Salmos 108 - Chuj San Sebastian Bible

SALMO 108 Tzc'anx scolwal Dios yuj eb' 'ajc'ojol

Sb'it David jun tic

¹ Ach in Diosal, caw yipc'ojlal 'aj wu'uj. Caw tzin nib'j tzach in b'itnej, tzwaln in wach' paxti 'ayach.

² A yic tzq'uin̈lb'i, tzin yamn 'och in b'itn yet' in salterio yet' in arpa.

³ Mamin Jehová, 'oj ach in b'itnoc 'a scal smasnil eb' 'anma 'a jun tzo'n̈ xo nacion̈.

⁴ Yujto a 'a chamc'ojlal, yel xo wal niwquil 'a yib'n̈ satcha'an̈. A tas tzala, tz'el'chn̈ej smasnil.

⁵ Ach in Diosal, ch'oxli to niwn el'ch 'a satcha'an̈. Niwn pax cab' el'ch 'a sat lum lum tic.

⁶ An̈ chamc'ojlb'iln̈ oj tic, colwjan̈ quet' on̈ sec tzon̈ colchj on̈, tzon̈ a coln yet' a poder. Ta'wan̈ 'ayn̈ on̈ Mamin.

⁷ Ach qui Diosal on̈, 'aych 'ec' 'a a cajnub', 'ix aln 'ixtic: Caw tzaljc'ojlal 'oj in pojc lum Siquem yet' lum span̈nil Sucot.

⁸ A Galaad yet' Manasés an 'ay wico', a Efraín 'icha to in q'uen xumpiln yaji, ax Judá lajn yet' jun in c'occh yic wopiso.

⁹ A Moab 'icha in palagan yaji, a 'aj tzin b'ic woc yet' in c'ab'; ax 'a yib'n̈ Edom ata tzwa'cn 'at in xan̈ab'; caw 'oj wa'l waw yuj tzaljc'ojlal yic 'oj wa'noc ganar eb' filisteo, xa chi.

¹⁰ ¿Mach wal junc 'oj wi'n 'och 'a jun chon̈b' oyn 'och smuroal? ¿Mach wal junc 'oj 'a'n 'och chon̈b' Edom 'a yol in c'ab'?

¹¹ Ach qui Diosal on̈, sta'n̈j o'oj, palta 'in to on̈ a patquilj can 'el on̈; yuj cha, man̈xtoc ach colwj yet' eb' qui soldado on̈.

¹² Colwjan̈ quet' on̈, sec matz on̈ yac' ganar eb' tzchichn 'och 'ayn̈ on̈, yujto may jac yel'ch scolwal eb' 'anma quet' on̈.

¹³ Ex wit chon̈ab', cojn yet' scolwal Dios 'oj stac' ca'nec ganar owl cha, a 'oj te'noc can 'ejm eb' 'ajc'ojl yajch 'ayn̈ec.