Salmos 101 - Chuj San Sebastian Bible

SALMO 101 Xyac' win rey sti 'a Dios

Sb'it David jun tic

¹ Mamin Jehová, tzin nib'j in b'itnoc a chamc'ojlal yet' a tojlal; tzin nib'j tzach in b'itnej yet' b'it.

² Tzin nib'j a a tojlal tzin b'eylb'ej. ¿B'a'n̈ wal tzach jaw pax 'ayn jun? Tzin nib'j may tu paxti'al tzalx 'a wib'n̈ yet' wopiso.

³ May wal b'a'n̈ 'oj wa'ch in nab'en 'a tas maysch'olnil. Matz in nib'j wil eb' tzyij 'el sb'a 'a a tz'ey, may wal junc eb' 'oj wa'ch yopiso 'a in despacho.

⁴ A jun tzo'n̈ nab'en maysch'olnil, najt tzwijcan 'el eb' 'a in tz'ey, matz in nib'j tzwojquej 'el tas maysch'olnil.

⁵ A eb' tzc'ultac aln tu paxti 'a yib'n̈ junc xo yit 'anma'il, 'oj in satl eb'. Ma'oj wac' sgana eb' yi'n chan̈ sb'a yet' scomn nab'en.

⁶ 'Oj wil yet' in sat, mach eb' 'anma wach' sb'eyb'al 'a sat lum lum tic, a eb' 'oj wa'ch yopiso wet'oc. A eb' tojl snab'en, a eb' chi 'oj 'och in checb'oc.

⁷ A eb' 'ixtm 'anma', ma'oj wa' yopiso eb' wet' 'a in despacho. Eb' 'a'm 'es, may wal junc eb' 'oj 'och in checb'oc.

⁸ Mamin Jehová, 'a junjn c'u, 'oj in satl eb' maysch'olnil snab'en 'a sat lum lum tic. 'Ixta wal 'oj wutc in satn 'el eb' tzb'on maysch'olnil 'a jun a chon̈b' tic.