Rt 4 - Chuj San Sebastian Bible

Yijnac win Booz 'ix Rut

¹ Ax yic 'ix sacb'i, 'ix 'at 'em chotn win Booz 'a sti spuertail chon̈b' 'aj tzyam sb'a eb' 'anma'. Jab'nant cha, 'ix jaw win 'ayt yuj sb'a yet' win Elimelec, atn jun xyal win Booz 'a 'ix Rut. 'Ix yaln win 'a win 'ixtic: —Cotn̈ 'a tic, 'emn̈ wocan, to 'oj qui paxtin jab'oc, xchi win Booz 'a winac. 'Ix syiclni win scoti, 'ix 'em wocn winac.

² Xlajw cha, 'ix yawtn cot win Booz lajn̈wan̈ eb' yichm wincal chon̈ab', 'ix yaln win 'a eb' to tz'em wocn eb' yet' eb'. 'Ix syiclni pax eb' yem wocan.

³ 'Ix yaln win Booz 'a win 'ayt yuj sb'a yet' eb' cha: —A 'ix Noemí, 'ix meltzj paxt 'ix 'a Moab, ax ticnec, to tzchon̈cn 'el 'ix lum slum win quican Elimelec chamnac.

⁴ Yuj cha, tzwaln ab'i'. Tope tza mancn lu'um. Toto tzej lu'um, 'a sat eb' testigo tic yet' 'a eb' yichm wincal chon̈b' tic, tzaln cani to tzej lu'um, yujto caw 'ayt oj a b'a yet' win Elimelec cha. 'Ay aln ec a mann can 'ec' lu'um. Palta toto matz a mancn 'ec' lum jun, tzal 'ayn ticnec, yujto an tic, schac'ajil xoj waji. Yuj cha, 'ay pax waln wic in mann 'ec' lu'um, xchi win Booz. 'Ix ta'w winac, 'ix yaln win 'ixtic: —'Oj in man lu'um, xchi winac.

⁵ Xlajw cha, 'ix yaln pax win Booz tas wal yel'chi: —A ticnec jun, toto tza mancn 'ec' lum slum 'ix Noemí cha, yowlal tzej 'ix Rut 'aj Moab, 'ix yistzil can win Mahlón, sec wach' 'oj b'inaxcn̈ej sb'i win yichmil 'ix chi chamnc chi 'a lu'um, xchi win Booz cha.

⁶ Ax yic xyab'n winac to 'ixta yaji, 'ix yaln winac: —Toto 'ixta yaj jun cha, ma'oj stac' in mann lu'um, xjuwt 'el in macl tic yu'uj. Palta toto tza nib'j tza mancn lum ach tic, tztac' tza mancni. An tzwac' 'ayach, xchi winac.

⁷ A 'a yic jun tiempoal cha, 'ay jun sb'eyb'al eb' israel, toto 'ay junc mach tzyac' smacl chi 'a junc mach 'ayt yuj sb'a yet'oc, a jun tz'a'n cha, tzyij 'el junc xan̈ab', tzya'n 'a win 'aj tzya' cha.

⁸ Yuj cha, a win 'ayt yuj sb'a yet' win Booz cha, 'ix yij 'el win jun xan̈ab', xlajw cha, xya'n win 'a win Booz, 'ix yaln win 'ixtic: —Mancn lum ach tic, xchi winac.

⁹ Xlajw cha, 'ix yaln win Booz 'a eb' yichm wincal chon̈b' cha, yet' 'a eb' 'ayc' cha: —E masnil ax tic, testigo tzex 'ajcn ticnec, tic an 'oj in mancn lum slum 'ix Noemí, lum slum win Elimelec, win Quelión, yet' yic win Mahlón.

¹⁰ An̈jtona', testigo tzex 'ajcni, to 'oj wic' 'ix Rut 'aj Moab wistloc, 'ix chamnc yichmil, 'ix yistzil can win Mahlón, sec to an̈j 'ijnoc 'oj b'inaxc sb'inax sb'i 'a slu'um, yic 'oj b'ey tiempo sec wach' ma'oj sat 'ejm sb'i 'a scal eb' yican, yet' 'a yol schon̈ab'. A ticnec, testigo tzex 'ajcn 'a jun tic, xchi Booz cha.

¹¹ 'Ix ta'w eb' yichm wincal chon̈b' cha, yet' smasnil eb' 'ayc' cha, 'ix yaln eb' 'ixtic: —Tic tzquila, testigo tzon̈ 'ajcni. Ya' cab' Jehová syaxilal 'a yib'n 'ix 'ix tz'ochcn 'a yol atut cha. Lajn cab' 'oj 'el'chc 'ix 'icha 'ix Raquel yet' 'ix Lea, 'a 'aj cotnn̈c quin̈tl an̈ israel on̈c tic. An̈jtona pax ach tic, niwn cab' tz'aj a b'inax 'a yol yic Efrata yet' 'a Belén.

¹² Niwn cab' onnal 'oj yac' Jehová 'aych yet' 'ix. Q'uib' cab' sb'isl en̈tl yet' 'ix, 'icha 'ajnc sq'uib' sb'isl yin̈tl win Fares yune 'ix Tamar, win yunnal Judá, xchi eb'.

¹³ A win Booz, 'ix yij sb'a win yet' 'ix Rut, 'ix 'och 'ix yistloc winac. Xlajw cha, 'ix way win yet' 'ix, ax Jehová 'ix 'a'n yune 'ix, scuchn chan̈ 'ix yune'. Xlajw cha, x'alj jun swinc 'unn 'ix.

¹⁴ Yuj cha, xyaln smasnil eb' 'ix 'ix 'a 'ix Noemí 'ixtic: —Alx cab' wach' paxti 'a Jehová, yujto 'ix yac' jun eachicn elmaloc. Comnoc niwn tz'aj sb'inax jun eachicn tic 'a qui cal an̈ israel on̈c tic.

¹⁵ A tz'och yipc a c'ojol, an̈jtona', a pax 'oj a'n servil yic 'oj och chichm 'ixal, yujto yune 'ix alb' tic winac. Caw wal tzach schamc'ojlej 'ix, 'ec'b'al wal ach snan 'ix 'a yib'n ucwn̈oc one', xchi eb' 'ix.

¹⁶ Xlajw cha, sme'n chan̈ 'ix Noemí jun nene winc 'unn cha, 'ix ya'n servil 'ix.

¹⁷ A yic xyiln eb' 'ix cajn 'a sla'nil 'ix cha, 'ix yaln eb' 'ix 'ixtic: —'Icha to x'alj yune 'ix Noemí, xchi eb' 'ix. 'Ix ya'n eb' 'ix scuch jun 'unn chi Obed, atn win smam Isaí, win smam 'ichm David.

Eb' smam yichm rey David

¹⁸ Atn stzol-l eb' yin̈tl Fares tic: Fares atn smam Hezrón.

¹⁹ Hezrón atn smam Ram, Ram atn smam Aminadab,

²⁰ Aminadab atn smam Naasón, Naasón atn smam Salmón,

²¹ Salmón atn smam Booz, Booz atn smam Obed,

²² Obed atn smam Isaí, Isaí atn smam win rey David.