Rt 2 - Chuj San Sebastian Bible

Xit'nc 'ix Rut si'j jolm cebada

¹ 'Ayt jun winc 'ayt yuj sb'a yet' win Elimelec yichmil can 'ix Noemí, Booz sb'i winac, caw rico, caw b'inab'il winac.

² Ax 'ix Rut cha, 'ix yal 'ix 'a 'ix Noemí 'ixtic: —Tzin tew 'ayach, to tzac' in permiso tzin 'at 'a 'aj wan yoch polj cebada, toq'ue 'ay junc polm cebada tzchaj sc'ojl in si'n chac sjolm quic 'a spatctaquil, xchi 'ix. —'Ixc 'an, xchi 'ix Noemí cha.

³ Xlajw cha, 'ix 'at 'ix Rut 'a 'aj wan spolx cebada cha. 'Ix 'ec' si'nc chan̈ 'ix 'ixm sjolm xlaj can yuj ewin polm cebada cha. Ticni yic win Booz jun munljel 'aj xc'och 'ix cha, atn win 'ayt yuj sb'a yet' win Elimelec.

⁴ Wanto si'n chan̈ 'ix sjolm 'ixm xlaj can yuj ewin polm cebada cha, 'ix jaw win Booz cha, spet win 'a Belén. 'Ix yaln win 'ixtc 'a eb' smunljum cha: —A cab' Jehová 'aych eyet'oc, xchi. 'Ix ta'w ewin 'a win 'ixtic: Ya' cab' Jehová syaxilal 'a eb'an̈, xchi ewinac.

⁵ 'Ix sc'anb'n win Booz 'a win smayltoma chi muc'uc: —¿Mach 'ay yic jun 'ix cob's cha? xchi.

⁶ 'Ix ta'w win mayltoma cha: —Atn 'ix 'aj Moab ajun yet' 'ix Noemí.

⁷ Sc'an 'ix spermiso 'ayin yic tz'ec' si'noc chan̈ 'ix 'ixm sjolm tzlaj can yuj ewin munljum tic. At xo 'a sq'uin̈b'il xjaw 'ix, matz 'och wan 'ix smunlji, at wal sjaw 'ix 'iljoc tic, xchi winac.

⁸ Yuj cha, 'ix yaln win Booz 'ixtc 'a 'ix Rut cha: —Ach 'ix, 'ab' tas tzwala, man̈x ach 'at si'j sjolm cebada tic 'a scal smunljel junc xo mach. Cann̈ej yet' eb' 'ix wa'mal servil tic.

⁹ Ax yet' eb' 'ix tzach 'at 'aj tzpolw cebada ewin in munljum. Tox 'ix wal 'a ewin in munljum tic to may mach tzach tzuntzni. A yic 'ay a tacn̈ti'al, tztac' tzej 'elt al tzo'j 'a yol ch'ub' 'aj tzyij 'elt ewin in munljum yico', xchi win 'a 'ix.

¹⁰ A yic xyab'n 'ix 'ixta', 'ix 'em n̈ojnjoc 'ix 'a sat lu'um, 'ix yaln 'ix 'a win Booz chi 'ixtic: —¿Tas yuj wach' tzotj paxtinc a b'a 'ayin? Caw wach' pax tzotj a nab'en 'ayin, tic pax wal chuc chon̈b'al in, xchi 'ix.

¹¹ 'Ix yaln win Booz 'a 'ix: —C'uxn xwab' smasnil tastc 'ix 'el a b'on yet' 'ix alib', yic tox 'ix cham win echmil. An̈jtona wojc paxi, to 'ix actjcan a mam a nun yet' a chon̈b' 'aj 'aljnac ach, yic tzach jaw cajn quet' 'a jun chon̈b' tic, jun to man̈ ojcoc xon 'a yictax pecti'.

¹² A Jehová a 'oj 'a'nc spac 'ayach, yuj smasnil a wach'c'ojlal. 'Ajx cab' spac a wach' nab'enal yuj Jehová qui Diosal an̈ israel on̈ tic on̈, jun 'aj tzach jaw wul a col a b'a, xchi Booz.

¹³ Xlajw cha, 'ix ta'w 'ix 'a winac: —Caw wach' a nab'en 'ayin. A jun tzo'n̈ a paxti tzal 'ayn tic, caw tzjaw in tzaljc'ojlal yu'uj. Caw wach' a paxtin 'ayin, wach'xam man̈ in lajnoc yet' junc eb' 'ix a'mal servil tic, xchi 'ix Rut cha.

¹⁴ A yic 'ix c'och yorail yoch wa'el, 'ix 'awtx cot 'ix wac yuj win Booz, 'ix yaln win 'ixtic: —Cotan̈, wan̈ quet'oc. Lab'j 'ejm junc a pan chi 'a scal vinagre tic, xchi winac. 'Ix 'em chotn 'ix 'a stz'ey ewin munljum cha, 'ix ya'n win Booz 'ixm cebada c'an yaj sb'olx 'a 'ix. 'Ix wa 'ix, masnto 'ix b'ut'j 'ix, palta xyac' sobra to tas tzc'ux 'ix cha.

¹⁵ Xlajw cha, 'ix 'atx 'ix si'j sjolm cebada chi jun 'ejm xo. 'Ix yaln win Booz chi 'a eb' smunljum 'ixtic: —Tztac' si'n 'ix 'ixm schon tzcan 'a scal 'ixm syuchn̈al yaj cha, man̈ e tumc 'ix.

¹⁶ Tztac' pax tzeyactj can junjnoc 'ixm syuchn̈al xo yaj spolx cha, sec wach' tzsic' 'ix yico'oc. ¡May junc mach tztac' yowx 'a 'ix! xchi winac.

¹⁷ Ax yic wan xo yem c'u, 'ix yactn 'ix si'n 'ixm sjolm cebada 'a sat slum win Booz cha. Xlajw cha, sma'n 'el 'ix 'ixm sic' 'a jun c'u cha, jab'xoj man̈ 'ox 'almuoc 'ixm xyij 'ix.

¹⁸ Xlajw xoj cha, 'ix meltzj 'ix 'a yol chon̈ab', cuchb'il 'ixm yuj 'ix. 'Ix yiln yalb' 'ix cha, to 'ay tas yet' 'ix. Xlajw cha, 'ix sch'oxn 'ix jantc 'ixm cebada chi yet' 'ix, 'ix yi'n pax q'uet 'ix jancto tas ma'ix lajw sc'uxn cha, 'ix ya'n 'ix 'a 'ix Noemí.

¹⁹ 'Ix sc'anb'n 'ix yalb' 'ix cha: ¿'Ajtil ach munlj ticnec? ¿Mach 'ay smunljel 'aj ach xit' si'j sjolm cebada tic? Wach' yic jun mach 'ix colwj 'aych 'a jun c'u tic. Yujto niwn sjolm a cebada 'ix a sic'a, xchi 'ix Noemí cha. 'Ix yaln 'ix Rut 'ixtc 'a 'ix yalb' cha: —A sb'i jun winc 'ay yic munljel 'aj in xit' cha, tzcuch Booz, xchi 'ix.

²⁰ 'Ix yaln pax 'ix Noemí: —Ya' cab' Jehová syaxilal 'a yib'n̈ jun winc cha, yujto caw wal wach' xyutj snab'en 'ayon̈, 'ixtnta pax yutjnac snab'en 'a win wichmil chamnac. A jun winc cha, 'ayt cuj qui b'a yet'oc, yuj cha, to 'ay yaln yic on̈ scolni, xchi 'ix.

²¹ 'Ix yaln pax 'ix Rut cha: —An̈jtona', 'ix yaln pax win 'ayin, to tzta'n̈j in 'at in sic' chacx in cebada cha. An̈j ab' yet' eb' 'ix ya'mal servil win chi tzin 'eq'ui, masnto tzlajw 'ec' 'ixim, xchi 'ix.

²² Yuj cha, 'ix ta'w 'ix Noemí 'a 'ix yalb' chi 'ixtic: —Ach walib', caw wal wach' tzwab'i, toto an̈j yet' eb' 'ix ya'mal servil win tzach 'eq'ui. Man̈ ach 'at 'a junc xo mach 'ay smunljel, sec wach' may junc mach tzach tzuntzni, xchi 'ix.

²³ An̈ja yec' 'ix Rut si'j sjolm cebada yet' eb' 'ix ya'mal servil win Booz, masnto yic xlajw spolx 'ixim yet' 'a yic xpolx 'ixm trigo, junn̈j to yaj 'ix Rut yet' 'ix yalb' cha.