Rt 3 - Chuj San Sebastian Bible

A swach' nab'enal win Booz

¹ Xlajw cha, 'ix yaln 'ix Noemí 'ixtc 'a 'ix Rut cha: —Ach walib', tecn 'oj in say junc echmil, sec 'oj ec' a tzaljc'ojlal 'a 'a.

² A win Booz, win 'ayt cuj qui b'a yet'oc, win spatron̈ eb' 'ix junn̈j tzach 'ec' munljoc yet'oc, a 'a jun 'ac'wl tic, 'oj 'at win chayj cebada.

³ Yuj cha, 'oj a yiclj smasnil tastc 'oj wal 'aych tic: 'Achnan̈, tza'n 'och perjuma 'ayach, tza'n 'och a pichl caw wach', tzlajw cha, tzach 'at 'a 'aj 'ayc' win cha, palta man̈ a comn ch'oxc a b'a 'a yic mantzac lajw swa winac.

⁴ Ton̈j tzela 'aj tz'ec' c'otn swayi, 'ixta to b'i'an, tzach 'ec' c'otn 'a way 'a stz'ey yoc. Tzlajw cha, tza to'n q'ue sc'u 'a eb'n̈ yet'oc, ax 'oj alnoc tas yowlal 'oj a b'o', xchi 'ix Noemí cha.

⁵ 'Ix yaln 'ix Rut cha: —'Oj in b'o smasnil tas 'ix al tic, xchi 'ix.

⁶ Xlajw cha, 'ix 'at 'ix 'a 'aj tzchayw cebada win Booz. 'Ix syiclj 'ix sb'on 'icha 'ix yutj yaln 'ix yalb' 'ix cha.

⁷ Ax win Booz, 'ix wa'i, xyu'n tas xyuq'uej, caw wal tzalj win si'mb'il. Xlajw cha, 'ix 'ec' c'otn win sway 'a stz'ey 'aj b'uln 'ec' 'ixm cebada cha. Ax 'a yic sq'ue'ac'wlil xo, caw c'un xc'och 'ix Rut 'a stz'ey winac. 'Ix yi'n chan̈ 'ix sc'u winac, xlajw cha, 'ix 'ec' c'otn 'ix sway 'a yoctc winac.

⁸ Ax 'a chim'ac'wal, 'ix 'el swayn̈ winac, ax yic sutmj win 'a swaynub', 'ix yab'n sb'a winac to 'ay jun 'ix c'otn 'ec' sway 'a stz'ey yoc win cha.

⁹ —¿Mach ach? xchi winac. Xlajw cha, 'ix ta'w 'ix: —An Rut in, an a checb' in. Ach tic smoj tzach colwj 'ayin, yujto 'ayt yuj sb'a win wichmil can et'oc, yuj cha, tzin nib'j tzach wi'aj, xchi 'ix.

¹⁰ 'Ix yaln winac: —Ya' cab' Jehová syaxilal 'a eb'an̈. A ticnec, 'ix nachj 'el wu'uj, chajtlto caw tojl a nab'en, yic tza sayn 'ec' tas tz'aj sb'inax pax win echmil chamnc cha. Q'uinloc man̈ 'ixta'oc, tztac' a sayn 'ec' junc xo win caw quelmto, wach'xam meb'a', mto rico, cojn toto tzyal a c'ojol, palta mantzac a b'o 'ixta'.

¹¹ Ach 'ix man̈ ach xiwoc, yujto a 'a yol in chon̈b' tic, 'ojcab'ilch xo, to wach' a b'inaxi. Yuj cha, 'oj in b'o smasnil tas wan aln 'ayn tic.

¹² Wal yel 'ayt wuj in b'a et'oc, palta 'ayt junx win caw wal 'ayt oj a b'a yet' 'a wib'n̈ an tic.

¹³ Cann̈ 'a tic 'a jun 'ac'wl tic. At q'ui'n 'oj wila', toto 'oj yal sc'ojl win chi ach yi'n 'icha yaln sleyal, to 'ixta', caw wach' b'i'an; palta toto matz yal sc'ojl winac, tzwac' in ti 'a yojltac Jehová ach wi'ni. Wayn̈ ticnec, at tzsacb'eli, tzach 'ati, xchi winac.

¹⁴ Xlajw cha, 'ix way 'ix Rut 'a yoctc win Booz 'a jun 'ac'wl cha. Caw wal 'ayt sacb'i 'ix q'ue wan 'ix, yujto 'ix yal winac, to may cab' mach tz'ilni, toto xit'c 'ix wayc 'a 'aj tzmunlj win cha.

¹⁵ 'Ix yaln win 'a 'ix: —'Ij 'el a potil, tza pixn syam sb'a sn̈i', xchi winac. Ya' sb'a yamb'il sn̈i spotl 'ix chi yu'uj, 'ix secn 'ejm win 'ixm cebada 'a yojol, jab'xoj am may waque'oc 'almu 'ixim. Xlajw cha, st'un̈n can 'at win 'a sjolm squelb' 'ix, 'ix pax 'ix 'a yol chon̈b' yet'oc.

¹⁶ Ax yic xc'ochx 'ix 'a 'ix yalb' cha, sc'anb'n 'ix yalb' 'ix chi 'a 'a: —¿Tas xchi jac jun walib'? xchi 'ix. 'Ix yaln 'ix Rut yuj smasnil tas 'ix yal win Booz:

¹⁷ —'Ix yac' win waque 'echtab' 'ixm cebada 'ayin. 'Ix yaln pax winac, to man̈ wach'oc toto may jac tas wet'i tzin jaw 'ayach, xchi 'ix.

¹⁸ Yuj cha, 'ix yaln 'ix Noemí 'ixtic: —A ticnec ach walib', tan̈wej tas 'oj 'aj 'el'ch jun tic. A jun winc tic, may 'iljelal ticnec yu'uj, yic tzsayn tas tz'aj sb'o jun tic, xchi 'ix 'a 'ix.