Salmos 104 - Chuj San Sebastian Bible

SALMO 104 Alx cab' wach' paxti*r* 'a jun b'ojnac smasnil tas

¹ 'Oj wal in wach' paxti 'a Jehová. Mamin Jehová, in Diosal ach, caw wal niwn el'chi. A 'a tzictznial, 'icha to a 'aych a pichloc.

² A sacq'uinal, icha to a pichl yajchi, ach xa lich't satchan̈ 'icha junc mantiado.

³ Ach xa b'o chan̈ et'l 'a yib'n̈ a a', 'icha to a 'asn 'aych a caruajeoc, ax 'a scal 'ic' tzach 'eq'ui.

⁴ A 'ic', a 'aych a checb'oc, ax snich c'ac', a tzach 'a'n servil.

⁵ Ach xa b'ocn 'ejm te'n lum lum tic 'a yib'n̈ sb'achnub'al, yuj cha may b'a'n̈ tz'ib'x lum 'a yet'ul.

⁶ A a mar, a a macjnac 'el sat lum lum tic, 'icha to spichl lum yaj a', macchjnac 'el lum niwc witz yuj a'.

⁷ A yic xa tumn a', yajn̈ej x'at a 'eloc, 'icha sc'an̈ c'u, 'ixta xyutj a yab'n yol a jaj, yuj cha, 'ix meltzj a'.

⁸ 'Ix laj tup 'emt eb' a 'a lum jolmctac witz, ax 'a eb' lum pan̈ 'aj 'ix laj can eb' a', yujto ata xa ch'ox yet'l a'.

⁹ Xac' 'ejm yechl 'aj xcan a', sec man̈xtzac c'axw 'e't a 'a sat lum lum tic jun 'ejm xo.

¹⁰ Ach 'ix ala, yuj cha 'ay a spac'b'a', xlaj b'ey a 'a lum ch'olctac.

¹¹ Atn a a chi tzyu'j no calte'al noc', a a tz'i'n 'ec' stacn̈til no calte'al b'uru.

¹² A 'a sti a a cha, ata tzb'o e no ch'ic so'; ax 'a sc'ab' eb' te te', ata tzlaj 'oc' e no'.

¹³ A 'a atut 'a satcha'an̈, ata tza' cot n̈ab' 'a yib'n̈ eb' lum niwc witz; tza'n cot niwc yaxn̈ab', yuj cha, tzya'n eb' te te sat 'ay 'a sat lum lum tic.

¹⁴ Tza'n q'uib' smasnil te c'ultc tzlo no noc', yet' smasnil te 'itj wach' qui lon an̈ 'anman̈ tic on̈, yujto a 'a lum lum tzquij 'elt tas tzqui c'ux on̈:

¹⁵ atn yal uva tz'a'n tzaljoc qui c'ojl on̈, ax aceite tz'a'n pacb'oc qui sat yet' 'ixm 'ixm tzqui waj on̈.

¹⁶ Mamin Jehová, ach tzac' yaxb'oc te te yet' n̈ab', yet' pax eb' te c'ute 'awb'il oj 'a Líbano.

¹⁷ A 'a sc'ab' eb' te', ata tzb'o e no cotc ch'ic so', ax 'a schon eb' te taj, ata tzb'o e no julm chay yet'ul.

¹⁸ A 'a lum jolmctac witz, ata 'ay e no calte'al chiwo, ax 'a eb' q'uen n̈aq'ue'en, ata tzc'ub'j 'el sb'a e no chich.

¹⁹ 'Ix a b'o 'uj yic tz'och sb'isnb'ilc junjn tiempoal, ax c'u, yojtac janc' tzmuc sb'a.

²⁰ Tza'n jawc q'uic'q'uinl 'a 'ac'wal, ax 'ac'wl cha, a tzpechn 'elt e no calte'al noc'.

²¹ A e no león tz'oc' e no yuj schib'j tzc'an 'ayach, ach xo tzac' tas tzc'ux e no'.

²² Ax yic tzq'uel c'u, tzpax e no 'a sn̈aq'ue'en, axta tz'ec' cutn e no swayi.

²³ Ax an̈ 'anman̈ tic on̈, an̈ xo tzon̈ 'elt can munljoc, tzon̈ munljn̈ej tz'ec' c'u, masnto 'a yic tz'em c'u.

²⁴ Mamin Jehová, man̈x alchjb'enoc tas b'ob'il o'oj. Smasnil jun tzo'n̈ tic, xa b'o yet' a jelnal; a lum lum tic, caw b'ut'n lum yet' smasnil a b'ob'en.

²⁵ A a mar, caw lewn sat a', may yalnb'il 'aj tzlajw c'och sti a'. Man̈x yalnb'ilc sb'isl no noc' 'ay 'a yojl a', 'ay no niwac, 'ay pax no cotac.

²⁶ Ata tzlaj 'ec' te barco 'a yib'n̈ a', a pax ta 'ay no Leviatán xa b'o'o, sec tztajn no 'a yojl a'.

²⁷ Smasnil jun tzo'n̈ noc' cha, tan̈b'il yuj e no', 'aja yorail tzac' tas tzc'ux e no'.

²⁸ Ach tzac' tas tzc'ux e no', 'ela ach 'a e no', yuj cha, tzb'ut'j wal e no yet' tas wach'.

²⁹ Toto tzej 'el a sat 'a e no', wal xiw chan̈ e no cha; toto tzej 'ec' sq'uinl e no', 'oj cham e no', ax yochx can e no poccal.

³⁰ Palta ach tzac' sq'uinl e no', tza'n niwtjoc sb'isl e no'. 'Ixta tz'aj sb'o pax yilx sat lum lum tic jun 'ejm xo.

³¹ Mamin Jehová, 'ayc' cab' a tzictznil 'a jun 'ejmn̈ej. Caw tzach tzalj yet' tas b'ob'il o'oj.

³² A yic tzach 'och q'ueln 'a lum lum tic, yajn̈ej tz'ib'x chan̈ lum o'oj; a yic tzach 'och yamn 'a eb' lum niwc witz, yajn̈ej tzq'ue wan stab'l eb' lum o'oj.

³³ A 'aych Mamin Jehová, ata tzin b'itni ya' sb'a pitzn in. 'Oj in b'itnoc b'it 'aych ach in Diosal.

³⁴ Comnoc wach' jun in nab'en tic tzela, yujto cojn 'ayach, ata tz'ilchj in tzaljc'ojlal.

³⁵ Sat cab' 'el eb' maysch'olnil snab'en 'a sat lum lum tic, yactc cab' eb' maysch'olnil tic scajn lu'um. 'A smasnil in c'ojol, caw 'oj wal wach' paxti 'aych Mamin Jehová. ¡Alx cab' wach' paxti 'a Jehová!