayc'n̈ej 'a smasnil tiempo.

⁴ Satjub'tac yilx tas b'ob'il yu'uj, may b'a'n̈ tz'at 'a satc'ojlal. A Jehová caw wach' snab'en, 'ay schamc'ojlal.

⁵ A tz'a'n tas tzc'ux eb' yiclum tzyutj sb'a 'a 'a, yujto tzna cot strato yet' eb'.

⁶ 'Ix sch'ox yil eb' schon̈ab' to 'ay tas tztac' yu'uj. A slum eb' chuc chon̈b'al, 'ix yac' yico'oc eb' schon̈b' cha.

⁷ A tas tzb'o'o, yel ton b'i'an tojol. A smasnil schecnb'il alb'il can yu'uj, yel tzyal eb'.

⁸ Jun 'ejmn̈ej wach' yaj eb' sb'o'i. Xya'cn jun tzo'n̈ tic yuj schamc'ojlal yet' stojlal.

⁹ 'Ix yac' colchjoc 'el schon̈ab', sb'on can strato yet' eb' 'a smasnil tiempo, yel xo wal 'ay smay sb'inaxi.

¹⁰ Toto tzqui nib'jec to jeln tzon̈ 'ajec, yowlal tzqui yicljec tas syal Jehová. Smasnil eb' tzcuyn schecnb'il, jeln tz'aj 'el'ch eb'. Smasnil cab' tiempo tzalx wach' paxti 'a 'a.