Salmos 105 - Chuj San Sebastian Bible

SALMO 105 Satjub'tac yilx tas sb'ojnac Jehová

¹ Calc yuj diosal 'a Jehová. Qui b'inoquec sb'i. Calc 'el yab'xil 'a smasnil eb' chon̈b' yuj tastc b'ob'il yu'uj.

² B'itn coyc yet' b'it yic tz'ijx chan̈ sb'i, calc wach' paxti 'a 'a, yujto satjub'tac yilx tastc b'ob'il yu'uj.

³ Tzalj coyc yuj tas yaji, tzalj coyc yuj Jehová, yujto tzca'c 'och qui c'ojl 'a 'a.

⁴ Ca'c 'och Jehová yipc qui c'ojol; c'och coyc 'a yojltac 'a smasnil tiempo.

^5-6 An̈ yin̈tl on̈ can Abraham win schecb' Dios, yet' Jacob, sic'b'iln̈ec 'el yuj Dios. Qui nac cot tas satjub'tac yilx b'ob'il yu'uj, yet' schecnb'il 'ac'b'il can 'ayn̈ec yu'uj.

⁷ A Jehová a qui Diosalec yaji; a tz'a'n Yajlil 'a yib'n̈ lum lum tic smasnil.

⁸ Wach'xam til wal smacn̈il eb' 'anma tz'ec' 'a sat lum lum tic, palta nann̈ej strato yu'uj.

⁹ 'Ix yac' 'el'choc strato yet' Abraham yet' sti ya'jnac 'a Isaac.

¹⁰ Ley x'ajcn jun tic 'a Jacob, a jun trato tic jun 'ejmn̈ej xcan 'a qui calec,

¹¹ yic yaln can 'ixtic: 'Oj wac' lum Canaán 'ayex, a lum 'oj 'och e macloc, xchi.

¹² Jaywn̈ej wal nant sb'isl eb' qui mam quichmec, yic yaln can cha, ton̈j nant 'e'lb'a yec' eb' 'a sat lum lum tic.

¹³ Tz'ec' cajn eb' 'a junc chon̈b'al jaye'oc c'u, tzlajw cha, tz'atx eb', c'uxn tz'ec' eb' 'a yol smacb'en junjn eb' rey.

¹⁴ A Dios ma'ix yal sc'ojl to tz'ixtx eb', yuj cha, xya'n snab'enoc eb' rey, xyaln 'a eb' 'ixtic:

¹⁵ Man̈ e tzuntzc eb' sic'b'il 'el wuj tic, man̈ eyixtc eb' in checb' tic, xchi.

¹⁶ 'Ix ya'n jawc wejl 'a yib'n̈ lum lum cha, c'uxn 'ix yac' sat 'ejm tas tzc'ux eb'.

¹⁷ Palta 'ix ya'cn b'ab'ljoc jun win quelm yuj eb', atn win José, win chon̈b'il can 'at mosoal.

¹⁸ Ata xyab' syal yoc yuj q'uen cadena; 'ix 'ajx 'och 'a preso.

¹⁹ 'Ix 'ajx prowal win yuj tas yaljnac can Dios 'a yib'n̈ winac, masnto 'ix 'el'ch tas alb'il can yuj José cha.

²⁰ Ax win rey 'a jun chon̈b' cha, xya'n win 'eltoc José 'a preso, 'ix 'el 'a libre.

²¹ 'Ix ya'n 'och win rey chi win José yilmalc yatut, xya'n yajlil 'a yib'n̈ smasnil tas 'ay 'a winac.

²² Xlaj cuywj 'a eb' niwc yajal, 'ix jelnb'i eb' 'ichmtac winc yu'uj.

²³ Tza'nxoj xc'och win Israel atn Jacob, 'ix c'och 'a Egipto cha, axta xcan cajn 'a lum slum eb' yin̈tl Cam.

²⁴ Ax Dios 'ix 'a'n niwtjoc sb'isl eb' schon̈b' cha, yel xo wal jeln x'aj eb' 'a yib'n̈ eb' 'aj Egipto cha.

²⁵ 'Ix sjeln Dios snab'en eb' 'aj lugar cha, sec tz'och eb' 'ajc'ojlal 'a eb' schon̈b' cha, 'ixta x'aj yixtx eb' schecb' Dios chi yuj eb'.

²⁶ Yuj cha, 'ix schecn 'at eb' schecab', atn Moisés yet' Aarón, to caw a si'jnac 'el eb'.

²⁷ 'Ix ya'n sjelnal eb', sec tzch'ox eb' milagro yil eb' 'anma cajn 'a lum slum eb' yin̈tl Cam.

²⁸ 'Ix ya' cot Dios jun niwquil q'uic'q'uinl 'a yib'n̈ eb' 'anma smasnil, palta ma'ix schaj eb' 'aj Egipto chi yab' tas xyal cha.

²⁹ 'Ix 'och a a chic'l yu'uj, 'ix cham smasnil no chay 'a yojl eb' a'.

³⁰ Xya'n pitzwc chan̈ no pajtza 'a sat lum lum cha, 'ix laj c'och no 'a sat sch'at ewin yajl cha.

³¹ 'Ix yaln paxi to tzpitzw chan̈ no 'us 'a yol smacb'en Egipto. 'Icha wal 'asun, 'ixta wal xjaw no'.

³² 'Ix ya'n cot q'uen niwc sacb'at sjelc n̈ab', til wal x'ec' letz'lom 'a yib'n̈ lum lum cha.

³³ C'uxn 'ix lajw 'ejm yawb'en uva eb' 'anma cha; 'ix lajw 'ejm te higo yet' smasnil te niwc te 'ay 'a sat lum lum cha.

³⁴ Xyaln paxi to tzpitzw chan̈ no c'ulub', no tzc'uxn 'ejm smasnil 'awb'en. 'Ix c'och secnjoc e no', man̈x 'a yalnb'il sb'isl e no'.

³⁵ 'Ix sc'uxn 'ejm e no smasnil tas 'awb'il 'a sat lum lum cha, yet' smasnil te c'ultc tzpa'chan̈ 'a sat lu'um.

³⁶ 'Ix smiln cham smasnil sb'ab'l 'unnal eb' 'aj Egipto cha, xcham eb' 'a junjn n̈ail.

³⁷ Xlajw xoj cha, xyi'n 'elt eb' schon̈b' cha, til wal q'uen oro yet' q'uen plata xlaj yic' eb' israel cha. May xon pax eb' xyab'ilan 'a scal eb'.

³⁸ Caw wal stzalj eb' 'aj Egipto cha, yic xyiln eb' yelt eb', yujto caw 'aych eb' 'a xiwc'ojlal yuj eb'.

³⁹ Xya'n cot Dios jun 'asn yen̈loc eb', ax 'a 'ac'wal, a jun c'ac' a tz'a'n sacq'uinl 'a yib'n̈ eb'.

⁴⁰ 'Ix sc'an eb' tas tzc'ux 'a 'a, yuj cha, xya'n cot no chiltich schib'joc eb', ax 'a satcha'an̈, ata xcot yoch eb' swa'aj, caw wal xb'ut'j eb' si'mb'il.

⁴¹ Xya'n poj snan̈l q'uen niwquil q'ue'en, axta 'ix 'elt secnjoc a a'. 'Ix b'ey a 'a lum tacn̈ lum 'icha wal sb'ey a 'elmal a',

⁴² yujto sna cot sti yaljnac can 'a jun schecab', atn Abraham.

⁴³ 'Ixtn tic 'ix yutj Dios yi'n 'elt eb' schon̈b' sic'b'il 'el yu'uj, 'a scal 'aw yet' 'a scal stzaljc'ojlal eb' x'elta.

⁴⁴ 'Ix ya'n yico'oc eb' schon̈b' chi slum jun tzo'n̈ eb' chuc nacion̈al cha, yet' smasnil tas 'awb'il 'a sat lum lum yuj eb' 'anma cha.

⁴⁵ 'Ixta xyutj Dios yi'n 'elt schon̈ab' sec wach' tzb'eylb'ej eb' schecnb'il, tzyiclni eb' tas tzyal sley. ¡Alx cab' wach' paxti 'a Jehová!