Salmos 103 - Chuj San Sebastian Bible

SALMO 103 Alj wach' paxti 'a Jehová

Sb'it David jun tic

¹ Wal 'a smasnil in c'ojol, 'oj wal in wach' paxti 'a Jehová.

² Tzwal in wach' paxti 'a 'a, a swach'c'ojlal 'ayin, may b'a'n̈ 'oj 'at satc'ojlal wu'uj.

³ Yujto tzyac' niwnc'ojlal smasnil in mul, tzya'n b'oxc in c'ojol yic 'ay in yailal.

⁴ A tzin coln 'el 'a yol sc'ab' chamel, tzin schamc'ojlani, tz'o'ch pax sc'ojl 'ayin.

⁵ A tz'a'n tas wach' tzin c'uxu, yuj cha, coynto tzin quelmax pax tzwab' 'icha junc no salt'iw.

⁶ A Jehová tojl tzyutj sb'onyaj junc mach tz'ixtx yuj eb' 'ixtm 'anma'.

⁷ 'Ix yac' 'ojcaxc 'el snab'en yuj Moisés, ax sb'ob'en satjub'tac yilxi, 'ix sch'ox yil eb' schon̈ab'.

⁸ Caw wach' snab'en Jehová, c'un yo'ch sc'ojl 'ayn̈ec, man̈ comnoc tzcot yowal, yujto caw 'ay schamc'ojlal.

⁹ Man̈toc junjn rato tzon̈ stumnec, man̈ smasnilc tiempo 'ay cot yowal.

¹⁰ Ma'oj yac' qui tup lajwquec qui mul mto qui maysch'olnilalec, 'a 'icha wal yoclemal.

¹¹ Yel xo wal niwn schamc'ojlal 'a eb' yiclum 'a 'a, 'icha wal schan̈il yajb't satchan̈ 'a yib'n̈ lum lum tic, 'ixta schamc'ojlal chi 'a eb'.

¹² Caw wal najt 'ix ya'cn 'at qui mulec yic 'ix yi'n 'el 'ayn̈ec, 'icha wal snajtil scal 'aj tzq'uel c'u yet' 'aj tz'ejm paxi, 'ixta 'aj x'at ya'cni.

¹³ 'Icha wal yo'ch sc'ojl junc mamb'il 'a yunnal, 'ixta yo'ch sc'ojl Jehová 'a 'ayn̈ an̈ yiclum on̈c 'a 'a.

¹⁴ Yujto yojtac tas 'ajnc on̈c qui b'o'i, a yet' lum pococ b'ob'iln̈ec.

¹⁵ A qui q'uinlec an̈ 'anman̈ec tic, lajn wal 'icha sq'uinl te c'ultac; tzq'uib' cha'an̈, tznichni;

¹⁶ ax yic tzjaw 'ic' tzma'n can tacjoc, 'ixta tz'aj satx can 'ejm te 'a yet'l cha.

¹⁷ Palta a schamc'ojlal Jehová, may slajb' 'a 'ayn̈ to yiclum on̈c 'a 'a. A swach'c'ojlal 'ayc'n̈ej 'a yib'n̈ quin̈tlec b'aq'uin̈;

¹⁸ 'ayc' 'a yib'n̈ eb' tzyiclni strato, atn eb' matz yac' sat sc'ojl 'a schecnb'il.

¹⁹ A Jehová sb'o sdespacho 'a satcha'an̈, ax ya'n Yajlil 'a yib'n̈ smasnil yolyib'n̈q'uinal.

²⁰ Ex yángel Jehová to 'ay eyip, alc e wach' paxti 'a 'a, ex to yiclum ex 'a tas tzyala.

²¹ E masnil ex 'aj satcha'an̈, alc e wach' paxti 'a Jehová, yujto wan eya'n servil 'icha tznib'ej.

²² ¡Alx cab' wach' paxti 'a Jehová yuj smasnil tas b'ob'il yuj 'a yol smacb'en! ¡'A smasnil in c'ojol, 'oj wal in wach' paxti 'a Jehová!