Salmos 109 - Chuj San Sebastian Bible

SALMO 109 A Dios Juez a 'aj tzwal in b'a

Sb'it David jun tic tzc'anlb'ej junc mach tzjucb'tzan b'it

¹ Ach in Diosal, a 'aych tzwal in wach' paxti', man̈toc tzach 'el ch'umn 'ayin yic tzwa'n in lesl 'ayach.

² A eb' 'a'm 'es yet' eb' maysch'olnil snab'en, tu tzyal eb' 'ayin, man̈ yelc pax tas tzyal eb' cha.

³ A eb' tzchichn 'och 'ayin, tzyij eb' yip 'a in patquil tzwab'i, tznib'j eb' tas tzin yutej, palta toc 'ay in mul 'a eb'.

⁴ A spac in chamc'ojlal tzyac' eb', to tzchichn 'och eb' 'ayin, palta to tzin leslwi yuj eb'.

⁵ A 'in wach' nab'enal 'a eb', tu tzyutj eb' spacn 'ayin, ax spac in chamc'ojlal 'a eb', to tzin schacl eb'.

⁶ A cab' junc win maysch'olnil snab'en tza'ch juezal, sec ax win licenciado to scolmal cob' winac, a cab' tzwach' 'a'n 'och smul win chi 'a yib'an̈.

⁷ Ax yic 'oj b'eyc'ojlaxc cha, tzcann̈j cab' smul chi 'a yib'an̈; a yic 'oj cob' yalnc sb'a, 'oj 'och jun chi smuloc. Ax scann̈j 'a yib'n̈ yuj win tzcoln cha.

⁸ C'ochnb'oc cab' sq'uinal, chucx cab' mach 'oj 'ochx can sjelc 'a yopiso cha.

⁹ Can cab' eb' yunnal 'a meb'a'il, can cab' 'ix yistzil win 'a man̈x 'a yichmil.

¹⁰ Stitc n̈a cab'n̈ej 'aj 'oj 'ec' eb' yunnal sc'an jac tas tzc'uxu. Pechx cab' 'el eb' 'a 'aj juwnac can yatut cha.

¹¹ A win tz'a'n q'uen tumn majnil, a cab' win tz'i'n can smasnil tas 'ay 'a eb', ax eb' chuc 'anma'il, a cab' eb' tz'i'n can 'ec' smasnil jac tas tz'el-l 'a smunljel eb'.

¹² May cab' mach tz'o'ch sc'ojl 'a jun winc cha, yet' 'a eb' yunnal tzcan meb'a'il.

¹³ Sat cab' 'el yin̈tl 'a jun 'ejmn̈ej, man̈x 'a cab' b'a'n̈ tzalb'tan̈x sb'i.

¹⁴ Sna cab' cot Jehová smul eb' smam yichm winac, may cab' b'a'n̈ tzsat 'ejm yalx smul snun winac.

¹⁵ Checln̈ej cab' yaj smul eb' chi 'a sat Dios. Sat cab' 'ejm yalx eb' 'a sat lum lum tic,

¹⁶ yujto may xon 'aj sna sb'a jac sc'ojol yic tz'o'ch sc'ojl 'a eb' meb'a', 'a eb' 'emmquilal yeq'ui yet' 'a eb' 'ay scusc'ojlal. A yico', to tzyixtjn̈ej eb' masnto tzcham eb'.

¹⁷ A maysch'olnil tznib'ej, yuj cha, catb'tzaxc cab' cani. Ma'ix snib'j sb'o wach'il, yuj cha, may cab' b'a'n̈ tzchaj yaxilal.

¹⁸ B'ut'j cab' 'och maysch'olnil chi 'a 'a, 'icha cab' spichl tz'ajchi; 'icha xoj cab' a tz'aj yol sc'ojol, 'icha cab' aceite xoj tz'aj yol sb'aquil.

¹⁹ A cab' maysch'olnil chi tz'och sut'n 'a 'icha pichul, a cab' tz'och sjal-loc.

²⁰ 'Ixta cab' tzyutj Jehová ya'n in pac 'a smasnil eb' tzchichn 'och 'ayn cha, yet' pax 'a eb' tu tzaln 'a in patic.

²¹ Mamin Jehová caw niwn el'chi, 'o'ch cab' a c'ojl 'ayin. Yuj a chamc'ojlal 'ayin, tzin a coln 'eli.

²² Caw wal 'oltac in, tzcus in c'ojol, caw wal man̈x in 'anmac tzwab'i.

²³ Wan in lajw 'ec' 'icha tzyac' wewen, a 'ic' tzin ma'n chan̈ 'icha tzyac' no c'ulub'.

²⁴ Man̈xtzac in wa'i, man̈x 'a pax yip in penc tzwab'i; caw tzin tz'onb'i, yujto man̈x 'a tas tzin c'uxu.

²⁵ Tzetzjub'tac wilx 'a sat eb' 'anma'. A yic tzin laj yilnc eb', tzin yetz'tan eb', tzyucn eb' sjolom yic tzlaj yaln eb' in peclal.

²⁶ Mamin Jehová in Diosal ach, colwjan̈ wet'oc. Coln 'el yet' a chamc'ojlal.

²⁷ Yojcoc cab' 'el eb' 'anma', to ach xa b'o jun tzo'n̈ tic.

²⁸ May yel'chi, wach'xam tzin scatb'tzej eb' 'ajc'ojl ya'ch 'ayin, palta ach xo tzac' a yaxilal 'a wib'an̈. Q'uixw cab' 'el eb', ya' sb'a an a checb' in tic to tzin tzalji.

²⁹ A eb' 'ajc'ojl cha, q'uixw cab' 'el eb'. 'Och cab' potn jun q'uixwelal chi 'a eb' 'icha junc nip.

³⁰ 'Oj wal in wach' paxti 'aych Mamin Jehová; a 'a scal nan̈loc 'anma', ata 'oj wal-li.

³¹ Yujto ach tza col eb' 'oltac tz'aji, tza coln 'el eb' 'a yol sc'ab' eb' tz'a'n queja eb' cha.