Salmos 106 - Chuj San Sebastian Bible

SALMO 106 Jun tzo'n̈ stenmtacl eb' israel

¹ ¡Alx cab' wach' paxti 'a Jehová! Calc yuj diosal 'a 'a, yujto wach' snab'en, may b'a'n̈ tzlajw schamc'ojlal.

² ¿Mach wal junc tz'acw yaln 'el tas satjub'tac tzb'o Jehová? ¡Toc 'ay mach tztac' sb'itnan 'icha wal smoj sb'itnaxi!

³ Caw wach' yic eb' to yiclum tzyutj sb'a 'a 'a, eb' to a stojlal tzb'o 'a smasnil tiempo.

⁴ Tzin a na cot Mamin Jehová, yic tza'n a wach'c'ojlal 'a quib'n̈ an̈ a chon̈b' on̈ tic, tzin a na coti, yic tzin a coln can 'eli,

⁵ sec 'oj wil a wach'c'ojlal yet' eb' wit chon̈b' sic'b'il 'el oj tic. 'Oj wac' tzaljoc in c'ojl yet' eb' wit chon̈b' to ec yaj tic.

⁶ Lajn wal x'aj yoch qui mul 'icha ya'jnac eb' qui mam quichm 'a pecti 'on̈; on̈ 'ec' wal 'a yib'n̈ on̈, xqui b'on maysch'olnil.

⁷ A yic 'ayc' eb' qui mam quichm 'a Egipto on̈, 'icha to may yel'ch tas xa b'o 'a sat eb'; 'ix ya'n sat eb' sc'ojl 'a a niwn chamc'ojlal, ax 'a sla'nil sti a Chac Mar, ata x'och eb' 'ajc'ojlal 'ayach.

⁸ Palta yuj a chamc'ojlal 'a eb', yuj cha, xa coln 'el eb', sec tzyojquej 'el eb' to 'ay a poder, sec may tas tu tzalx 'a a patic.

⁹ 'Ix a tenn 'och wan 'a Chac Mar, 'ix tacj lum lum 'a 'aj 'ix 'och wan a', xlajw cha, 'ix e'n 'ec' eb' a chon̈b' 'a yojl a', tacn lum 'aj x'ec' eb'.

¹⁰ 'Ixta 'ix otj a coln 'el eb' 'a yol sc'ab' eb' 'ajc'ojol, atn eb' tzchichn 'och 'a eb'.

¹¹ A a mar chi 'ix satn 'el eb' 'ajc'ojl cha, man̈x 'a junc eb' 'ix stac' scoln can sb'a.

¹² Yuj tas xyil eb' 'anma cha, yuj cha, xya'n 'och eb' sc'ojl 'a tas alb'il can oj Mamin, xlaj sb'itnoc eb' b'it 'ayach.

¹³ Palta yajn̈j wal cha, 'ix satx sc'ojl eb' 'a tas xa b'o 'a eb', ma'ix stan̈wj eb' yila', tas wal a nab'en 'a yib'n̈ eb'.

¹⁴ A 'a lum cusltac lu'um, ata 'ix ach yac' prowal eb', 'ix sc'an eb' tas tznib'j sc'ux 'ayach.

¹⁵ 'Ix a'n tas tznib'j eb' sc'ux cha, palta 'ix 'a' cot jun niwquil yab'il 'a scal eb', sec tzcham eb' yu'uj.

¹⁶ A yic 'ayc' eb' 'a scamplamento cha, xlaj chichn 'och eb' 'a Moisés yet' 'a Aarón, atn win sic'b'il 'el oj Mamin Jehová.

¹⁷ Yuj cha, 'ix jat lum lu'um, 'ix sb'u'n 'ejm lum win Datán yet' pax win Abiram, yet' pax smasnil eb' ajun yet' eb'.

¹⁸ 'Ix 'a'n q'ue wan n̈ilnjoc jun c'ac' 'a scal eb', ax jun c'ac' chi xn̈usn eb' maysch'olnil snab'en cha.

¹⁹ A 'a yich lum witz Sinaí, ata sb'o eb' jun yechl quelm wacx nab'a oro, xlajw cha, xya'n 'ejm sb'a eb' 'a jun yechl cha.

²⁰ 'Ixta xyutj eb' yactn yaln sb'a 'ayach, ax 'a jun yechl wacx to lom c'ultac, ata 'ix yac' 'ejm sb'a eb'.

²¹ 'Ix ya'n sat eb' sc'ojl 'aych Mamin, palta to colwjum aj 'a eb', til wal tas satjub'tac xa b'o 'a Egipto yuj eb'.

²² Caw wal satjub'tac yilx tas xa b'o 'a lum slum eb' yin̈tl Cam, caw wal yel xo 'ay smay tas xa b'o 'a yol a Chac Mar.

²³ Xa nalb'ej a satn 'el eb' qui mam quichm on̈, palta ax Moisés win sic'b'il 'el o'oj, 'ix tew 'aych yuj eb'; yuj cha, 'ix 'ec' yowl a c'ojl 'a yib'n̈ eb', man̈x 'ic a satl eb'.

²⁴ 'Ix b'ey jab' tiempo yuj eb', schab'c'ojlan eb' lum lum caw wach', ma'ix ya'ch eb' yipc sc'ojl tas alb'il can o'oj.

²⁵ 'Ix laj yalnc eb' tu paxti 'aych Mamin Jehová, yic 'ayc' eb' 'a yol smantiado, ma'ix schaj eb' yab' tas 'ix ala.

²⁶ Yuj cha, 'ix a'n can a ti', to tzchamcn eb' 'a lum cusltac lum cha,

²⁷ sec tz'emt can sb'isl eb' a chon̈ab', yic tzsactzic can eb' 'a scal jun tzo'n̈ xo nacion̈ 'a sat lum lum tic.

²⁸ 'Ix ya'n 'ejm sb'a eb' 'a Baal-peor, schin eb' no xajmb'al tz'ajx 'a jun tzo'n̈ yechl comn dios may sq'uinal.

²⁹ 'Ix stzuntzj cot eb' yowl a c'ojl ach Jehová qui Diosal on̈, yuj tas xlaj sb'o eb' cha. 'Ix jaw wal jun niwquil yab'il 'a scal eb', xlaj cham eb' yu'uj.

³⁰ Palta ax win Finees, 'ix yil sb'a 'a jun 'ay smul cha, smiln chamoc. Cojn wal cha, 'ix 'och wan scham eb' 'anma cha.

³¹ Yuj tas 'ix sb'o cha, wach' xcan 'a a sat. May b'an̈ 'oj 'at satc'ojlal o'oj yet' pax eb' yin̈tl winac.

³² Mamin Jehová, 'ix stzuntzj cot eb' yowl a c'ojl 'a sti a a tzcuch Meriba, smulyujoc eb', maysch'olnil x'aj 'el'ch Moisés,

³³ ma'ix sna tas xyala, yujto xcot yowl yuj eb'.

³⁴ Ma'ix smil cham eb' jun tzo'n̈ eb' 'anma 'ix al to tzchami.

³⁵ A yic eb' to scalj sb'a eb' yet' eb' chuc chon̈b'al cha. 'Ix sb'eylb'an eb' sb'eyb'al eb',

³⁶ xya'n servil eb' sdiosal eb' chuc chon̈b'al. Atn wal yuj jun tzo'n̈ cha, 'ix juw 'el eb'.

³⁷ 'Ix laj yac' eb' yunnal yet' yisl xajmb'al-l 'a eb' demonio.

³⁸ Scomn 'i'n 'el eb' schic'l eb' 'unn may smul, atn schic'l yunnal eb' mto yisl eb'. Xlaj ya'nc eb' xajmb'al-l 'a sdiosal eb' 'aj Canaán. Ax lum lum cha, 'ix juw can 'el lum yuj schic'l eb' cha.

³⁹ 'Ixta xyutj eb' sjun 'el sb'a, 'ix laj 'och eb' 'ajmulal yuj tas xlaj sb'o cha.

⁴⁰ 'Ix stzuntzj cot wal eb' yowl a c'ojl 'a yib'an̈, 'ix alni to man̈x eco'oc eb'.

⁴¹ 'Ixta x'aj scan eb' 'a yol sc'ab' eb' chuc chon̈b'al cha, ax eb' 'ajc'ojl chi 'ix yac' yajlil 'a yib'n̈ eb'.

⁴² A eb' 'ajc'ojl cha, 'ix yac' ganar eb' scan eb' israel chi 'a yaln̈ yuj eb'.

⁴³ Til wal 'ejm xcolx eb' oj ach qui Diosal on̈, palta ma'ix chaj eb' yab' tas xala, yuj cha, a smul eb' chi tz'i'n can 'ejmi.

⁴⁴ Palta a yic 'ayc' eb' 'a scal syailal cha, 'ix ab'n stew pax 'och eb' 'ayach.

⁴⁵ 'Ix a nan cot jun a trato chi yet' eb', xa jeln a nab'en chi 'a yib'n̈ eb', yujto caw niwn a chamc'ojlal 'a eb'.

⁴⁶ Xa'n nachjoc 'el yuj eb' 'ajc'ojl cha, to wach' tzyutj eb' snab'en 'a yib'n̈ eb'.

⁴⁷ Mamin Jehová, qui Diosal ach on̈, colwjan̈ quet' on̈, tzon̈ a molb'tzej paxt 'a scal eb' chuc nacion̈al, sec tzqui mol b'itnej a b'i yet' qui tzaljc'ojlal.

⁴⁸ Alx cab' wach' paxti 'aych Mamin Jehová, qui Diosal ach an̈ israel on̈ tic on̈, yujto 'aychn̈ej 'ec' 'a smasnil tiempo. Yal cab' smasnil 'anma 'ixtic: B'o cab' 'ixta', xchi cab' eb'. ¡Alx cab' wach' paxti 'a Jehová!