Salmos 107 - Chuj San Sebastian Bible

LIBRO 5 (Salmos 107—150 ) SALMO 107 A Dios tzcolwj 'a eb' 'ay somc'ojlal

¹ Calc wach' paxti 'a Jehová, yujto caw wach' snab'en, a schamc'ojlal may b'a'n̈ 'ay slajub'.

² An̈ colb'iln̈ec 'el yu'uj, calc 'eli to colb'iln̈ 'el yuj 'a yol sc'ab' eb' 'ajc'ojol.

³ On̈ smolb'tzej cot 'a jun tzo'n̈ nacion̈ 'a stojlal norte, 'a stojlal sur, 'a stojlal 'aj tzq'uel c'u yet' pax 'a stojlal 'aj tz'em c'u.

⁴ 'Ay eb' quit chon̈b'ec xlaj satc' 'a lum cusltac lum sch'ocoj, ma'ix 'ilchj sb'e eb' 'aj xlaj 'ati, yic tzc'och cajn eb' 'a junc chon̈ab'.

⁵ Xlaj 'och swejl eb', yet' stacn̈til eb', wan xo scham eb'.

⁶ Palta a 'a scal somc'ojlal eb' cha, ata 'ix yal sb'a eb' 'a Jehová, ax 'ix coln 'elt eb' 'a yol sc'ab' syailal cha.

⁷ Xlajw cha, 'ix yi'n b'ey eb' 'a jun b'e tojl sc'och 'a jun chon̈b' 'aj wach' xcan cajn eb'.

⁸ An̈ec xo tic, calc yuj diosal 'a Jehová, yujto 'ayc'n̈ej schamc'ojlal quet'ec, caw satjub'tac yilx tz'aj scolwj 'a 'ayn̈ec an̈ 'anman̈ec tic.

⁹ Yujto a tz'a'n tas tz'i'n 'ec' qui tacn̈ti'al, tzya'n pax tas wach' tzqui c'uxec.

¹⁰ 'Ay eb' xlaj 'ec' cajn 'a scal q'uic'q'uinl 'a 'aj 'ay yet'l chamel, preso yaj eb' yuj scusc'ojlal. 'Icha to jalb'il eb' yuj q'uen cadena,

¹¹ yujto x'och eb' 'ajc'ojlal 'a spaxti Dios, spatquiln can 'el eb' tas nab'il yuj Dios Niwn Yel'chi.

¹² Yuj cha, xya'n 'och eb' 'a munljel caw ya, xlaj telw eb'. ¡Toc 'ay mach xcolwj 'a eb'!

¹³ Palta a 'a scal somc'ojlal eb' cha, ata 'ix yal sb'a eb' 'a Jehová, ax 'ix coln 'elt eb' 'a yol sc'ab' syailal cha.

¹⁴ 'Ix yi'n 'elt eb' 'a scal q'uic'q'uinal, 'a 'aj 'ay yet'l chamel, sn̈i'chtan 'el q'uen cadena chi 'a eb'.

¹⁵ An̈ec xo tic, calc yuj diosal 'a Jehová, yujto 'ayc'n̈ej schamc'ojlal quet'ec, caw satjub'tac yilx tz'aj scolwj 'a 'ayn̈ec an̈ 'anman̈ec tic.

¹⁶ Yujto choc' xyutj swecchtan jun tzo'n̈ puerta nab'a bronce, swecchtan pax eb' q'uen q'uen 'aych yipnub'alc jun puerta cha.

¹⁷ 'Ay eb' maysch'olnil snab'en, 'ix laj 'och syailal eb', caw tzyab' eb' syal yuj tas maysch'olnil tzb'o'o.

¹⁸ Man̈x 'a tas tznib'j eb' sc'uxu', yujto 'ayx 'ec' eb' 'a yol sc'ab' chaml tzyab'i.

¹⁹ Palta a 'a scal syailal eb' cha, ata 'ix yal sb'a eb' 'a Jehová, ax 'ix coln 'el eb'.

²⁰ Xyalni to tzb'ox sc'ojl eb', yuj cha 'ix jaw sc'ojl eb'; scoln 'elt eb' 'a yol sc'ab' chamel.

²¹ An̈ec xo tic, calc yuj diosal 'a Jehová, yujto 'ayc'n̈ej schamc'ojlal quet'ec, caw satjub'tac yilx tz'aj scolwj 'a 'ayn̈ec an̈ 'anman̈ec tic.

²² Calc qui wach' paxti 'a 'a. A jun cha, 'icha to qui xajmb'al tz'aji, yet' qui tzaljc'ojlal tzcalnec 'el yab'xil tas sb'ojnac.

²³ 'Ay eb' xlaj 'at chon̈wjoc mto manwjoc. 'Ix 'at eb' 'a yib'n̈ a mar yet' sbarco, yic tzya'n ganar eb' stumin.

²⁴ A eb' tic xyil eb' tas satjub'tac b'ob'il yuj Jehová.

²⁵ A yic xyalni to tzcot yowl a mar cha, 'ix q'ue wan ch'umch'noc a 'a cha'an̈;

²⁶ 'ix 'ijx chan̈ eb' 'anma chi yuj a 'a cha'an̈, 'ix 'ijx pax 'ejm eb' yuj a', caw wal sat sc'ojl eb' yuj smay a'.

²⁷ 'Ix 'ib'x eb' yuj xiwlal, toxn̈ej xch'umch'n 'ec' eb' 'icha 'u'm 'an̈, smasnil sjelnal snab'en eb', toc 'ayt jac yopiso.

²⁸ Palta a 'a scal somc'ojlal eb' cha, ata 'ix yal sb'a eb' 'a Jehová, ax 'ix coln 'elt eb' 'a yol sc'ab' syailal cha.

²⁹ Yajn̈ej xyi'n 'och wan jun 'ic'n̈ab' cha, 'ix 'och pax wan sq'ue wan a a chi 'a cha'an̈.

³⁰ A yic xyiln eb' yoch wan a sq'ue wa'an, 'ix tzalj chan̈ eb', ax Dios x'i'n 'at eb' 'a jun puerto 'aj tznib'j eb' tzc'ochi.

³¹ An̈ec xo tic, calc yuj diosal 'a Jehová, yujto 'ayc'n̈ej schamc'ojlal quet'ec, caw satjub'tac yilx tz'aj scolwj 'a 'ayn̈ec an̈ 'anman̈ec tic.

³² Qui'c chan̈ sb'i yic tzyamn sb'a eb' chon̈ab', tzcalnec wach' paxti 'a 'a, yic 'ay syamnil eb' 'ichmtac winac.

³³ A Dios tz'a'n tacjoc chan̈ a niwc b'eymal a', tzya'n tup chan̈ eb' a spac'b'a'.

³⁴ A lum lum 'ay syaxil sat, tzyac' jelmjoc sat lu'um yic man̈x 'a sb'al tzyac'a; yuj smul eb' 'anma cajn 'a sat lu'um, 'ixta tz'aji.

³⁵ A lum tacn̈ lum may yalil sat, ax tz'a'n pitzwc a niwc pama' yet' eb' a spac'b'a 'a lu'um.

³⁶ Ax eb' 'ay swejel, ata tzcan cajn eb' yuj 'a lu'um, a pax ta tzb'o chan̈ eb' schon̈b' 'aj tzcan cajan.

³⁷ Tzlaj yawnc eb' te uva 'a lum lum cha, til wal sb'al lum tzyac'a.

³⁸ Tzya'n Dios chi syaxilal 'a yib'n̈ eb' sec tzniwtj sb'isl eb', a tz'a'n pax niwtjoc sb'isl scajb'en noc' eb'.

³⁹ Toto tzcham eb', wal yemt can sb'isl eb' yuj eb' 'ajc'ojl cha, 'oj 'ixtxoc eb', ax yab'n wal eb' syail.

⁴⁰ A 'a Dios may yel'ch eb' 'ajc'ojl niwc winc tzyutj sb'a, a tz'a'n satc' eb' 'a lum cusltac lu'um. Matz 'ilchj xon sb'e eb' 'aj tz'ati.

⁴¹ A tz'i'n 'elt eb' meb'a 'a scal scusc'ojlal, tzya'n q'uib' sb'isl yunnal eb'. Til wal sja'l sq'uib' eb' 'unn chi 'icha sq'uib' no calnelu.

⁴² Ax yic 'oj yilnc eb' wach' sb'eyb'al jun tzo'n̈ cha, 'oj tzaljoc eb', ax eb' maysch'olnil snab'en, man̈x 'a tas 'oj yal eb'.

⁴³ A eb' jeln snab'en, smolcn cab' eb' jun tzo'n̈ tic 'a snab'en, sec 'oj yojcoc 'el eb' to caw niwn schamc'ojlal Jehová 'a eb'.